DOʻSTLIK MFYDA “OBOD VA XAVFSIZ MAHALLA” TAMOYILI ASOSIDA MUSOBAQALAR OʻTKAZILDI

Mamlakatimizda “Obod va xavfsiz mahalla” tamoyili asosida har bir mahallada fuqarolarning osoyishtaligini taʼminlash, ularning tinch va osoyishta, hayotdan rozi yashashlari uchun xavfsiz muhit yaratish mexanizmlarini ishlab chiqish, xususan, Prezidentimizning besh muhim tashabbusini yoshlar hayotiga izchil tatbiq etish maqsadida amalga oshirilayotgan maʼnaviy-maʼrifiy chora-tadbirlar oʻzining ijobiy samarasini bermoqda. Ayniqsa, mahallalarda hamkor tashkilotlar tomonidan oʻtkazilayotgan “Uch avlod uchrashuvi”, “Besh tashabbus olimpiadasi”, “Zakovat” intellektual oʻyinlari, har xil yoʻnalishlardagi sport-sogʻlomlashtirish tadbirlariga turli toifadagi yoshlarning keng qamrab olinayotgani yoshlar maʼnaviyatini yuksaltirishdagi ahamiyati bilan xalqimizga manzur boʻlmoqda.

Qoraqalpogʻiston Respublikasi Vazirlar Kengashi, Qoraqalpogʻiston Respublikasi Prokuraturasi, Ichki ishlar Vazirligi, milliy gvardiya Qoraqalpogʻiston Respublikasi boshqarmasining Respublika hududidagi barcha mahallalarda xavfsiz muhitni yaratish mexanizmlarini ishlab chiqish va uni mahallalar hayotiga keng joriy etish boʻyicha targʻibot ishlarini oʻtkazish haqidagi qoʻshma qarori ijrosini taʼminlash borasidagi tadbirlar ham joylarda tobora ommalashib, koʻplab yoshlarni qamrab olmoqda.

Amudaryo tumanining Doʻstlik mahallasi hududidagi 2-sonli Amudaryo kasb-hunar maktabida mahalla yoshlari oʻrtasida boʻlib oʻtgan “Zakovat” intellektual oʻyini, shuningdek shaxmat musobaqasi, mahallaning sportsevar yoshlari hamda uyushmagan yoshlar oʻrtasida mahalla birinchiligi uchun oʻtkazilgan minifutbol musobaqalari ham oʻsib kelayotgan yosh avlodni har tomonlama yetuk, zakovatli, tafakkur dunyosi keng insonlar qilib tarbiyalash borasidagi ahamiyati bilan koʻpchilikka manzur boʻldi.

Qoraqalpogʻiston Respublikasi Ichki ishlar vazirligi tezkor qidiruv xizmati boshligʻi Umida Qurbonboyeva, Amudaryo tumani Ichki ishlar boʻlimi boshligʻining oʻrinbosarlari Zamir Safarboyev, Sharapat Joldasboyev va Doʻstlik MFY masʼullari hamkorligida tashkillashtirilgan mazkur musobaqalarda 2-sonli kasb-hunar maktabi oʻquvchi-yoshlari ishtirokidagi “Zakovat” intellektual oʻyini oʻzining jozibadorligi, iqtidorli yoshlarning oʻz qobiliyatlarini amalda namoyon etish imkoniyati yaratilgani bois, barchaga biri-biridan hayajonli daqiqalarni hadya etdi. Oʻquvchi-yoshlar “Zakovat” intellektual oʻyini orqali oʻzlarining tafakkur dunyosini yanada boyitdilar, shu bilan birga yangi-yangi gʻoyalar ustida ishlash insonga nafaqat bilim, balki maʼnaviy yetuklik sari intilib yashashda kuch ham berishini anglab yetdilar.

Musobaqaning keyingi davrasi shaxmat musobaqalari bilan yanada qiziqarli taassurotlarga boy boʻldi. Aql gimnastikasi musobaqalarida aqlan yetuklik sari intilayotgan yoshlar oʻz bilim va salohiyatlarini namoyon etishib, mahalladoshlarining olqishlariga sazovor boʻldilar.

Shu kuni Doʻstlik mahallasi yoshlari va uyushmagan yoshlar oʻrtasida sportning minifutbol turi boʻyicha musobaqalar ham oʻtkazildi.

Mahalla birinchiligi uchun oʻtkazilgan minifutbol musobaqalarida oʻzaro kuch sinashgan jamoalar gʻoliblik uchun hamjihatlik bilan chiroyli oʻyin oʻtkazishib, musobaqa hakamlari va mahalladoshlari olqishiga sazovor boʻldilar.

Musobaqalar yakunida “Zakovat” intillektual oʻyini, shaxmat va minifutbol musobaqalarining gʻoliblari tashkilotchilar tomonidan Diplom va esdalik sovgʻalari bilan taqdirlandilar.

Robiya YOʻLDOShEVA