FERMER XOʻJALIGI BOShLIGʻINI OʻZGARTIRISh VA RASMIYLAShTIRISh TARTIB-QOIDALARI XUSUSIDA DAVRA SUHBATI OʻTKAZILDI

Amudaryo tumani Adliya boʻlimi Davlat xizmatlari markazi xodimlari tomonidan aholi va tadbirkorlarning huquqiy savodxonligini oshirish, mamlakatimizda tadbirkorlar uchun yaratilayotgan imkoniyatlar, soliq toʻlovlari boʻyicha yengilliklar, shuningdek, fermer xoʻjaliklari va boshqa tadbirkorlik subʼektlarining rasmiy hujjatlarini yuritish tartib-qoidalari yuzasidan tadbirkorlar ishtirokidagi davra suhbatlari, ochiq va samimiy muloqot tadbirlari oʻtkazilib kelinmoqda.

Joriy yilning 7-noyabr sanasida Amudaryo tumani Adliya boʻlimi davlat xizmatlari markazi binosida “Tadbirkorlarga huquqiy maslahat” doirasida oʻtkazilgan davra suhbatida ham aynan ana shu mazmundagi masalalar boʻyicha tadbirkorlarga keng tushuncha va tavsiyalar berildi.

Davra suhbatida Amudaryo tuman hokimligi mutaxassislari, fermer xoʻjaliklari rahbarlari, tuman fermer, dehqon va tomorqa xoʻjaliklari Kengashi masʼullari hamda Adliya boʻlimi DXM yetakchi mutaxassislari ishtirok etishdi.

Oʻzbekiston Respublikasi Adliya vazirligi tomonidan ishlab chiqilib, amaliyotga tatbiq etilgan ilmiy-nazariy va uslubiy qoʻllanmalarning mazmun-mohiyati yuzasidan tushunchalar berish va amaliyotda qoʻllash boʻyicha belgilangan rejaga muvofiq oʻtkazilgan mazkur davra suhbatida “Fermer xoʻjaligining boshligʻini oʻzgartirish va rasmiylashtirish tartibi” toʻgʻrisida soha masʼullari tomonidan zarur tushuntirishlar olib borildi. Unda Amudaryo tuman Adliya boʻlimi DXM yetakchi mutaxassisi Husniddin Ibodullayev davra suhbati ishtirokchilariga fermer xoʻjaligining boshligʻini oʻzgartirish asoslari, talablari va shartlari boʻyicha batafsil maʼlumotlar berdi.

Xususan, fermer xoʻjaligining boshligʻi vafot etganligi munosabati bilan yer ijara shartnomasiga oʻzgartirish kiritish boʻyicha tuman hokimligiga beriladigan ariza namunasi, yer ijara shartnomasiga oʻzgartirish kiritish boʻyicha kelishuvning namunaviy loyihasi, fermer xoʻjaligining boshligʻi almashganligi munosabati bilan yer ijara shartnomasiga oʻzgartirish kiritish boʻyicha tuman hokimligiga beriladigan ariza namunasi, yer ijara shartnomasiga oʻzgartirish kiritish boʻyicha uch tomonlama kelishuvning namunaviy loyihalari koʻrsatib berildi.

Shuningdek, Husniddin Ibodullayev fermer xoʻjaligining boshligʻini oʻzgartirish – bu majburiyat emas, balki bevosita fermer xoʻjaligining boshligʻi va fermer xoʻjaligini boshqarishni oʻz zimmasiga olayotgan oila aʼzolaridan birining huquqi ekanligini misollar orqali tushuntirib, bu boradagi zaruriy hujjatlar haqida tavsiyalar berdi.

Davra suhbati davomida masʼullar tomonidan “Fermer xoʻjaligi toʻgʻrisida”gi Oʻzbekiston Respublikasi Qonunining tegishli moddalari xususida ham ishtirokchilarga zarur tushunchalar berildi. Yaʼni, Oʻzbekiston Respublikasi “Fermer xoʻjaligi toʻgʻrisida”gi Qonunning 13-moddasiga koʻra, fermer xoʻjaligi boshligʻi vafot etgan taqdirda, yer uchastkasini ijaraga olish huquqi qonunchilikka muvofiq ijaraga olish shartnomasining amal qilish muddatiga meros boʻyicha oʻtishi va bu tegishli tartibda rasmiylashtirilishi, shuningdek, mazkur 13-moddaga muvofiq, yer uchastkasini fermerlik faoliyati bilan shugʻullanish uchun ijaraga olish huquqini yer ijara shartnomasiga oʻzgartirishlar kiritish orqali oʻz oila aʼzolaridan biriga yer ijara shartnomasi amal qiladigan muddatga berish uchun asos boʻladigan holatlar, xususan, pensiya yoshiga toʻlganligi, mehnat qobiliyatini yoʻqotganligi, muddatli harbiy xizmatga chaqirilganligi, oliy taʼlim muassasalariga kunduzgi oʻqishga qabul qilinganligi, saylab qoʻyiladigan lavozimlarga saylanganligi kabi holatlardan biri yuz berganda fermer xoʻjaligi boshligʻi xohishiga koʻra, oila aʼzolaridan biriga fermer xoʻjaligi boshligʻi vazifasini oʻtkazishi mumkinligi boʻyicha kerakli maʼlumotlar taqdim etildi.

Robiya YOʻLDOShEVA.