YOʻLLARDA QOIDABUZARLIKLARGA QARShI KURAShNING YaNGI TIZIMI JORIY ETILDI

Mamlakatimizda avtotransport vositalarini boshqarayotgan haydovchilarning yoʻl harakati qoidalariga amal qilmay, tezlikni meʼyordan oshirishi yoki yoʻl belgilariga boʻysunmasligi oqibatida yoʻl-transport hodisalari tobora koʻpaymoqda. Buning oqibatida beayb insonlarning jabr koʻrayotgani esa juda achinarli.

Yurtimiz hududlarida 2022-yilda 2356 nafar fuqarolar yoʻl-transport hodisalari oqibatida vafot etgan. Ularning orasida bolalar, hatto goʻdaklar ham bor. Buningdek holatlarning kamayishiga erishish maqsadida Oʻzbekiston Respublikasi Ichki ishlar vaziri oʻrinbosarining farmoyishiga koʻra yoʻl-transport hodisalarining oldini olishga sinov tariqasida yangi tizim – “Mahallabay” tizimi joriy etilmoqda. Hududlarda yoʻl-transport hodisalarining barvaqt oldini olish, yoʻl harakati xavfsizligini taʼminlash va qoidabuzarliklarga qarshi kurash samaradorligini oshirish maqsadida joriy etilayotgan ushbu yangi tizimda yoʻl patrul xizmati xodimlari hududdagi kriminogen vaziyat, transport vositalari soni, aholi soni, avtomobil yoʻllarining uzunligi, transport vositalarining oqimi, ijtimoiy obʼektlar soniga qarab biriktiriladi va faoliyati doimiy nazorat qilib boriladi.

Amudaryo tumani hokimligi majlislar zalida hududlarda yoʻl-transport hodisalarining barvaqt oldini olish, yoʻl harakati xavfsizligini taʼminlash va qoidabuzarliklarga qarshi kurashish boʻyicha “Mahallabay” ishlash tizimi joriy etilayotganligi munosabati bilan yigʻilish oʻtkazildi.

Yigʻilishda tuman hokimi Sultonboy Yoʻldoshev, Qoraqalpogʻiston Ichki ishlar vazirligi yoʻl harakati xavfsizligi boshqarmasi boshligʻi podpolkovnik Salauat Kazbekov, tuman Ichki ishlar boʻlimi boshligʻi Jamoladdin Yusupov, boʻlim yoʻl-patrul xizmati xodimlari, profilaktika inspektorlari, mahalla fuqarolar yigʻinlari raislari, huquqni muhofaza qilish idoralari vakillari qatnashdilar.

Yigʻilishni tuman hokimi Sultonboy Yoʻldoshev ochdi va kun tartibida koʻrilayotgan masaning muhim ahamiyatga egaligini taʼkidladi.

Shundan soʻng Qoraqalpogʻiston Respublikasi Ichki ishlar vazirligi yoʻl harakati xavfsizligi boshqarmasi boshligʻi, podpolkovnik Salauat Kazbekov soʻzga chiqib, yoʻl-transport hodisalarining barvaqt oldini olish, yoʻl harakati xavfsizligini taʼminlash va qoidabuzarliklarga qarshi kurashish boʻyicha joriy etilayotgan yangi tizim boʻyicha keng tushuntirish berdi.

Yigʻilishda hududlarga birkitilgan 10 nafar yoʻl-patrul xizmati xodimlarga yuklanadigan vazifalar xususida toʻliq maʼlumotlar berildi. Mahallalardagi kriminogen vaziyatni barqarorlashtirish, yoʻl infratuzilmasi ahvolini oʻrganish va nazorat qilish, ijtimoiy obʼektlardagi harakat xavfsizligini taʼminlash, hududlar boʻyicha oʻz vaqtida profilaktik tadbirlarni tashkillashtirish, haydovchilarni tayyorlashni nazorat qilishning sinov tariqasida joriy etilayotganligi – yoʻl-transport hodisalari va ular oqibatida insonlarning jabrlanishining oldini olishga qaratilganligi bayon etildi.

Yigʻilishda koʻrilgan masalalar yuzasidan tegishli qarorlar qabul qilindi.

O.RAJABOVA.