Nazarxon ovulida yoshlar bilan uchrashuv oʻtkazildi

Jamiyatning eng katta taʼsirchan kuchi sifatida bugun yurtimiz yoshlari davlatimizda olib borilayotgan keng islohotlar jarayonida faol ishtirok etishmoqda, Vatanimiz taraqqiyotini taʼminlash yoʻlida oʻz gʻoya va takliflari bilan maydonga chiqmoqda.

Shu boisdan, aytish lozimki, yoshlarning intilishlari va hayotiy maqsadlari har qanday soha rivojida katta asos boʻlib xizmat qilishi, shubhasiz.

4-may kuni Amudaryo tumanining Nazarxan ovul fuqarolar yigʻini binosida boʻlib oʻtgan uchrashuvda yoshlar bandligini taʼminlash, boʻsh vaqtlarini mazmunli tashkil etish chora-tadbirlari hamda ayni masalalarning eng muhim jihatlariga atroflicha toʻxtalib oʻtildi.

Uchrashuvda tuman Xalq qabulxonasi boʻlimi mudiri Erkin Rajabov, tuman hokimi oʻrinbosari Mahmud Shermetov tegishli korxona-tashkilot masʼullari va 20 ga yaqin faol yoshlar ishtirok etishdi.

Uchrashuvda tuman hokimi oʻrinbosari Mahmud Shermetov yoshlar bandligi va bu orqali ularning daromad topishlarini taʼminlash borasida soʻnggi yillarda amalga oshirilayotgan katta ijobiy oʻzgarishlarga toʻxtalib oʻtdi. Shuningdek, joylardagi yoshlar muammolari va takliflarini oʻrganishda ishni avvalo, mahalladan boshlash va yoshlarning kasbiy qiziqishlari va kelajak rejalarini aniqlashda mahalla institutining ahamiyati katta ekanligini taʼkidladi. Bunda eng muhim masala sifatida mahalla xodimlari tegishli mutasaddi tashkilotlar bilan hamkorlikda yoshlar masalalariga “fuqarobay” yondashishlari lozimligini aytib oʻtdi.

Shundan soʻng, yoshlarning murojaatlari tinglandi. Murojaatlar asosan, bandlik, imtiyozli kredit olish, kontrakt toʻlovining bir qismi toʻlab berilishi va boshqa masalalarda boʻldi.

Aksariyat murojaatlar joyida hal etildi. Baʼzilari tegishli tashkilotlar, xususan, bank va aholi bandligiga koʻmaklashish boʻlimlari tomonidan ijobiy hal etilishi uchun zarur chora-tadbirlar belgilanib, topshiriqlar berildi.

Shuningdek, uchrashuvda Amudaryo tumani Xalq qabulxonasi boʻlimi mudiri Erkin Rajabov yoshlar hayotiga oid muammolar yechimini topish va bu muammolarni tizimli ravishda hal etish uchun keng qamrovli ishlar amalga oshirilayotganligini aytib oʻtdi. Uchrashuvda yoshlarning boʻsh vaqtlarini mazmunli tashkil etish, ularning ijodiy qobiliyatlarini yuzaga chiqarish uchun zarur sharoitlar yaratib berish boʻyicha ham muhim fikrlar bildirib oʻtildi.

Albatta, yoshlar Vatanimizning ertangi umidlari, kelajagimiz davomchilaridir. Shu maʼnoda ularning orzu-intilishlari va hayotiy maqsadlarini amalga oshirish, mustahkam qanot boʻlish bugungi kundagi katta va hayotiy maqsadga aylanmogʻi lozim. Tuman hokimi oʻrinbosarining yoshlar bilan uchrashuvi ham ayni shu maqsadlarga qaratilgani bilan ahamiyatlidir.

Tuman hokimligining Axborot xizmati