“MAHALLABAY” HUQUQIY TARGʻIBOT TADBIRLARI OʻTKAZILDI

Yurtimizda aholining munosib sharoitlarda mehnat qilishi, yashashi uchun barcha sharoitlar mavjud. Ularning bu imkoniyatlarining qonuniy asosi ham yaratilgan. Kundan kunga obod boʻlib borayotgan hududlardagi koʻrkam hovli- joylar, kishilarning emin-erkin yashayotgani, dasturxoni toʻkinligi farovonlikdan darak beradi. Bularning bari tinchlik-osoyishtalik tufaylidir.

Ha, tinchlik-osoyishtalik bebaho neʼmat. Afsuski, oramizda buningdek dorilomon kunlarning qadriga yetmay, oʻz insoniylik burchini anglamay, turli huquqbuzarliklar, jinoyatlar sodir etishga moyil boʻlib borayotganlar ham uchraydi.

Mavjud holatlar inobatga olingan holda hududlarda sodir etilayotgan huquqbuzarlik, jinoyatchilik soniga qarab, ovul-mahallalar toifaga ajratilib, jinoyatchilik soni oshgan mahallalarda koʻngilsiz hodisalarning oldini olish yuzasidan “mahallabay” ishlash tizimi yoʻlga qoʻyilmoqda.

Amudaryo tumani Adliya boʻlimi xodimlari Qoraqalpogʻiston Respublikasi Adliya vazirligi tomonidan tasdiqlangan reja-grafikka asosan jinoyatlar soni oshgan “qizil” toifadagi hududlar – Mangʻit shahridagi Doʻstlik, Oybek nomli mahallalarda hamda Oʻrta qalʼa va Kuyuk koʻpir ovullarida jinoyatchilikning oldini olishga qaratilgan “mahallabay” huquqiy targʻibot tadbirlarini oʻtkazdilar.

Adliya boʻlimi bosh maslahatchisi Nilufar Jumaniyazova tadbir qatnashchilariga tegishli mahalladagi jinoyatchilik holati, sodir etilayotgan jinoiy va maʼmuriy huquqbuzarliklarning kelib chiqishi, oqibatlari haqida maʼlumotlar berib, oʻylamay qilingan noqonuniy harakatlar kelgusida inson hayotiga salbiy taʼsir etishini batafsil tushuntirdi.

Shuningdek, qonun ustuvorligini taʼminlashda aholi keng qatlamining, ayniqsa yoshlarning oʻrni alohida ekanligiga toʻxtaldi. Qonunlarni, odamlarni mensimaydigan, korruptsiya balosiga berilgan har qanday rahbarga javobgarlik muqarrarligi, mansabdor shaxslarning bevosita xalq oldida masʼul ekanligi va avvalo xalqqa xizmat qilishi lozimligi taʼkidlandi. Shuningdek, davlat organlari byurokratik toʻsiqlarga yoʻl qoʻymay, fuqarolarning murojaatlarini oʻz vaqtida toʻliq koʻrib chiqishi, fuqarolarning huquq va erkinliklarini taʼminlashi shart ekani alohida qayd etildi. Yigʻilish ishtirokchilariga aholining odil sudlovdan foydalanish imkoniyati mavjudligi tushuntirildi, aholiga oʻz huquq va erkinliklarini himoya qilish va roʻyobga chiqarish yoʻlidagi barcha muammolarni qonuniy asosda hal etish kerakligi taʼkidlandi.

Tadbirlarda tuman Adliya boʻlimi yetakchi maslahatchisi Bahrom Sobirov ham soʻzga chiqib, oilaviy nizolarning, xotin-qizlar hamda bolalarga nisbatan tazyiq va zoʻravonlik oʻtkazishning oldini olish, majburiy va barvaqt nikohning huquqiy oqibatlari haqida maʼlumotlar berdi. Yigʻilganlarga tazyiq va zoʻravonlikdan himoyalanishning qonuniy asoslari, oilaviy nizolar vaqtida bolalardan foydalanmaslik xususida tushuntirishlar berildi. Shuningdek, xotin-qizlarning boʻsh vaqtlarini mazmunli va samarali oʻtkazish uchun tashkil qilingan imkoniyatlar toʻgʻrisida batafsil maʼlumotlar berildi.

Tadbirlarda ishtirok etgan fuqarolar huquqshunoslar maʼruzalarini qiziqib tingladilar va huquqiy sohaga oid savollar berib, batafsil javoblar oldilar.

 Oygul RAJABOVA.