2021-2022 oʻquv yilida Oliy taʼlim muassasasini tamomlagan bitiruvchilarni va ishsiz fuqarolarni ish bilan taʼminlash maqsadida boʻsh ish oʻrinlari yarmarkasi boʻlib oʻtdi

Yurtimizda aholi bandligini taʼminlash, tadbirkorlik faoliyatini rivojlantirish hisobidan yangi ish oʻrinlarini yaratish, ayniqsa, xotin-qizlar va yoshlarni ijtimoiy qoʻllab-quvvatlashga alohida eʼtibor qaratilmoqda.

Sababi, mamlakatimizda xotin-qizlar faolligini oshirish, mustaqil hayotga kirib kelayotgan yoshlarni ish bilan taʼminlash har doimgidan-da dolzarb ahamiyat kasb etadi.

13-aprel kuni Amudaryo tumanida tuman prokuraturasi va Aholi bandligiga koʻmaklashish markazi bilan hamkorlikda 2021-2022 oʻquv yilida Oliy taʼlim muassasasini tamomlagan amudaryolik ishsiz bitiruvchi yoshlarni va ish izlayotgan fuqarolar bandligini taʼminlash maqsadida “Boʻsh ish oʻrinlari yarmarkasi” oʻtkazildi.

Yarmarkada tumandagi 75ta korxona va tashkilotlar 138ta boʻsh ish oʻrinlari bilan qatnashdi. Yarmarkaga tumandagi turli ovul va mahallalardan jami 63 nafar fuqaro kelib ishtirok etdi.

Ular mehnat bozoridagi takliflar bilan yaqindan tanishib, tumandagi korxona, tashkilot va muassasalardagi boʻsh ish oʻrinlari, ishchi-xodimlarga yaratilgan sharoit, ijtimoiy himoya va oylik maoshlari haqidagi maʼlumotlarni batafsil oʻrgandilar.

Yarmarka ishtirokchilaridan 4 nafari mavjud boʻsh ish oʻrinlariga yoʻllanma orqali ishga joylashtirildi.

23 nafar bitiruvchiga Oliy taʼlim muassasalarida tugatgan mutaxassisligi boʻyicha oʻz tadbirkorlik faoliyatini yoʻlga qoʻyish boʻyicha maslahat berildi. Ularning tadbirkorlik faoliyatini boshlashi uchun imtiyozli kredit olishi va asbob-uskuna uchun subsidiyalar ajratilishida amaliy yordam beriladigan boʻldi. 1 nafar fuqaro esa tumandagi 4-sonli maktabgacha taʼlim tashkilotiga qorovul lavozimiga ishga joylashtirildi.

Mehnat yaramarkasida boʻsh ish oʻrinlarining aksariyati Oliy taʼlimni bitirgan yosh mutaxassislarga moʻljallanganini ham alohida taʼkidlash lozim.

Bitiruvchilarning 1 nafari tuman tibbiyot birlashmasiga navbatchi hamshira lavozimiga, 1 nafari Amudaryo tumani Obodonlashtirish boshqarmasiga brigadir, yana 1 nafari elektro payvandchi vazifalariga ishga joylashtirildi. Yarmarkada taklif etilgan ish oʻrinlarining yarmidan ortigʻi tadbirkorlik subʼektlari hissasiga toʻgʻri kelgani tumanda bandlik masalasini hal etishda kichik biznes vakillarining ulushi ortib borayotganidan dalolatdir.

Shu oʻrinda aytish kerakki, tumanda “Yoshlar daftari” va “Ayollar daftari”ga kiritilgan fuqarolar bilan ishlash boʻyicha tizimli chora-tadbirlar belgilangan boʻlib, ijtimoiy himoyaga muhtoj yoshlar va xotin-qizlar bilan ishlash tizimini yangi darajaga olib chiqish, ularni ijtimoiy-huquqiy va psixologik qoʻllab-quvvatlash, kasb-hunarga oʻrgatish va bandligini taʼminlash ishlari samarali tashkil etilmoqda.

Yarmarkada ishtirok etgan “Ayollar daftari”ga kiritilgan ayollarning ham bandligi taʼminlandi. “Ayollar daftari”ning 4-bosqichi 1-toifasiga kiritilgan 13 nafar xotin-qizlar haq toʻlanadigan jamoat ishlariga, 23 nafar fuqaro esa kasbga oʻqitishga yoʻnaltirildi.

Yarmarka davomida ish izlovchi fuqarolarga malakali mutaxassislar tomonidan bandlik sohasida qiziqtirgan masalalar boʻyicha maslahat va tavsiyalar berilib, huquqiy va amaliy yordamlar koʻrsatildi.

Tuman hokimligining Axborot xizmati.