Yosh avlod tarbiyasi ishonchli qoʻllarda

Amudaryo tumanida faoliyat yuritayotgan maktabgacha taʼlim tashkilotlari orasida 7-sonli maktabgacha taʼlim tashkilotining oʻz oʻrni bor. Boisi, bu maskanning koʻp yillik shonli yoʻli va ana shu yoʻlni bosib oʻtib, hayotda oʻz oʻrnini topgan bir qator “qaldirgʻoch”lari bor.

Barno Xudoyberganova rahbarlik qilayotgan ushbu maktabgacha taʼlim tashkiloti tuman hokimining 2010-yil 19-yanvardagi 22-sonli qarori asosida tashkil qilingan.

Mazkur muassasa binosi 2018-yilda tubdan qayta rekonstruktsiya qilindi. Maxsus loyiha asosida 70-oʻringa moʻljallab qurilgan va 2019-yil fevral oyida qayta ishga tushirilgan muassasa binosi 2 qavatdan iborat.

Tashkilot tarbiyalanuvchilarining – oʻsib kelayotgan bolajonlarning toza havodan nafas olishlari hamda bu yerga tashrif buyuruvchilarga estetik zavq ulashish maqsadida binoning tevarak-atrofida turli xil manzarali daraxtlar ekilgan. Muntazam ravishda obodonlashtirish, koʻkalamzorlashtirish ishlari olib boriladi. Bundan tashqari, kichkintoylarning qish faslida issiq va shinam xonalarda tarbiya olishlari, mashgʻulotlarni oʻtashlari uchun isitish tizimi sifatli qilib oʻrnatilgan.

Aytish joizki, oldingi maktabgacha taʼlim tizimi bilan bugungi tizimni solishtiradigan boʻlsak, bir-biridan tubdan farq qiladi. Endilikda ota-onalar farzandini bogʻchaga berishlari uchun oylab navbat kutmaydi. Idorama-idora yurib sarson boʻlmaydi. Bu esa yurtimizda yosh avlodning taʼlim-tarbiyasiga va kelajagiga boʻlgan eʼtiborning yorqin namunasi ekani shubhasiz.

Bolajonlarning ikkinchi uyiga aylangan ushbu maskanning bagʻri keng, hozirgi kunda tashkilotda roʻyxat boʻyicha 240 nafar bola, 3 ta asosiy guruhning har birida 30 nafardan jami 90 nafar, shuningdek, 4 ta qisqa muddatli guruhda 80 nafar bola, 2 ta majburiy guruhda esa 50 nafar kelajagimiz egalari tarbiyalanmoqda.

Suvni qanday shakldagi idishga solsangiz suv oʻsha idishning shaklini oladi. Niholning kelajagi esa, shubhasiz, uni tarbiyalayotgan bogʻbonga bogʻliq. Bugun Amudaryo tumanidagi 7-sonli MTTda farzandi tarbiyalanayotgan ota-onalarning farzandi tarbiyasidan koʻngli toʻq, sababi ular ishonchli qoʻllarda.

Tashkilotda hozirda jami 25 nafar xodim faoliyat yuritadi. Shulardan 13 nafari tarbiyachi va 9 nafari yordamchi tarbiyachilardir.

Maktabgacha taʼlim tashkiloti tumandagi eng namunali tashkilotlardan biri hisoblanadi. Zamonaviy uslubda qurilgan bino loyiha boʻyicha 3ta guruhga moʻljallangan. Undan tashqari, oshxona, tibbiy xizmat boʻlimi, omborxona, musiqa va sport xonalari, bolalar maydonchalari va ayvonchalar mavjud.

Bogʻcha inson kamoloti yoʻlida bunyod boʻlajak qoʻrgʻonning katta hayotga qoʻyiladigan mustahkam poydevordir. Shu sabab u yerdagi taʼlim-tarbiyadan tashqari, yaratilgan shart-sharoitlar ham bolaning kelajagini belgilab beradi.

Tashkilot Maktabgacha va maktab taʼlimi vazirligining maxsus qarori asosida zamonaviy mebel jihozlari, televizor bilan jihozlangan. Guruhlarda 5ta rivojlantiruvchi markazlar hamda “Maʼnaviyat” va “Sport” burchaklari tashkil qilingan. Shuningdek, 2022-2023 oʻquv yili davomida asosiy yil vazifalarini bajarish maqsadida maktabgacha yoshdagi bolalarga taʼlim va tarbiya berish, sogʻlomlashtirish, pedagoglarning bola tarbiyasidagi bilimlarini kengaytirish va salohiyatlarini oshirish maqsadida koʻpgina ijobiy ishlar olib borilmoqda.

Masʼuliyat bor joyda ishning unumi boʻladi. Tajriba bor joyda esa ishning sifati yaxshilanadi. Agarda unga bolafeʼllik, xushmuomalalik kabi goʻzal fazilatlar ergashsa nur ustiga aʼlo nur. Kichkintoylarga ana shunday sifatlarga ega xodimlar tarbiya berayotgan ushbu dargohdan kelajakda komil insonlar yetishib chiqishiga umid bogʻlagimiz keladi.

Aziza Madrahimova