56-SONLI MAKTABDA “XAYR, BIRINChI USTOZIM!” TADBIRI OʻTKAZILDI

Bolalarning jajji qalblariga ilk bor katta orzular, yuksak maqsadlar, intilishlar olib kiradigan muqaddas dargoh bu – maktab hisoblanadi. Mana shu dargohga qadam  qoʻygan har bir bola birinchi ustozi – mehribon oʻqituvchisi yordamida hayot zinapoyalaridan koʻtarila boshlaydi.

Birinchi oʻqituvchi bolalarda oʻqish, yozish, hisoblash, malaka va koʻnikmalarini hosil qilish, tabiat va jamiyat haqida ilk bilimlar berish, xulq-odobga oʻrgatish kabi vazifalarni amalga oshirish chogʻida ularga oʻz farzandlari kabi bogʻlanib qoladi.

Toʻrt yillik davrni oʻz ichiga olgan boshlangʻich taʼlim jarayoni bir zumda oʻtib ketgandek boʻladi, xayolimizda. Ammo shu qisqagina davr mobaynida bolaga berilgan bilim unda hayotiy tushunchalarni shakllantirgan boʻladi.

Boshlangʻich taʼlim bosqichi nihoyasiga yetganidan keyin, albatta birinchi ustozning qadrdon oʻquvchilari bilan xayrlashishiga toʻgʻri keladi.

Hozirgi kunda mamlakatimizning barcha umumtaʼlim maktablarida ustoz va shogirdlarning xayrlashuv onlarini bayram shaklida oʻtkazish anʼanaga aylanib borayapti.

Oʻquv yili yakunida barcha maktablarda oʻtkazilayotgan “Xayr, birinchi ustozim!” deb nomlangan maʼnaviy-maʼrifiy  tadbirlarda aziz muallimlar – ustozlarga katta hurmat-ehtirom koʻrsatilmoqda.

Yaqinda tumanimizdagi 56-sonli maktabda  oʻtkazilgan “Xayr, birinchi ustozim!” deb nomlangan badiiy kecha unda ishtirok etgan 4-sinf bitiruvchilarining ham, oʻqituvchi – ustozlarning ham, ota-onalarning ham qalblarida uzoq saqlanadigan unutilmas tadbirga aylandi, desak mubolagʻa  boʻlmaydi. Chunki bu tadbirda ustozlarning oʻz shogirdlariga boʻlgan mehr-muhabbati, shogirdlarning oʻz ustozlariga boʻlgan cheksiz hurmat-u ehtiromlari tadbir ishtirokchilarining qalblariga aʼlo kayfiyat olib kirdi.

Kechani maktab direktorining maʼnaviy-maʼrifiy ishlar boʻyicha oʻrinbosari Sayyora Yunusova kirish soʻz bilan ochib, 4-sinf bitiruvchilariga kelgusi oʻqishlarida muvaffaqiyatlar tiladi va bu sinf oʻqituvchilari Rohatoy Rahimova va Muborak Ahmedovalarga bolalarga taʼlim-tarbiya berishdagi namunali ishlari uchun maktab maʼmuriyatining minnatdorchiligini bildirdi.

Shundan keyin 4-A sinf oʻqituvchisi Rohatoy Rahimova va 4-B sinf oʻqituvchisi Muborak Ahmedovalar soʻzga chiqishib, shogirdlarining maktabni aʼlo baholarga tugatib, oliy taʼlim muassasalariga oʻqishga kirishlariga, yaxshi kasblarni egallab, Vatanimizga sodiq farzandlar boʻlib yetishishlariga oʻz tilaklarini bildirdilar.

Tadbirda ishtirok etgan ota-onalar oʻz farzandlariga taʼlim-tarbiya berayotgan oʻqituvchilardan cheksiz minnatdor ekanliklarini aytishib, ularning kelgusidagi ishlariga muvaffaqiyatlar, oʻzlariga esa sogʻlik-salomatlik tiladilar.

Kechada 4-A va 4-B sinflar oʻquvchilari ona Vatan, maktab va ustozlariga bagʻishlangan sheʼr va qoʻshiqlar aytishib, raqsga tushdilar.

Tadbir yakunida 4-sinf oʻquvchilaridan bir guruhiga aʼlo oʻqigani va yaxshi xulqi uchun maktab maʼmuriyatining “Faxriy yorliq”lari topshirildi. 

Allambergan JUMANIYoZOV, 56-sonli maktabning ijodiy-madaniy masalalar boʻyicha targʻibotchisi.