“BESh MUHIM TAShABBUS – YoShLARGA QANOT” GRANT LOYIHASI DOIRASIDA “KITOBLAR KARVONI” TADBIRI TAShKIL ETILDI

Mamlakatimizda yoshlar maʼnaviyatini yuksaltirish, ularning alohida iqtidor va qobiliyatlarini yuzaga chiqarish maqsadida Prezidentimiz belgilab bergan besh muhim tashabbus doirasida oʻtkazilayotgan tadbirlar tobora keng qamrov kasb etmoqda. Ayniqsa, nogironligi boʻlgan yoshlarning ijtimoiy faolligini oshirishga qaratilgan turli xil mavzulardagi koʻngilochar tadbirlar, uchrashuvlar, ijodiy koʻrik-tanlovlar, kitobxonlik kechalari joylarda koʻtarinki ruhda oʻtkazilmoqda. “Mening oilam” gazetasi tahririyati tomonidan oʻtkazilayotgan “Besh muhim tashabbus – yoshlarga qanot” mavzusidagi grant-loyihasi doirasidagi nogironligi boʻlgan yoshlarni qoʻllib-quvvatlash, yoshlar orasida “besh tashabbus” tamoyillarini keng joriy etish va ularni ijtimoiy-maʼnaviy yuksaltirishga xizmat qiluvchi tadbirlar oʻzining mazmun-mohiyati bilan muhim ahamiyat kasb etmoqda.

Ana shunday tadbirlardan biri joriy yilning 11-oktyabr sanasida Amudaryo tumani Maktabgacha va maktab taʼlimi boʻlimi tasarrufidagi 31-sonli maktabda ham oʻtkazildi.

“Besh muhim tashabbus – yoshlarga qanot” va “Besh tashabbus – besh imkoniyat” mavzularidagi grant loyihasi doirasida “Jayxun ilhomlari” NNT va “Mening oilam” gazetasi tahririyati ijodiy jamoasi hamkorligida tashkillashtirilgan “Kitoblar karvoni” maʼnaviy-maʼrifiy tadbirida 31-sonli maktab oʻqituvchilari, kitobxon oʻquvchi-yoshlar ishtirok etdilar.

Tadbirni maktab direktorining maʼnaviy-maʼrifiy ishlar boʻyicha oʻrinbosari Dilbar Oʻrozaliyeva ochdi va “Kitoblar karvoni” tadbirini tashkil etib, oʻquvchi-yoshlarga maʼnaviy oziq ulashishni niyat qilgan loyiha ijodkorlariga minnatdorchilik bildirdi.

Mazkur taʼlim muassasasida ayni paytda 482 nafar oʻquvchi zamon talablari darajasida taʼlim-tarbiya olishadi. maktabda 1150ta kitob jamgʻarmasiga ega kutubxona mavjud boʻlib, oʻquvchilarning oʻzlari qiziqqan yoʻnalishlar boʻyicha qoʻshimcha ilmiy-nazariy va badiiy adabiyotlarni tanlab oʻqishlarida 61 nafar pedagoglar jamoasi hamisha bosh-qosh, yaqin maslahatgoʻy.

“Kitoblar karvoni” tadbirida “Besh muhim tashabbus – yoshlarga qanot” grant loyihasi ijodkorlaridan biri Robiya Yoʻldosheva yoshlar kitobxonligini rivojlantirish maqsadida “Mening oilam” gazetasi tahririyati tomonidan amalga oshirilayotgan keng qamrovli ishlar xususida batafsil toʻxtaldi. Shu bilan birga kitob mutolaasining yoshlar kamolotidagi oʻrni haqida soʻz yuritib, “Jayxun ilhomlari” NNT kutubxonasining boy kitob jamgʻarmasi, hozirgi zamon oʻzbek adabiyoti va mumtoz adabiyot namoyondalarining mashhur asarlaridan iqtiboslar keltirib, yoshlarni kitob oʻqishga, shu orqali maʼnaviy yetuklikka davʼat etdi.

Tadbir davomida “Kitoblar karvoni” tadbirining hamkori, “Besh tashabbus – besh imkoniyat” loyihasi koordinatori, “Jayxun ilhomlari” NNT raisi Oʻzbekiston jurnalistlari ijodiy uyushmasi aʼzosi, shoir Oʻrozali Reyimov yangi kitoblar koʻrgazmasini tashkil etdi va mustaqillik yillarida oʻzbek yozuvchi va shoirlari ijod qilgan asarlar taqdimotini oʻtkazdi. Oʻquvchi-yoshlar yangi asarlar taqdimotida katta qiziqish bilan ishtirok etdilar. Shu bilan birgalikda “Jayxun ilhomlari” NNT kutubxonasiga aʼzo boʻlish istagini bildirdilar.

Yangi kitoblar bilan tanishish orqali qalblarida ushbu asarlarni mutolaa qilish istagi uygʻongan oʻquvchi-yoshlar oʻzlari oʻqigan badiiy asarlar haqida bir-biri bilan fikr almashdilar, oʻqigan kitoblaridan olgan taassurotlari haqida soʻzlab berdilar, taniqli shoirlarning sheʼrlarini yoddan, ifodali aytishib, tadbir ishtirokchilarini xursand qildilar.

Robiya YOʻLDOShEVA