Xalq qabulxonasi – xalq xizmatida

Oʻzbekiston Respublikasi Prezidenti tashabbusi bilan joylarda tashkil etilgan Xalq qabulxonalari aholi murojaatlari bilan ishlashda rasmiyatchilik, sansolarlik kabi illatlarni bartaraf etishga xizmat qilib, yillar mobaynida fuqarolarni qiynab kelayotgan muammo va kamchiliklarni samarali hal etish imkonini bermoqda.

Shuningdek, Xalq qabulxonalarida fuqarolarning ariza va shikoyati belgilangan tartibda, xolislik tamoyillari asosida koʻrib chiqilib, ijobiy hal etilayotgani mamlakatimizda inson huquq va manfaatlariga oliy qadriyat sifatida qaralayotganining amaldagi ifodasidir.

Respublikamizning barcha tuman va shaharlarida tashkil etilgan Xalq qabulxonalari odamlar ogʻirini yengil qilish, ularning muammolarini hal etishda muhim ahamiyat kasb etayotir. Buni Oʻzbekiston Respublikasi Prezidentining Qoraqalpogʻiston Respublikasi Amudaryo tumanidagi Xalq qabulxonasi faoliyati misolida ham koʻrish mumkin.

Joriy yilning olti oyi mobaynida Oʻzbekiston Respublikasi Prezidentining Virtual qabulxonasiga tuman aholisi tomonidan jami 2 ming 42ta masala boʻyicha murojaatlar kelib tushgan.

Ushbu murojaatlardan 2 ming 7tasi koʻrib chiqilgan boʻlib, 1 ming 638tasi qanoatlantirilgan. Mazkur murojaatlarning 990tasi yaʼni 49,3 foizi ijobiy hal qilingan boʻlib, 633tasiga huquqiy tushuntirishlar berilgan. 15ta murojaat esa uzoq muddatli nazoratga olingan.

Tuman Xalq qabulxonasiga jismoniy va yuridik shaxslardan eng koʻp kelib tushgan murojaatlar ish bilan taʼminlash, sogʻliqni saqlash, moddiy yordam va aliment undirish masalalaridir.

Asosiy maqsadi “Xalq davlat idoralariga emas, davlat idoralari xalqimizga xizmat qilishi kerak”, degan tamoyilni hayotda qaror toptirishdan iborat boʻlgan tuman Xalq qabulxonasi tomonidan aholini qiynayotgan bunday masalalar yechimiga koʻmaklashish maqsadida oʻtgan davr mobaynida tumandagi sektor rahbarlari ishtirokida jami 112 marotaba sayyor qabullar tashkil etildi. Qabullar davomida 651 ta murojaatlar kelib tushgan boʻlib, shundan, 454 ta murojaat ijobiy hal qilingan. 153 tasiga esa huquqiy tushuntirish berilgan.

Murojaatlar bilan ishlash borasida yoʻlga qoʻyilgan tizim, xalq dardini tinglash va koʻtarilgan masalalarni kompleks hal qilish – bugun oʻz samarasini bermoqda. Yana ham ochiqroq aytganda, Xalq qabulxonalariga kelib tushayotgan murojaatlar jamiyatimizda tub islohotlarni amalga oshirish uchun asos vazifasini oʻtamoqda. Va bu – xalq roziligiga erishishning mukammal yoʻli ekanligi amaliyotda oʻz isbotini topdi.

Oʻzbekiston Respublikasi Prezidentining Amudaryo tumanidagi Xalq qabulxonasi ham davlat organlari bilan aholi oʻrtasida ochiq muloqotni yoʻlga qoʻyish, dolzarb muammolarni aniqlash, murojaatlar qonuniy va sifatli koʻrib chiqilishini taʼminlashda alohida oʻrin tutib, aholining eng yaqin koʻmakchisiga aylandi. Mazkur tashkilot xalqimizning hayotdan rozi boʻlishi uchun yanada keng imkoniyat va shart-sharoitlar yaratishga xizmat qilmoqda.

Tuman hokimligining Axborot xizmati.