MAShAQQATLI MEHNATLAR EʼTIROFI

Fidoyilik! Bu bir qarashda balandparvoz soʻzdek tuyulsa-da, zamirida bir insonning oʻz halovatini oʻylamay qilgan mashaqqatli mehnatlari, ertaga bugungidan ham unumli ishlash, umum manfaatiga hissa qoʻshish yoʻlidagi sof orzulari bor. Chor-atrofimizga nazar solsak, bunday toifa insonlar juda koʻp.

“Taraqqiyot koʻzgusi” gazetasi maxsus muxbiri, el sevgan ijodkor, Qoraqalpogʻistonda xizmat koʻrsatgan jurnalist, Oʻzbekiston Yozuvchilar uyushmasi aʼzosi, qator badiiy, publitsistik asarlar muallifi Robiya Yoʻldoshevani men hech ikkilanmay yurtimiz fidoyilarining biri, degan boʻlardim.

Robiya bilan “Amudaryo haqiqati” (hozirgi “Taraqqiyot koʻzgusi”) gazetasida jurnalistik faoliyatimizni deyarli baravar boshlaganmiz. U paytlarda gazeta haftasiga uch marta yorugʻlikka chiqar, gazeta ijodiy xodimlari, bosmaxona ishchilarining navbatchilari uchun ish to gazeta tayyor boʻlguncha – goh yarim kecha, goh tonggacha davom etardi. Lekin hech kim bundan nolimas, ogʻrinmas, ertalab yana odatdagi ishga shoʻngʻib ketaverardi. Charchoq ham oʻz yoʻliga, gazetaning yangi soniga yorugʻlikka imzo chekkan navbatchining zimmasida shu sonning har bir harfi  uchun masʼuliyat borligini faqat soha xodimlarigina his qiladi. Lekin gazetaning hali siyohi qurib-qurimagan har yangi sonini qoʻlingga olib, koʻzlaring nuri, mashaqqatli mehnating, aziz umring baxshida etilganini his qilishning zavqi boshqacha.

Robiya Yoʻldosheva umrining keyingi qirq yilga yaqin muddatining asosiy qismi “Taraqqiyot koʻzgusi” gazetasida, qaynoq mehnat jarayonida kechdi. Bundan tashqari, “Sogʻindim”, “Amudaryo sabolari” nazmiy toʻplamlarini, “Adashganlar qissasi” qissa va hikoyalar toʻplamini kitobsevar yurtdoshlarimizga taqdim etdi. Shu barobarida uzoq yillar tuman xotin-qizlar qoʻmitasi qoshidagi ijodkor xotin-qizlar bilan ishlash Kengashi raisi sifatida tumanda yashab ijod etayotgan yigirma nafardan ziyod yosh ijodkorlarning kitoblari nashr etilishiga koʻmaklashdi. 2017-yilda “Matbuotga baxshida umr” badiiy publitsistik,  2019-yilda “Ezgulik yoʻlidagi matonat” tarixiy-publitsistik hujjatli qissa kitoblari nashrdan chiqdi.

Kichkinagina jussasida olamcha qudrat yashiringan, hatto yillar ham kuch-gʻayratiga oʻz taʼsirini oʻtkaza olmagan iqtidorli jurnalistni izlasangiz – doimo band holda koʻrasiz. U “Taraqqiyot koʻzgusi” gazetasi tahririyati nashriyoti”da chop etilayotgan turli janrlardagi kitoblarning deyarli barchasiga muharrirlik qilish bilan cheklanmay, oʻzi ham samarali ijod qiladi. Biri badiiy publitsistik, biri – hujjatli qissadan iborat ikki kitobi nashrga tayyorlanmoqda, keyingi yillarda yozilgan, vaqtli matbuotda yoritilgan, yoritilmagan sheʼrlari, hikoyalari bir emas, ikki kitob ham boʻlgulik.

Odam agar oʻz kasbini sevsa, mashaqqatlaridan ham zavq oladi, charchamaydi. Shu bois ham iqtidorli ijodkor, Oʻzbekiston Jurnalistlar ijodiy Uyushmasi aʼzosi Robiya Yoʻldosheva ish faoliyatidagi bunday yuklamalardan ortib, oilasida mehribon ona, tadbirli qaynona, sevimli buvi. Turmush oʻrtogʻi Rajabboy Qodirov bilan ikki oʻgʻil, bir qizni oliy maʼlumotli mutaxassis qilib, el xizmatiga qoʻshdi, kenjatoyi – oliygoh talabasi. Hovlisi atrofini oʻrab turgan mevasi larzon bogʻ, tomorqasi Robiyaning ishdan boʻsh vaqtlarida ishlab (dam olib emas), charchogʻini yozadigan maskani. Erta bahordan eng sara mevalarni, totli pomidor, bodringlarni hamkasblarga ilinib, koʻtarib keladi va bu ishidan oʻzi juda quvonadi.

Tinib-tinchimaydigan, boshqalardan farqli, bir-ikki chaqirim masofaga mashina poylab ham turmay, oʻz taʼbiricha “bir yugurib yetib oladigan”, faollikni hayotiy shioriga aylantirgan Robiya Yoʻldoshevaning hayotida joriy yilning 5-iyulida yana bir quvonchli voqea boʻldi: shu kuni tumanimiz koʻchaboshchilari va faollari bilan uchrashuvi chogʻida Qoraqalpogʻiston Respublikasi Joʻqorgʻi Kengesi raisi Amanbay Orinbayev unga “Vatan fidoyisi” koʻkrak nishonini topshirdi.

Ijodkorga mehnatlari buningdek eʼtirof etilishi ulkan maʼnaviy ragʻbat, ijodiy quvvat baxsh etdi.

Biz hamkasblari oʻz nomimizdan va koʻp sonli gazetxonlar nomidan Robiya Yoʻldoshevani koʻkrak nishon bilan qizgʻin qutlab, yangi ijodiy choʻqqilarni zabt etaverishini tilab qolamiz.

Oygul RAJABOVA.