56-sonli maktabda “Yosh kitobxonlar” tanlovi boʻlib oʻtdi

Qadimdan kitob mutolaasi shaxsni tarbiyalashda uning individual xususiyatlarini ochib berishda muhim va ajralmas rol oʻynagan, shuningdek uning shakllanishida muhim omil boʻlib xizmat qilgan. Shu nuqtai nazardan, zamonaviy dunyoda kitob mutolaasi birinchi navbatda uzluksiz taʼlim tizimida, shu jumladan, har kimning kundalik faoliyatida alohida oʻrin tutishi lozim. Mamlakatimizda bu masalaga jiddiy eʼtibor berilib davlat siyosati darajasiga olib chiqildi.

Amudaryo tumanida ham yosh avlodni yuksak manaviyatli yoshlar etib tarbiyalash, kitobga boʻlgan mehr-muhabbatini oshirish borasida keng koʻlamli saʼy-harakatlar olib borilmoqda.

Ayniqsa, umumtaʼlim maktab oʻquvchilari oʻrtasida muntazam ravishda oʻtkazilib kelinadigan “Yosh kitobxonlar” tanlovi alohida ahamiyatga ega.

24-may kuni Durunki mahallasi hududida joylashgan 56-sonli maktabda “Yosh kitobxonlar” tanlovi boʻlib oʻtdi. Tanlovda 6-, 7-, 8-sinf oʻquvchilari faol ishtirok etishdi.

Tanlov 3 ta shart asosida olib borildi. Birinchi shartda oʻquvchilar biletlar ostiga yashiringan badiiy asar haqida maʼlumot berib, oʻz shaxsiy fikrlarini ifoda etishdi. Ikkinchi shartda qatnashchilar suratdagi shoir yoki yozuvchinining kim ekanligini topib, uning hayoti ijodi haqida batafsil maʼlumot berishdi. Uchinchi shartda esa biletda keltirilgan shoirning sheʼrini ifodali tarzda oʻqib, oʻzlarining shaxsiy fikrlarini bayon etishdi.

Hakamlar hayʼati aʼzolari – Allambergan Jumaniyozov, Madina Rajabova, Fotima Eshimbetova, Nafosat Tilovbayevalar barcha ishtirokchilarning chiqishlarini diqqat bilan kuzatib odilona baholab borishdi.

Tanlov yakunida gʻolib boʻlgan ishtirokchilar Durunki mahallasining yoshlar yetakchisi Xurrambek Qalandarov homiyligida tayyorlangan pul mukofotlari bilan taqdirlanishdi.

Yakuniy natijalarga koʻra, 1-oʻrinni 84 ball bilan 6-“B” sinf oʻquvchisi Feruza Karimova, 2-oʻrnni 73 ball bilan 7 -“A” sinf oʻquvchisi Rayhona Toʻraboyeva, 3-oʻrinni 62 ball bilan 7-“B” sinf oʻquvchisi Charos Tangirbergenovalar egalladi.

Birinchi oʻrin sohibasiga 300 ming soʻm, ikkinchi oʻrin sohibasiga 200 ming soʻm, uchinchi oʻrin sohibasiga 100 ming soʻm pul mukofotlari tantanali tarzda topshirildi. Shuningdek, tanlov gʻoliblari qadimiy va navqiron Xiva shahriga sayohatga olib boriladigan boʻldi.

Oʻquvchilar oʻzlariga koʻrsatilgan bu kabi eʼtibordan mamnun boʻlib, yanada olgʻa intilishga, bundanda koʻp badiiy kitoblar oʻqishga harakat qilishlarini aytib oʻtishdi.

Ushbu tadbirni tashkil etishda shu maktabning ijodiy-madaniy masalalar boʻyicha targʻibotchisi Allambergan Jumaniyozovning xizmatlari katta boʻldi. Ijodiy madaniy masalalar boʻyicha targʻibotchining oʻquvchilar bilan dars mashgʻulotlaridan boʻsh paytda kitobxonlik toʻgaraklarini tashkil etib, ular bilan doimiy ravishda shugʻullanishlari tufayli boʻlib oʻtgan tanlov ular uchun aslo qiyinchilik tugʻdirmadi.

Oʻquvchilar oʻqigan badiy asarlarini ravon tilda ifoda etib berishdi. Umumtaʼlim maktablarida oʻtkazilib kelinayotgan kitobxonlik tadbirlari oʻquvchilarning dunyoqarashi kengayishida va shaxsiy fikri rivojlanishda muhim ahamiyatga ega boʻlmoqda.

F.Eshimbetova