Amudaryo tumani hokimi S.Yoʻldashevning Qoraqalpogʻiston Respublikasi Konstitutsiyasining 30 yilligi munosabati bilan bayram tabrigi

Qadrli yurtdoshlar!

Avvalo, Ciz, azizlarni, Sizlar orqali koʻpmillatli xalqimizni Qoraqalpogʻiston Respublikasi Konstitutsiyasi qabul qilinganining 30 yilligi bilan chin qalbimdan samimiy muborakbod etaman.

Bundan 30-yil muqaddam – 1993-yil 9-aprel kuni Qoraqalpogʻiston Respublikasi Oliy Kengashi tomonidan Respublikamiz fuqarolarining munosib hayot kechirishlarini taʼminlash, insonparvar demokratik huquqiy davlat barpo etish, fuqarolar tinchligi va milliy totuvligini taʼminlash maqsadida Qoraqalpogʻiston Respublikasining Konstitutsiyasi qabul qilingan edi.

Konstitutsiyamiz mustaqillik yillarida erishgan barcha yutuq va marralarimizning mustahkam huquqiy poydevori, xalqimiz erkin va farovon turmush kechirishining qonuniy kafolati boʻlib xizmat qilib kelmoqda.

Qoraqalpogʻiston Respublikasi Konstitutsiyasida inson-ning ijtimoiy huquqlariga katta eʼtibor qaratgan boʻlib, mehnat qilish, erkin kasb tanlash, adolatli sharoitlarida ishlash, ishsizlikdan himoyalanish, ijtimoiy taʼminot olish kabi huquqlar konstitutsiyaviy darajada eʼtirof etilgan.

Aziz doʻstlar!

Xabaringiz bor, xalqimiz hayotini yanada obod va farovon qilish, yurtimizda yashayotgan millati, tili va dinidan qatʼiy nazar har bir insonga eʼtibor va gʻamxoʻrlik koʻrsatish maqsadida Oʻzbekiston Respublikasi Konstitu-tsiyasiga qoʻshimcha va oʻzgartirishlar kiritilmoqda.

Yangilanayotgan Konstitutsiyamizda Oʻzbekiston – ijtimoiy davlat deb belgilanmoqda. Bu – insonga eʼtibor va gʻamxoʻrlik, deganidir. Davlatning ijtimoiy sohadagi majburiyatlari bilan bogʻliq Konstitutsiyadagi normalar 3 barobarga koʻpaytirilmoqda.

Qoraqalpogʻiston Respublikasi aholisining barcha takliflar hamda hududning oʻziga xos etnik, madaniy xususiyatlari, milliy urf-odat va qadriyatlari, alohida huquqiy maqomini eʼtiborga olgan holda yangilanayotgan Konstitutsiyada Qoraqalpogʻistonning davlat tuzilishi va siyosiy tizimi bilan bogʻliq moddalar oʻzgarishsiz qoldirilmoqda.

Fursatdan foydalanib, barcha yurtdoshlarimizni 30-aprel kuni boʻlib oʻtadigan Referendumda faol ishtirok etib, Yangi Oʻzbekistonning yangilanayotgan Konstitutsiyasi uchun ovoz berishga chaqiraman.

Sababi, mamlakatimizni isloh etish va demokratlashtirish, inson qadrini ulugʻlash, xalqimiz uchun eng oliy neʼmat – tinchlik va osoyishtalikning, taraqqiyot va farovonlikning bardavom boʻlishida Konstitutsiyamiz mustahkam poydevor vazifasini oʻtashi shubhasiz.

Aziz va muhtaram yurtdoshlar!

Sizlarni yana bir bora Qoraqalpogʻiston Respublikasi Konstitutsiyasi qabul qilinganining 30 yillik shodiyonasi bilan chin qalbimdan tabriklab, barchangizga sihat-salomatlik, xonadonlaringizga tinchlik-xotirjamlik, fayzu baraka tilayman!