BOGʻChA TARBIYaLANUVChILARIGA YoNGʻINDAN SAQLANISh QOIDALARI OʻRGATILDI
Keksalarning “oʻt balosidan, suv balosidan asragay” deya duo qilishlari bejiz emas. Sababi tilsiz yov – yongʻinlarning har yili qanchadan-qancha davlat va shaxsiy mulklarga ziyon yetkazib, ulkan-ulkan bozorlar rastalari yonib ketayotgani barchaga ayon.
Buningdek koʻngilsizliklarning oldini olish maqsadida joriy yilning 4-avgustida hukumatimizning “Yongʻinlar profilaktikasi samaradorligini oshirish va yongʻin xavfsizligi sohasida davlat nazoratini takomillashtirish chora-tadbirlari toʻgʻrisida”gi Qarori qabul qilindi. Ushbu hujjatga koʻra, 2023-yil 1-sentyabrdan muntazam ravishda “Yongʻindan ogohlik” umummilliy kampaniyasi amalga oshiriladi.
Unda taʼlim tashkilotlarida yongʻinlarning oldini olish va yongʻin sodir boʻlgan vaziyatda harakat qilish boʻyicha batafsil uslubiy mashgʻulotlar oʻtkazish, davlat tashkilotlari, tadbirkorlik subʼektlari va boshqa tashkilotlar ish joylarida yongʻin xavfsizligi boʻyicha oʻqitishni tashkil etish, jamoat joylarida, taʼlim tashkilotlarida, ish joylarida va turar joy komplekslarida oʻt oʻchirish boʻyicha amaliy mashgʻulotlar oʻktazish orqali aholining, yoshlarning, bolalarning yongʻindan saqlanish borasida bilim va koʻnikmalarini shakllantirish maqsad qilingan.
Joriy yilning 1-sentyabridan Respublikamizning barcha hududlarida keng jamoatchilik jalb qilingan holda “Yongʻindan ogohlik” umummilliy kampaniyasini amalga oshirish chora-tadbirlari boshlanib ketdi.
Amudaryo tumanida ham maktabgacha va maktab taʼlimi muassasalarida, korxona, tashkilotlarda yongʻindan saqlanish qoidalari keng targʻib qilinayotir, yongʻinlarning oldini olishga hamma va har bir odam masʼul ekanligi, yongʻin xavfining oldini olishga beparvolik qilish ogʻir oqibatlarga olib kelishi aholiga keng tushuntirilmoqda. Shuningdek, kuz-qish mavsumi oldidan xonadonlarda elektr va tabiiy gazdan foydalanishda ishlatiladigan uskunalarning sozligini nazoratdan oʻtkazish lozimligi, aniqlangan kamchiliklarni tezkor bartaraf etish kerakligi targʻib etilmoqda.
“Yongʻindan ogohlik” umummilliy kampaniyasida belgilangan vazifalar doirasida yaqinda tuman Favqulodda vaziyatlar boʻlimi xodimlari tomonidan 6-sonli Maktabgacha taʼlim tashkilotida tarbiyalanuvchilarga yongʻin xavfsizligi qoidalariga rioya etish boʻyicha profilaktik tadbir oʻtkazildi.
Tadbirda ushbu tashkilot xodimlari, tarbiyalanuvchilari ishtirok etdi. Ularga tuman Favqulodda vaziyatlar boʻlimining Profilaktika va nazorat boʻlinmasi inspektori Sherbek Erkinboyev, ushbu boʻlinma kichik inspektori Ikrom Bekmurzayevlar yongʻindan saqlanish, ochiq olov bilan oʻynamaslik, elektr, tabiiy gaz uskunalariga teginmaslik lozimligini tushuntirdilar. Shuningdek, bolajonlarga yongʻin va uning salbiy oqibatlari aks etgan rasmlar namoyish etildi va ularga ushbu rasmlarni boʻyash topshirildi. Ushbu mashgʻulot davomida kichkintoylarning yongʻin oqibatlaridan juda taʼsirlangani, buni buyoqlarda aks ettirishga intilishi yaqqol namoyon boʻldi.
Tadbir oxirida tashkilot tarbiyachilari, murabbiylari va tarbiyalanuvchilari ishtirokida yongʻin hodisasi sodir boʻlganda toʻgʻri harakat qilish va xavfsiz hududga chiqish boʻyicha amaliy mashgʻulot oʻtkazilib, bolajonlarning mavzu doirasida olgan bilimlari mustahkamlandi.
Buningdek profilaktik tadbirlar tumanimizning barcha hududlarida muntazam oʻtkazib boriladi.
Oygul RAJABOVA
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
