TUMAN HOKIMI BOSUV MAHALLASI YoShLARI BILAN UChRAShDI

Oʻzbekiston Respublikasi Prezidentining “Mahallalarda yoshlar bilan ishlash tizimini tubdan takomillashtirish chora-tadbirlari toʻgʻrisida”gi Qaroriga muvofiq mamlakatimiz ovul, mahalla, shaharchalarida yoshlar yetakchilari faoliyati yoʻlga qoʻyilganligi tufayli yoshlar muammolarini bevosita mahallalarda hal etish, mahalla hududida, taʼlim muassasalarida maʼnaviy-maʼrifiy ishlarni yoʻlga qoʻyish imkoni yaratildi.

Yoshlar yetakchilari zimmasiga hudud yoshlari toʻgʻrisidagi zarur maʼlumotlarni “Yoshlar daftari”, “Yoshlar portali” elektron platformalariga kiritib borish, ular bilan samarali ishlash, boʻsh vaqtini mazmunli tashkil etish, milliy xalq oʻyinlari va sport turlarini yoshlar orasida ommalashtirish, “Besh muhim tashabbus” loyihalari, yoshlar festivallari va boshqa madaniy-maʼrifiy tadbirlarni amalga oshirish vazifalari yuklandi. Yoshlarning ijtimoiy faolligini oshirish, iqtidori, isteʼdodi va tashabbuslarini ragʻbatlantirish hamda hayotda oʻz oʻrinlarini topishiga koʻmaklashish, yoshlarni vatanparvarlik ruhida tarbiyalash, ularning intellektual jihatdan kamol topishini taʼminlash ham shular jumlasiga kiradi.

Yoshlar yetakchilarining bu boradagi saʼy-harakatlarini muvofiqlashtirish, yoshlar masalalari bilan shugʻullanish Qoraqalpogʻiston Respublikasi, viloyatlardagi tuman, shaharlar hokimlari tomonidan amalga oshirilishi belgilangan.

Amudaryo tumanida ham qaror ijrosini taʼminlash borasida izchil saʼy-harakatlar olib borilmoqda. Joriy yilning 15-iyunida Bosuv mahallasida oʻtkazilgan “Hokim va yoshlar” uchrashuvi ham shu maqsadga qaratildi.

Uchrashuv hududdagi 26-sonli maktabning fayzli hovlisida tashkil etildi. Tadbirda tuman hokimi Sultonboy Yoʻldashev, Xalq qabulxonasi mudiri Erkin Rajabov, tuman hokimi oʻrinbosari Mahmud Shermetov, Yoshlar ishlari Agentligi tuman boʻlimi boshligʻi Sardor Ismoilov, Bosuv mahalla fuqarolar yigʻini raisi Erkin Eshmurodov, xotin-qizlar faoli Dilfuza Abdullayeva, hokim yordamchisi Akbarjon Xoʻjamurodov, yoshlar yetakchisi Nigora Bozorboyevalar ishtirok etdilar. Shuningdek, 50 nafardan ortiq mahalla yoshlari, ushbu taʼlim muassasasini bitirib, parvozga shaylanayotgan palaponlar, maktab oʻqituvchilari qatnashdilar.

Uchrashuvni tuman hokimi Sultonboy Yoʻldashev ochdi va yigʻilganlarni Yoshlar oyligi, 30-iyun – Yoshlar kuni bilan qizgʻin qutladi. Yurtimizda yoshlarga yaratilayotgan imkoniyatlar, sharoitlar haqida batafsil gapirdi. Shuningdek taʼlim-tarbiya ishlarini namunali tashkil etib, iqtidorli, ilmga intiluvchi yoshlarni kamolga yetkazayotgan maktab oʻqituvchilar jamoasiga minnatdorlik bildirdi.

Shuningdek, joriy oʻquv yilida maktabni bitirayotgan Nurshoda Saʼdullayeva, Shohida Nurullayevalarni bilim darajasini belgilash uchun test sinovlaridan oʻtib, milliy, xalqaro sertifikatlarni olishga erishganliklari bilan qutlab, ularga va barcha bitiruvchilarga oq yoʻl tiladi.

Shundan soʻng Sultonboy Yoʻldashev mahalla yoshlari bilan yuzma-yuz muloqotga kirishdi. Mahalla yoshlaridan Gʻulomjon Karimov haydovchilik kursida oʻqish badalini toʻlashda, Risgul Bidasheva subsidiya asosida tikuv mashinasi olishda, joriy yilda oliygohni tugatgan Yulduz Karimova ishga joylashishda, Qoraqalpoq Davlat Universiteti 3-bosqich talabasi Muhayyo Mirzayeva oliygoh shartnoma pulini toʻlashda yordam soʻrab murojaat qildilar.

Uchrashuvda yoshlarning murojaatlarini hal etish yuzasidan masʼullarga topshiriq berildi.

Yuzma-yuz samimiy muloqot tarzida oʻtgan uchrashuv Bosuv mahallasi yoshlari hayotida ijobiy oʻzgarishlar yasaydi, albatta.

Oygul RAJABOVA.