“Besh tashabbus olimpiadasi”ning tuman bosqichi gʻoliblari taqdirlandi

Mamlakatimizda alohida iqtidorga ega qobiliyatli yoshlarni qoʻllab-quvvatlash, ularning qiziqish va intilishlarini  ragʻbatlantirish maqsadida Prezidentimiz tashabbusi bilan amalga oshirilayotgan “Besh tashabbus olimpiadasi” doirasida madaniyat, sanʼat, sport, kitobxonlik, axborot texnologiyalari yoʻnalishlari boʻyicha turli xil tanlov va musobaqalar tashkil etilib, mazkur tadbirlarda millionlab yoshlar qamrab olinmoqda. 

Xususan, ushbu tanlovda Amudaryo tumanining turli ovul va mahallalarida istiqomat qiluvchi faol va qobiliyatli yoshlar ham faol  ishtirok etishmoqda. Tanlovlarda eng iqtidorlilar saralanib, keyingi bosqichlarga yoʻllanmani qoʻlga kiritishmoqda.
 21-iyul kuni “Besh tashabbus olimpiadasi”ning tuman bosqichi gʻoliblarini tantanali taqdirlash marosimi boʻlib oʻtdi.

Unda tuman hokimi Sultonboy Yoʻldashev, sektorlar rahbarlari, hokim oʻrinbosari Mahmud Shermetov hamda “Besh tashabbus olimpiadasi”ning 234 nafar tuman bosqichi gʻoliblari, faol yoshlar ishtirok etdilar. Taqdirlash marosimida tuman hokimi Sultonboy Yoʻldashev “Besh tashabbus olimpiadasi” doirasida oʻtkazilayotgan tanlovlar va sport musobaqalarining ahamiyati, yoshlar tarbiyasida tutgan oʻrni haqida toʻxtalib, olimpiadaning tumanda koʻtanrinki ruhda oʻtkazilganini, unda eng iqtidorli yoshlar ishtirok etishganini, yoshlarning ijtimoiy faolligi tobora oshib borayotganini qayd etib oʻtdi. 

Taqdirlash marosimida soʻzga chiqqanlar mamlakatimizda yoshlar uchun yaratilayotgan keng imkoniyatlar, ularning oʻqib bilim olishi, kasb-hunar egallashi uchun yaratilgan shart-sharoitlar xususida aytib oʻtishdi.

Taqdirlash marosimida sportning stol tennis, shashka, Workout, stritbol, yengil atletika, kiber sport, gimnastrada sport turlari va yoshlar raqs festivali tanlovi gʻoliblaridan tashqari,  para stol tennisi, para shaxmat, para yengil atletika, para kiber sport gʻoliblari ham taqdirlandi. 

Aytish kerakki, boʻlib oʻtgan tanlovlarning tuman bosqichi gʻoliblari Baxram Bayjanov, Raʼno Boltaboyeva, Tamara Yusupova, Farida Matrizayeva, Oʻringul Xudaybergenova, Nasiba Yeshchanova Dilfuza Babajanova kabi hakamlar tomonidan adolatli tarzda aniqlandi.

 
Tanlovlarning tuman bosqichida gʻoliblikni qoʻlga kiritgan yoshlar ayni kunlarda hududiy va respublika bosqichlarda ham faol ishtirok etishmoqda. 

Taqdirlash marosimida gʻolib va sovrindor yoshlar tuman hokimi Sultonboy Yoʻldashev va sektorlar rahbarlari tomonidan 1-,2-,3-darajali diplomlar, esdalik sovgʻalari bilan taqdirlanishdi. 

Mazkur musobaqalar yoshlar maʼnaviyatini yuksaltirish, ijtimoiy faolligini oshirish, ularni ilm-fan, sport, sanʼat, madaniyat, kitobxonlik, axborot texnologiyalari sohasiga oshno qilish kabi maqsadlarda oʻtkazilmoqda. 
Kelajagimiz egalarining bilim va salohiyatini rivojlantirish, dunyoqarashlarini kengaytirishga qaratilgan “Besh tashabbus olimpiadasi” doirasidagi tanlovlar va sport musobaqalari, maʼnaviy-maʼrifiy tadbirlar millionlab yoshlarni bir ezgu maqsad – Yangi Oʻzbekistonda yangicha fikrlash, istiqlolni yanada mustahkamlash yoʻlida birlashtirgani bilan muhim ahamiyat kasb etmoqda.

Tuman hokimligining Axborot xizmati