9-may – Xotira va qadrlash kuni munosabati bilan Amudaryo tumani hokimi Sultonboy Yoʻldashevning barcha amudaryoliklarga bayram tabrigi

Hurmatli vatandoshlar!

Qadrli mehnat faxriylari, aziz yurtdoshlar!

Avvalo, Siz azizlarni, sizning timsolingizda koʻpmillatli xalqimizni Xotira va qadrlash kuni hamda Ikkinchi jahon urushida erishilgan Gʻalabaning 78 yilligi bilan chin qalbimdan tabriklayman! Barchangizga oʻzimning yuksak hurmat-ehtiromim va ezgu tilaklarimni bildiraman.

Muhtaram faxriylar!

Bugungi shonli sanani biz doimo cheksiz quvonch va iztirob bilan nishonlaymiz. Vatan ozodligi uchun, hozirgi tinch-omon kunlar uchun jang maydonlarida halok boʻlgan ota-bobolarimizning, front ortida fidokorona mehnat qilgan yurtdoshlarimizning muqaddas xotirasini yod etib, oramizda yashayotgan qahramonlarimizga hurmat bajo keltiramiz.

Mashʼum Ikkinchi jahon urushi millionlab insonlar qatori kimningdir bobosi yoki buvisi, yana kimningdir ota-onasi yoki yaqinlarining bevaqt oʻlimiga sabab boʻldi. Olovli janglarda halok boʻlgan ajdodlarimizning tabarruk qoni, oʻz jonini xatarga qoʻyib yurtini asragan ota-bobolarimizning matonati, tunu-kun oromidan kechib, front ortida zahmat chekkan yurtdoshlarimizning peshona teri evaziga qoʻlga kiritilgan Gʻalaba barchamiz uchun qadrlidir. Bu yoʻlda halok boʻlganlarning xotirasi qalbimizda abadiy, shu kunlarga yetgan tabarruk bobo va momolarimizning qadri esa hamma narsadan ulugʻdir!

Hech shubhasiz, oradan qancha yillar, zamonlar oʻtmasin, fashizm ustidan qozonilgan Gʻalabaning qadr-qimmati va ahamiyati tobora ortib boraveradi.

Insoniyat tarixidagi eng dahshatli bu urushda oʻsha paytdagi jami 6 million Oʻzbekiston aholisining 1 yarim milliondan ortigʻi qatnashgan. Ularning yarim milliondan ziyodi jang maydonlarida halok boʻlishgan. 133 ming nafarga yaqini bedarak yoʻqolgan. 60 mingdan ortiq vatandoshimiz esa urushdan nogiron boʻlib qaytgan.

Tumanimizdan esa 4 ming 344 nafar yurtdoshimiz urushga qatnashib, ularning 897 nafari jang maydonlarida halok boʻlgan boʻlsa, 1 ming 927 nafari bedarak yoʻqolgan hamda 1 ming 500 nafarga yaqini oʻz uylariga nogiron boʻlib qaytganlar.

Oʻzbekiston ahli urush hududlaridan koʻchirib keltirilgan 1 millionga yaqin insonga boshpana berib, oʻz nonini ular bilan baham koʻrishdi. Ota-onasi, oilasidan judo boʻlgan 200 ming nafar begunoh bolalarni “Sen yetim emassan!” deb bagʻriga bosib, mehr-muruvvat koʻrsatdilar.

Biz bu raqamlarni har yili 9-may sanasida qayta-qayta esga olamiz. Bular shunchaki oddiy raqamlar emas. Ularning zamirida mushtipar onalarimiz, motamsaro momolarimiz, mard va jasur otalarimiz, butun xalqimizning qalbidagi cheksiz qaygʻu va hasrat mujassam.

Qadrli yurtdoshlar!

Urush xalqimizning irodasini sinovdan oʻtkazdi. Ajdodlarimiz sinovli yillarda ham sharoit ogʻir boʻlishiga qaramay, asrlar osha meros boʻlib kelayotgan Vatanga muhabbat, sadoqat tuygʻularini yoʻqotmay, odamiylik namunasini koʻrsatdi. Uyda qolgan xotin-qizlar, keksalar va bolalar qishloq xoʻjaligida, zavod va fabrikalarda kechayu kunduz mehnat qilib, oʻzlari yemay, kiymay frontga joʻnatgan. Bu ham qahramonlik va jasorat namunasidir.

Bugungi tahlikali dunyoda yuz berayotgan voqealar barchamizni tinchlikning qadriga yetishga undaydi. Yaqin qoʻshnilarimiz boʻlgan davlatlarda sodir boʻlgan va davom etayotgan notinchliklar, dunyoning turli nuqtalarida boʻlayotgan urushlar millionlab tinch aholini oʻz domiga tortib, shahar va qishloqlarning vayron boʻlishiga, yuz minglab aholi, ayniqsa begunoh goʻdaklarning hayotdan bevaqt koʻz yumishiga sabab boʻlmoqda. Bu urushlar tinch aholi boshiga qanday ogʻir azob-uqubat va talofatlar, behisob qurbonlar olib kelganiga barchamiz guvoh boʻlmoqdamiz.

Albatta, ushbu mudhish urushlar oqibatlari bebaho neʼmat − tinchlikning qadriga yetishga, doimo hushyor va ogoh boʻlib yashashga, yoshlarimiz ongini buzgʻunchi gʻoyalardan himoya qilib Vatanga sadoqat ruhida tarbiyalashga chorlab turadi.

Aziz doʻstlar!

Mamlakatimizda keyingi yillarda barcha sohalarda tub islohotlar amalga oshirilmoqda. Inson qadri va manfaati yoʻlida amalga oshirilayotgan bu ulkan oʻzgarishlar, boshqalarning havasini tortadigan yutuq hamda marralarga erishganimizning ortida ulugʻ neʼmat − tinchlik va osoyishtalik turibdi.

Tumanimizda amalga oshirilayotgan bunyodkorlik, obodonlashtirish ishlari ham shular jumlasidandir. Keyingi yillarda birgina Amudaryo tumanida yuzlab oilalar uchun moʻljallangan namunaviy loyihalar asosidagi arzonlashtirilgan uy-joylar, taʼlim va tibbiyot muassasalari, mahalla fuqarolar yigʻinlarining, yuzlab yangi tadbirkorlik subʼektlarining binolari qoʻrilib, foydalanishga topshirildi.

Aziz yurtdoshlar, muhtaram faxriylar!

Bugungi qutlugʻ ayyom − Xotira va qadrlash kunida ota-bobolarimizning shonli anʼanalarini munosib davom ettirib, Vatan himoyasi yoʻlida oʻzini ayamasdan, fidokorona xizmat qilayotgan mard va jasur askarlarimizga, ofitser va posbonlarimizga tumanimiz ahli nomidan samimiy minnatdorchilik izhor etamiz. 

Fursatdan foydalanib, muhtaram faxriylarimizni, hamyurtlarimizni ushbu qutlugʻ bayram bilan yana bir bor muborakbod etaman.

Barchangizga tinchlik-omonlik, xonadonlaringizga qut-baraka tilayman. Yurtimiz tinch, osmonimiz musaffo boʻlsin!