Tuman hokimi 1-sektor hududidagi eʼtiborga muhtoj yoshlar bilan uchrashdi

Maʼlumki, joriy yilning 11-aprel kuni Prezidentimiz raisligida yoshlar siyosati sohasidagi ishlar natijadorligini oshirish hamda ular bilan ishlash tizimini yanada takomillashtirish chora-tadbirlari yuzasidan videoselektor yigʻilishi boʻlib oʻtgan edi.

Yigʻilishda dastlab mamlakatimizda yoshlar bilan ishlash boʻyicha mutlaqo yangi tizim joriy etilayotgani haqida maʼlumot berildi. 14 yoshdan 30 yoshgacha boʻlgan yoshlarning ijtimoiy ahvoli, qobiliyati va qiziqishlari oʻrganilib, ular 3 toifaga ajratildi. Endilikda ular bilan manzilli, aniq mezonlar asosida ishlanishi taʼkidlandi.

Yaxshi oʻqiyotgan, tadbirkorligini yoʻlga qoʻygan, rasmiy sektorda ishlaydigan, qobiliyati bor, ijtimoiy faol boʻlgan 4,4 million yoshlar “yaxshi” toifaga, turmush taqozosi bilan rasmiy sektordan ish topa olmagan, lekin iqtisodiy faol 4,6 million yosh “oʻrta” toifaga, davlatning gʻamxoʻrligi va eʼtiborini kutayotgan hamda koʻmakka muhtoj 396 ming nafar yoshlar “ahvoli ogʻir” toifasiga alohida ajratib olindi. Shuningdek, har bir vazir, vazir oʻrinbosarlari, viloyat, tuman va shahar hokimlari, sektor rahbarlari, oliygoh rektorlari, Milliy gvardiya va harbiy qism komandirlariga uchinchi toifadagi 50 nafardan eʼtiborga muhtoj yoshlar nomma-nom biriktirilishi belgilangan.

Ushbu topshiriqqa asosan Amudaryo tumani hokimi Sultonboy Yoʻldashevga 1-sektor hududidagi mahallalardan jami 75 nafar eʼtiborga muhtoj yoshlar biriktirildi.

19-aprel kuni tuman hokimi Boyovul mahallasidagi 9-sonli Bolalar musiqa va sanʼat maktabida oʻziga biriktirilgan yoshlar bilan uchrashib, ularning muammo va takliflarini oʻrgandi.

Samimiy muloqot avvalida mamlakatimizda yoshlarning huquq va manfaatlari muhofazasiga yuksak eʼtibor qaratilib, Yoshlarga oid davlat siyosatini amalga oshirish borasidagi huquqiy-normativ baza izchil takomillashtirilib borilayotganligi xususida atroflicha soʻz yuritildi.

Uchrashuvda bundan buyogʻiga yoshlar bilan ishlash tizimi tubdan oʻzgarishi, “Yoshlar daftari” bilan ishlashda yoshlarni animator, dizayner, logistika operatori, gid kabi zamonaviy kasblarga oʻqitishga alohida eʼtibor qaratilishi taʼkidlandi. Shuningdek, bu tizim bilan maktablarning 10-11-sinf oʻquvchilari ham qamrab olinishi aytib oʻtildi.

Qolaversa, “Yoshlar daftari” jamgʻarmalari mablagʻining kamida 40 foizi aynan kasb-hunarga oʻqitishga yoʻnaltirilishi, yoshlar oʻrtasida kasb-hunar olimpiadalari oʻtkazilib, iqtidorli yoshlar aniqlangan holda ularning tadbirkorlik qilishlari uchun barcha sharoitlar yaratib berilishi aytib oʻtildi.

Uchrashuvda yoshlar tomonidan turli mazmundagi taklif va murojaatlar kelib tushdi. Murojaatlarni tuman hokimining shaxsan oʻzi qayd etib bordi va tez orada ijobiy hal etilishini maʼlum qildi.

Uchrashuvda faol yoshlar soʻzga chiqib, mamlakatimizda, xususan, tumanimizda ham yoshlar hayotiga oid muammoli masalalar doimiy nazoratga olinib, ijobiy yechim topayotganidan mamnun ekanliklarini bildirdilar.

Tuman hokimligining Axborot xizmati.