36-SONLI MAKTABDA “KITOBIM QOʻLIMDA” DEB NOMLANGAN TADBIR OʻTKAZILDI

Bahor oyining ikkinchi oyida Xalqaro bolalar kitobi kuni munosabati bilan dunyo miqyosida turli tadbirlar, yirik kitob yarmarkalarining oʻtkazilishi anʼana tusiga kirgan.  Yurtimizda ham bu kun keng nishonlanadi va turli tadbirlar oʻtkaziladi.

Shu munosabat bilan 36-sonli maktabning boshlangʻich sinflari ishtirokida “Kitobim qoʻlimda” deb nomlangan maʼnaviy-maʼrifiy tadbir tashkil etildi. Maktabning boshlangʻich sinf oʻqituvchisi Zulxumor Jamolova hamda 3-“V” sinf oʻquvchilari tomonidan oʻtkazilgan ushbu tadbirda maktab direktorining maʼnaviy-maʼrifiy masalalar boʻyicha oʻrinbosari Vahobjon Davletov, boshlangʻich sinflar uslubbirlashmasi rahbari Nasiba Bobojonova hamda boshlangʻich sinf oʻqituvchilari va oʻquvchilari qatnashishdi.

Tadbirni maktab direktorining maʼnaviy-maʼrifiy masalalar boʻyicha oʻrinbosari Vahobjon Davletov ochib berdi va xalqimiz, millatimiz ilm-fanni, kitobni, kitobxonlikni azal-azaldan qadrlab kelganini, ajdodlarimizning qadim davrlarda ham kitobxonlik davralari, mushoiralar, olimu fuzalolar ishtirokidagi kechalar tashkil etganlari, dostonlar asosida baxshilar, oqinlarning aytishuvlarini uyushtirganlari haqida soʻzladi. Bularning hammasi xalqimiz maʼnaviyatini yuksaltirishga xizmat qilganini aytib, oʻquvchilarni kitobxonlikka daʼvat etdi.

Tadbirda ishtirok etgan maktab kutubxonachisi Nazokat Saʼdullayeva ham soʻzga chiqib, bolalarga sifatli kitoblar yetkazib berish uchun ijtimoiy ahamiyatga molik loyihalar amalga oshirilayotganini, natijada bolalar koʻngliga tez va oson kirib boradigan kitoblar dunyo yuzini koʻrayotganini taʼkidladi. Shuningdek, kitob oʻqigan bola aqlli va bilimli boʻlishini, hamisha toʻgʻri yoʻlni topa olishini, dunyo ilmlarini toʻliq egallasa fozil insonlar boʻlishini aytib oʻtdi.

Oʻquvchilar kitoblar haqida maqollar, tez aytishlar va qiziqarli maʼlumotlar aytib, tadbirni davom ettirishdi. Berilgan maʼlumotlar orqali oʻquvchilar kitoblarning koʻp yillar ilgari paydo boʻlgani, dastlab loydan, keyinchalik hayvon terilaridan, mum surtilgan taxtachalar tayyorlangani, yillar oʻtishi bilan kitob bosib chiqarish takomillashib borganini bilib olishdi. Kitoblarning bebaho boylik, bilim manbai ekanligi, tafakkurni yuksaliturvchi, baxt keltiruvchi ushbu boylikni qadrlash lozimligini yanada chuqurroq anglashdi.

Shundan soʻng, ikki oʻquvchi tengdoshlariga turli topishmoqlar berib, javobini toʻgʻri topgan oʻquvchilarni shirinlik bilan siylashdi. Oʻyin tarzida quvnoqlik bilan oʻtkazilgan ushbu qismda oʻquvchilar topishmoqlarni toʻgʻri topishga harakat qildilar.

Tadbir davomida oʻquvchilar faol ishtirok etib, kitob va bilim haqida sheʼrlar aytishdi. Qoʻshiqlar kuylab, ajoyib raqslarga tushib, tadbirga xushnudlik baxsh etishdi. Ayniqsa, oʻquvchilarga Temurbek Baxtiyorov hamda Niyatulla Yangiboyev ifodali aytib bergan sheʼrlar, qiziqarli maʼlumotlar juda manzur boʻldi. Oʻquvchilarni kitobxonlikka daʼvat etish, kitoblarning qadrini, oʻrnini anglatish maqsadida oʻtkazilgan ushbu tadbir juda qiziqarli oʻtdi.

Bugun yurtimizda kitob nashr qilish va kitobxonlik davlat siyosati darajasida eʼtirof etilmoqda. Oʻsib kelayotgan yosh avlod qalbida kitoblarga va kitobxonlikka mehr uygʻotish, qiziqishlarini oshirishda bu kabi tadbirlar muhim ahamiyat kasb etadi.

Ozoda Xudoyberganova, 36-sonli maktabning maktabning ijodiy-madaniy masalalar boʻyicha targʻibotchisi.