AMUDARYoDA STOL TENNIS BOʻYIChA QORAQALPOGʻISTON ChEMPIONATI OʻTKAZILDI

Amudaryo tumanida sportning stol tennis turi boʻyicha Qoraqalpogʻiston Respublikasi chempionati boʻlib oʻtdi.

2-4-avgust kunlari davomida tumandagi Ixtisoslashtirilgan maktabning yozgi sport maydonchasida 15 yoshgacha boʻlgan oʻsmirlar oʻrtasida oʻtkazilgan ushbu chempionat musobaqalarida Respublikamizning barcha tumanlaridan kelgan sportchi-yoshlar ishtirok etishdi.

Chempionatning dastlabki kunida boʻlib oʻtgan ochilish marosimida sportchi-yoshlar bilan birga Amudaryo tumani Sport maktabi direktori Chorsham Tajimurodov, sport murabbiylari, tumanlardagi Sport maktablarining stol tennis boʻyicha trenerlari ham qatnashishdi. Ochilish marosimiga bagʻishlangan mazkur tadbirda Sport maktab direktori Chorsham Tajimurodov soʻzga chiqdi va chempionat musobaqasini ochib berdi.

U oʻz soʻzida mazkur chempionatdan koʻzlangan asosiy maqsad, iqtidorli yosh tennischilarni saralash, ularni xalqaro musobaqalarga tayyorlash ekanligini aytib, mamlakatimizda yoshlar oʻrtasida Olimpiya sport turlarini yanada ommalashtirish, jumladan, stol tennisi boʻyicha mahoratli sportchilar kamol topishlari uchun bir qator imkoniyatlar yaratilayotgani haqida toʻxtalib oʻtdi. Chempionat musobaqalarida ishtirok etish uchun kelgan yosh tennischilar orasidan kelgusida Osiyo va Olimpiya oʻyinlarida mamlakatimiz sharafini munosib himoya qiladigan mohir sportchilar yetishib chiqishiga umid bildirib, barchasiga omad tiladi.

Tantanali ochilish marosimidan soʻng, ishtirokchilar qizgʻin bahslarga kirishishdi. Ushbu musobaqalarda 15 ta tumandan tashrif buyurgan 75 nafar oʻgʻil bolalar va 56 nafar qiz bolalar ishtirok etishdi. Tennischilar yakkalik, juftlik va jamoaviy tarzdagi bahslarda oʻzaro raqobatlashdilar. Oʻyin davomida yosh sportchilar chaqqonlik, abjirliklarini koʻrsatib, trenerlardan oʻrgangan stol tennis sirlarini mohirona qoʻllab, gʻolib boʻlishga harakat qildilar. Yosh sportchilarning bu intilishlari besamar ketmadi va chempionat gʻolibligini qoʻlga kiritishga erishishdi.

Yakkalik bahslarida oʻgʻil bolalar oʻrtasida 1-,2-,3-oʻrinlarni Olimpiya va Paralimpiya sport turlari markazi jamoasi qoʻlga kiritdi. Juftlik bahslarida esa Olimpiya va Paralimpiya sport turlari markazi 1-oʻrin sohibi boʻldi. Shuningdek, 2-oʻrin Chimboy tumani, 3-oʻrin Amudaryo tumani yosh sportchilariga nasib qildi. Jamoalar oʻrtasidagi bahslarda 1-oʻrinni Qonlikoʻl tumani, 2-oʻrinni Chimboy tumani, 3-oʻrinni Amudaryo tumani va Ellikqalʼa tumani tennischilari qoʻlga kiritishdi.

Qizlar oʻrtasidagi yakkalik bahslarida 1-,2-,3-oʻrinlarni Olimpiya va Paralimpiya sport turlari markazi tennischilari, juftlik bahslarida 1-oʻrinni nukuslik tennischilar, 2- va 3-oʻrinlarni amudaryolik tennischilar, 3-oʻrinni Taxiatoshlik tennischilar egallashdi. Jamoaviy bahslarda esa 1-oʻrinni Qonlikoʻl tumani, 2-oʻrinni Taxta koʻpir tumani, 3-oʻrinni Taxiatosh tumani, 3-oʻrinni Nukus tumani sportchi yoshlari qoʻlga kiritishga muvaffaq boʻlishdi.

Chempionat yakunida barcha yoʻnalishlar boʻyicha oʻtgan bahslarda gʻolib boʻlgan sportchilarga tashkilotchilar tomonidan diplom, medal va esdalik sovgʻalari, chempionat kubogi tantanali tarzda topshirildi. Musobaqalarda 1-oʻrin gʻolibi boʻlgan yosh tennischilarga sport jamlanmasidan iborat sumkalar sovgʻa qilindi.

Bugungi kunda jismoniy tarbiya va sport bilan shugʻullanish uchun yurtimizda qulay imkoniyatlar yaratilmoqda. Ushbu imkoniyatlardan unumli foydalanayotgan yoshlarimiz esa oʻzlari uchun sevimli boʻlgan sport turlari bilan shugʻullanib, yuksak marralar sari olgʻa bormoqda.

O.Xudoyberganova.