AMUDARYoDA A.HAITOV IShTIROKIDA KUZGI EKINLARNI TOʻQSONBOSTI USULIDA EKISh BOʻYIChA KOʻRGAZMALI SEMINAR OʻTKAZILDI

Amudaryo tumaniga Oʻzbekiston Fermer, dehqon xoʻjaliklari va tomorqa yer egalari Kengashi raisi Aktam Haitov tashrif buyurib, tuman hududidagi fermer xoʻjaliklari dalalarida kuzgi ekinlarni toʻqsonbosti usulida ekish boʻyicha amalga oshirilayotgan ishlar bilan yaqindan tanishdi.

19-oktyabr kuni Toʻlqin ovulidagi “Ilhom Matluba” fermer xoʻjaligi dalasida koʻrgazmali seminar tashkil etildi. Seminarga tashrif buyurganlar ushbu xoʻjalikda ajratilgan 3 gektar dalada ekilgan toʻqsonbosti ekinlarining parvarishi bilan qiziqdi.

Seminarda Aktam Haitov toʻqsonbosti ekinlarni parvarishlash boʻyicha maslahat va tavsiyalar berib oʻtdi. Shuningdek, mamlakatimiz aholisining ertangi sabzavot mahsulotlariga boʻlgan talabini toʻliq qondirish maqsadida hosildan boʻshagan maydonlarga sovuqqa chidamli ekinlardan piyoz, sarimsoqpiyoz hamda noyabr-dekabr oylarida esa sabzi, osh lavlagi, koʻkatlar, rediska va karam kabilarni toʻqsonbosti usulida ekib, yetishtirish muhim ahamiyatga egaligini taʼkidladi. Undan tashqari, oziq-ovqat xavfsizligini taʼminlash uchun hozirdan harakat qilish kerakligini aytib, toʻqsonbosti ekinlarini oʻz vaqtida ekish, agrotexnik tadbirlarni amalga oshirish yuzasidan tegishli koʻrsatmalar berdi.

Taʼkidlash joizki, tumanda joriy yilda 2024-yil hosili uchun piyoz va sarimsoq piyoz ekinlarini toʻqsonbosti usulida ekish rejasi fermer xoʻjaliklari tomonidan 110 gektar, dehqon xoʻjaliklari tomonidan 766 gektar, tomorqa yer egalari tomonidan 876 gektar qilib belgilangan. Bugungi kunda tumanimizning barcha hududlaridagi xoʻjaliklar dalalarida ekinlarni mazkur usulda ekish ishlari yakuniga yetib bormoqda.

Seminar ishtirokchilari ovuli hududidagi fermer xoʻjaliklari tomonidan toʻqsonbosti usulida ekilgan ekinlar hamda “Yashil makon” umummilliy loyihasi doirasida dala chetlarida amalga oshirilayotgan koʻchat ekish ishlari bilan yaqindan tanishdilar. Ishtirokchilar ushbu hududlarda yetishtirlayotgan iqlimga mos boʻlgan manzarali va mevali daraxtlar koʻchatlarini parvarishlash boʻyicha tajriba oʻrganib, oʻz fikrlarini bildirib oʻtdilar.

Shundan soʻng, Aktam Haitov Choykoʻl ovuli hududidan oʻtuvchi katta Qipchoq yoʻli boʻyida “Yashil makon” umummilliy loyihasi doirasida tumandagi 49ta mahalla fuqarolar yigʻinlari beshligi ishtirokida oʻtkazilayotgan koʻchat ekish ishlarida ham qatnashdi.

Seminar Arnaboʻyi mahallasi hududidagi “Kamalov Gulmirza” fermer xoʻjaligi dalalarida davom ettirildi. Ushbu xoʻjalikda dala chetlarida shpaller usulida uzum ekilgan. Shuningdek, hududdagi 5 gektar dalada 30ta fermer xoʻjaliklari birlashgan holda toʻqsonbosti ekinlarini ekib parvarish qilishmoqda. Ushbu ishlarni koʻzdan kechirgan seminar ishtirokchilari, qishloq xoʻjaligi xodimlari, tajribali dehqonlar toʻqsonbosti ekinlarini ekish ishlarini tizimli tashkil qilish va mahsulot yetishtirish hajmlarini oshirish boʻyicha fikr almashishdi.

Tadbir ishtirokchilari Kuyuk koʻpir ovuli hududidagi “Oʻrozaliyev Xoʻjaahmed” hamda Namuna mahallasi hududida “Muzaffar Yeshchanov” fermer xoʻjaliklari dalalarda jadal davom etayotgan ekinlarni toʻqsonbosti usulida ekish ishlari bilan ham yaqindan tanishdilar.

Tuman hududi boʻylab Oʻzbekiston Fermer, dehqon xoʻjaliklari va tomorqa yer egalari Kengashi raisi Aktam Haitov ishtirokida boʻlib oʻtgan mazkur seminarlarda dehqonchilikning toʻqsonbosti usuli yaxshigina daromad manbai boʻlish bilan birga, aholining ertaki sabzavot mahsulotlariga boʻlgan talabini qondirish imkonini berishi alohida taʼkidlandi. Shu sababli agrotexnik tadbirlarni oʻz vaqtida oʻtkazishni taʼminlash masalalarga jiddiy eʼtibor qaratish lozimligi aytilib, tumanda toʻqsonbosti ekinlarni yetishtirish hajmini oshirish boʻyicha tavsiyalar, zarur maslahatlar berildi.

O.Xudoyberganova.