16-SONLI MAKTABDA “XAYR, BIRINChI USTOZIM!” NOMLI TADBIR OʻTKAZILDI

Yurtimizda murabbiylik, ustozlik ulugʻ maqom sanaladi. Ustozlarni chor-atrofni oʻz nurlari ila chorogʻon etuvchi quyoshga oʻxshatishadi. Chindan-da, quyosh olamni yoritsa, ustoz-muallimlar yosh avlod koʻnglini ilm nuri ila yoritadilar, maʼrifat, maʼnaviyat ulashadilar. Hazrat Abdurahmon jomiy aytganlariday:

Ustoz, murabbiysiz qolganda zamon,

Zulumotdan qora boʻlardi jahon.

Muallim soʻzi “ilm beruvchi”, “oʻrgatuvchi” degan maʼnolarni anglatishi ham bejiz emas. Shu boisdan ham ular doimo barchaning eʼzozida, ardogʻida. Ayniqsa maktabga ilk qadam qoʻygan bola qoʻlidan tutib, harflarni yozishni, oʻqishni oʻrgatgan ilk ustozini hech qachon unutmaydi.

Mustaqil yurtimizdagi barcha umumtaʼlim maktablarga bundan toʻrt yil oldin olamcha hayrat bilan 1-sinfga oʻqishga qabul qilingan jajji bolakaylar ayni kunlarda 4-sinfni yakunlamoqdalar, boshlangʻich taʼlimni tugatmoqdalar.

16-sonli umumtaʼlim maktabining 4-A sinf oʻquvchilari ham boshlangʻich taʼlimni yakunlab, birinchi oʻqituvchisi bilan xayrlashib, katta sinflarga qadam qoʻyish arafasida turishibdi. Ularga boshlangʻich sinf oʻqituvchisi Barno Yoʻldoshova 4-yil davomida taʼlim tarbiya berib kelgan va oʻz farzandiday qadrdon boʻlib qolgan oʻquvchilari bilan xayrlashdi va shu munosabat bilan “Xayr, birinchi ustozim!” nomli adabiy-badiiy kecha oʻtkazildi.

Darhaqiqat, har bir inson qayerda ishlamasin, qanday kasb egasi boʻlmasin, unga bilim va tarbiya berib, mustaqil hayotga yoʻllagan ustozlarini hurmat bilan esga oladi. Bugun mana shu sinfxonada oʻtirgan jajji oʻquvchilar qoʻliga qalam tutqazgan, ularga yozishni-oʻqishni oʻrgatgan birinchi ustozi Barno Yoʻldoshovadan bir umr minnatdor boʻlib yashasalar ajab emas.

Tadbirda ular ustoziga minnatdorchiligi sifatida yod olgan sheʼrlarini ifodali oʻqib berdilar.

Tadbirda 4-“A” sinf oʻquvchilari 20 yillik pedagogik ish tajribasiga ega Barno Yoʻldoshovadan 4-yil davomida oʻrgangan bilimlarini, ona Vatan, maktab va ustozlariga atab sheʼr va qoʻshiqlar aytib, tarbiyaviy mazmunga ega sahna koʻrinishlarini hamda milliy raqslarni namoyish qildilar. Ushbu tadbirda ishtirok qilayotgan ota-onalar farzandlariga ilk saboq bergan sinf rahbari ishlariga muvaffaqiyatlar tilab, oʻz minnatdorchiliklarini bildirib oʻtishdi.

Tadbirda jajji bitiruvchilar tilidan ajoyib qoʻshiqlar yangradi. Ayniqsa ular tayyorlagan raqslarni maktab pedagoglar jamoasi va oʻquvchilarning ota-onalari olqishlar bilan kuzatdilar. Bir soʻz bilan aytganda, maktablarda 4-sinflar uchun oʻtkaziladigan bunday tadbirlar kelajak sari dadil qadam tashlayotgan, ertamiz egalarini ajdodlarimizga munosib farzand boʻlib voyaga yetishga ruhlantiradi.

Sahnada tizilishib turib “Xayr, birinchi ustozim” deya qalb harorati ila kuylayotgan bolajonlarning yuz-koʻzlarida ustoziga cheksiz mehr, minnatdorlik aks etadi. Endi bu oʻquvchilar kelgusi 2023-2024 oʻquv yilini yangi sharoitlarda, yangi ustozlar bilan davom ettirishadi. Boshlangʻich taʼlim ular uchun bunda muhim poydevor boʻlib xizmat qiladi. Shu boisdan ham ular kelgusida ham aʼlo baholarga oʻqishga, ilk ustozi ishonchini oqlashga intilishadi.

Oygul RAJABOVA