“KEKSALAR SALOMATLIGINI MUHOFAZA QILISh OYLIGI” DOIRASIDA NURONIYLAR TIBBIY KOʻRIKDAN OʻTKAZILDI

Mamlakatimizning barcha hududlaridagi kabi Amudaryo tumanida ham “Keksalar salomatligini muhofaza qilish oyligi” tadbirlari namunali darajada tashkil etilmoqda.

15-avgust kuni tuman Tibbiyot birlashmasining koʻp tarmoqli markaziy poliklinikasida barcha hududlardagi keska otaxon va onaxonlar tibbiy koʻrikdan oʻtkazildi. Ushbu tibbiy koʻrikka oila shifokorlari bilan bir qatorda tor doira mutaxassislari – urolog, oftalmolog, kardiolog, endokrinolog, stomatolog shifokorlar ham faol qatnashishdi. Koʻrik davomida laboratoriya xizmati, EKG, UZI tekshiruvlar ham tashkil qilindi.

Maʼlumki, yurtimizda Oʻzbekiston Respublikasi Prezidentining 2023-yil 11-martdagi “Keksa avlod vakillarini har tomonlama qoʻllab-quvvatlash hamda ularning ijtimoiy faolligini oshirishga doir qoʻshimcha chora-tadbirlari toʻgʻrisida”gi tegishli Qarori, Sogʻliqni saqlash vazirligi va “Nuroniy” jamgʻarmasining shu yil 1-avgustdagi qoʻshma qarorlariga asosan 1-avgustdan 1-sentyabrgacha boʻlgan davr “Keksalar salomatligini muhofaza qilish oyligi” deb belgilangan.

Shunga muvofiq oylik doirasida tumanimizda ham keksalar salomatligini asrash, ularning toʻgʻri ovqatlanishini tashkil etish, nuroniylar oʻrtasida jismoniy tarbiya va sogʻlom turmush tarzini keng targʻib qilish maqsadidagi tadbirlar tashkil etilmoqda. Bu borada tuman Tibbiyot birlashmasi xodimlari bilan hamkorlikda bir qator rejali ishlar amalga oshirilmoqda. Rejaga koʻra, ovul va mahalla fuqarolar yigʻinlarida nuroniylarni yoshi, holatiga qarab, ularning jismoniy tarbiya bilan shugʻullanishiga, faol turmush tarzini yuritishga jalb qilish maqsadida “Salomatlik uchun 5000 qadam” shiori ostida piyoda yurish tadbirlari, sogʻlomlashtirish mashgʻulotlari yoʻlga qoʻyilishi keksalarni faol turmush tarziga keng jalb etishga xizmat qilmoqda. Yakka-yolgʻiz va kasalmand keksalar holidan xabar olinib, muolaja choralari belgilanmoqda. Bu kabi yuksak eʼtibor va gʻamxoʻrlik, yaratilayotgan qulayliklar tumanimizdagi nuroniylarni nihoyatda xursand qilmoqda.

Koʻp tarmoqli markaziy poliklinikada oylik doirasida tashkil etilgan mazkur tibbiy koʻrikda ham tor doiradagi shifokor-mutaxassislar otaxon va onaxonlarning salomatligini tekshiruvdan oʻtkazishdi. Ulardan qon va boshqa tahlil namunalari olindi. Shu kuni uy sharoitida davolanishga muhtoj keksalardan 3 nafarining salomatligi oʻz xonadonlarida tekshirib koʻrildi.

Koʻrikdan oʻtkazilgan 214 nafar keksalar va nuroniylardan 147 nafarida har xil surunkali va oʻtkir kasalliklar aniqlandi. Ulardan 2 nafariga tuman shifoxonasida statsionar, qolgan 145 nafariga shifokorlar tavsiyasiga asosan ambulator va uy sharoitida sogʻlomlashtirish muolajalari tavsiya qilindi. Shuningdek, 3 nafar nuroniyga tish protezi qoʻyib berish rejalashtirildi.

Undan tashqari, koʻrikka tashrif buyurgan keksalarga Tibbiyot birlashmasining salomatlik markazi masʼullari tomonidan toʻgʻri ovqatlanish, sogʻlom turmush tarzini yuritish boʻyicha tavsiya va maslahatlar berildi. Keksalarda sogʻlom va toʻgʻri ovqatlanish, keksalarda jismoniy faollik, kun tartibi, qon bosimini oʻlchash, semizlikning kasallik ekani haqidagi maʼlumotlar, eslatmalar qayd etilgan bukletlar ham tarqatildi.

Keksa avlod vakillarini qoʻllab-quvvatlash, ularga hurmat-ehtirom koʻrsatish maqsadida oylik doirasida tashkil etilgan tibbiy koʻrik uchun barcha nuroniylar oʻz minnatdorchiliklarini bildirishdi. Bu kabi ezgu va xayrli ishlar yurtimiz fayzi boʻlgan piru-badavlat keksalar salomatligini yanada yaxshilashga xizmat qilishi bilan ahamiyatlidir.

Jumaboy Yavkashev, TTB tashkiliy-uslubiy boʻlimi mudiri.