Xalq deputatlari Amudaryo tuman Kengashining navbatdan tashqari 64-sessiyasi toʻgʻrisida axborot

2023-yil 12-sentyabr kuni Amudaryo tumani hokimligining majlislar zalida Xalq deputatlari tuman Kengashining navbatdan tashqari 64-sessiyasi boʻlib oʻtdi.

Sessiyani Xalq deputatlari tuman Kengashi deputati Maqsud Sadullayev ochdi va olib bordi. Sessiya kotibligiga 12-Arnaboʻyi saylov okrugidan deputat Mansur Oʻrazboyev saylandi.

Sessiyada Qoraqalpogʻiston Respublikasi Joʻqorgʻi Kengesi Raisi Amanbay Orinbayev, Joʻqorgʻi Kenges va tuman Kengashi deputatlari, hokim oʻrinbosarlari, hokimlik masʼul xodimlari, boʻlimlar, tashkilotlar rahbarlari, fuqarolar yigʻinlari raislari hamda ommaviy axborot vositalari vakillari ishtirok etdi.

Sessiyada tashkiliy masala – Amudaryo tumani hokimini tayinlash masalasi koʻrildi.

Qoraqalpogʻiston Respublikasi Joʻqorgʻi Kengesining Raisi Amanbay Orinbayev soʻzga chiqib, Amudaryo tumanining iqtisodiy salohiyati ulkan, Qoraqalpogʻistonda tutgan oʻrni alohida ekanligini taʼkidladi. Tuman qishloq xoʻjaligi sohasida nafaqat Qoraqalpogʻistonda, balki Oʻzbekiston miqyosida ham ilgʻorlar qatorida turishi alohida eʼtirof etildi. Keyingi yillarda tumanda aholining turmush darajasini yanada yaxshilash, kambagʻallikni qisqartirish, tadbirkorlikni rivojlantirish, ijtimoiy infratuzilmani yaxshilash boʻyicha qator amaliy ishlar qilinayotgan qayd qilindi.

Deputatlarga “Xoʻjametov Sabir Jabbarberganovichni Amudaryo tumani hokimi vazifasini bajaruvchi etib tayinlash toʻgʻrisida”gi Qoraqalpogʻiston Respublikasi Joʻqorgʻi Kengesi Raisining 2023-yil 12-sentyabr kungi farmoyishi oʻqib eshittirildi.

Xoʻjametov Sabir Jabbarberganovich 1976-yilda Amudaryo tumanida tugʻilgan. Millati – oʻzbek. Maʼlumoti – oliy. 1998-yilda Nukus davlat universitetini tamomlagan. Maʼlumoti boʻyicha mutaxassisligi – olim-agronom.

Mehnat faoliyatini 1998-yilda tumandagi “Toʻlqin” xoʻjaligi biolaboratoriyasi mudiri vazifasida ishlashdan boshlagan. 2002-2004-yillarda “Toʻlqin” muqobil mashina-traktor parki bosh hosiloti, 2004-2007-yillarda tuman Qishloq va suv xoʻjaligi boʻlimi boshligʻi, 2007-2010-yillarda Qoraqalpogʻiston Respublikasi Oʻsimliklarni himoya qilish markazi direktori lavozimlarida ishlagan. 2010-2016-yillarda Qoraqalpogʻiston Respublikasi Qishloq va suv xoʻjaligi vazirining birinchi oʻrinbosari, keyinchalik Qoraqalpogʻiston Respublikasi Qishloq va suv xoʻjaligi vaziri vazifasini vaqtincha bajaruvchi sifatida faoliyat yuritgan.

Sabir Xoʻjametov 2016-2018-yillarda Qoraqalpogʻiston Respublikasi Vazirlar Kengashi Raisining qishloq va suv xoʻjaligi masalalari boʻyicha oʻrinbosari, keyinchalik Qishloq va suv xoʻjaligi vaziri lavozimlarida ishlagan. 2018-2021-yillarda faoliyatini Qoraqalpogʻiston Respublikasi Vazirlar Kengashi Raisining qishloq va suv xoʻjaligi masalalari boʻyicha oʻrinbosari vazifasida davom ettirgan. 2023-yildan boshlab esa Qoraqalpogʻiston Respublikasi Joʻqorgʻi Kengesining Agrar, suv xoʻjaligi, tabiatni muhofaza qilish va ekologiya masalalari qoʻmitasida faoliyat yuritib kelayotgan edi.

Kun tartibidagi masala yuzasidan Qoraqalpogʻiston Respublikasi Vazirlar Kengashi Raisining oʻrinbosari – Oila va xotin-qizlar qoʻmitasi raisi, tuman Kengashi deputati Maryam Ahmedova, tuman Kengashi deputati Bahromboy Qodirov, mehnat faxriysi Bekman Allamberganovlar soʻzga chiqib, nomzod haqida oʻz fikrlarini bildirdilar va uning kelgusi ishlariga omad tiladilar.

Kun tartibidagi masala boʻyicha tuman Kengashining tegishli qarori qabul qilindi. Shuning bilan sessiya oʻz ishini yakunladi.

Tuman hokimligining Axborot xizmati