OʻQUVChILAR OʻRTASIDA SPORT SINOVLARI OʻTKAZILDI

Mamlakatimizda jismoniy tarbiya va sportni yanada rivojlantirish hamda ommaviy harakatga aylantirish, aholining jismoniy qobiliyatini aniqlash va ragʻbatlantirish, sogʻlom turmush tarzi koʻnikmalarini shakllantirish maqsadida Prezident Qaroriga koʻra 2021-yil 1-avgustdan boshlab aholining jismoniy tayyorgarlik darajasini baholash tizimi joriy etilgan edi.

Aholining barcha qatlamlari oʻrtasida jismoniy tarbiya va sportni ommalashtirish orqali ularning jismoniy qobiliyati va harakat faolligini takomillashtirishda hamda zararli odatlardan himoya qilishda, ushbu qaror muhim ahamiyatga ega. Yoshlarda iroda, oʻz kuchi va imkoniyatlariga ishonch kabi fazilatlarni mustahkamlash, ularda mardlik, jasorat, Vatanga muhabbat tuygʻularini shakllantirishga qaratilgan bu chora-tadbirlar, yaʼni baholash tizimi boʻyicha sport sinovlari maxsus va ixtiyoriy ravishda aholining yetti yoshdan yetmish yoshgacha boʻlgan qatlami va undan kattalarning jismoniy tayyorgarligini aniqlaydi.

Sport sinovlari pogʻona va murakkablik darajasidan kelib chiqib, 15 turdagi mashqlardan iborat boʻladi. Ular uzoq va qisqa masofalarga yugurish, suzish, turnikda tortilish, anjomlarni uloqtirish va boshqalarni oʻz ichiga oladi.

Aholining jismoniy tayyorgarlik darajasini baholash tizimi boʻyicha sport sinovlarini oʻtkazish tadbirlari Amudaryo tumanida ham olib borilayapti.

17-noyabr kuni tumandagi 33- va 40-sonli maktablarining 9-, 11-sinflari oʻquvchilari orasida yosh toifalariga qarab, 7 xil mashqlarni bajarish boʻyicha ana shunday sinovlar oʻtkazildi. Tadbirlar tuman sport maktab trenerlari tomonidan belgilangan mezonlar asosida oʻtkazildi. Sport sinovlarini namunali oʻtkazishda mazkur maktablarning jismoniy tarbiya oʻqituvchilari ham faollik bilan harakat qildilar.

Sport sinovlari davomida oʻquvchilar belgilangan sport normativlarini qunt bilan va bekamu koʻst ado etishga harakat qildilar va jismoniy tayyorgarligini namoyish qildilar.

Sport – sogʻliq garovi ekinligi, jismoniy faollik, sport bilan muntazam shugʻullanish sogʻlom va uzoq yashashga zamin boʻlishi barchaga maʼlum. Aholi orasida sportni ommalashtirish, jismoniy faol hayot kechirishga daʼvat etish borasida amalga oshirilayotgan bu kabi saʼy-harakatlardan koʻzlangan maqsad ham odamlarning uzoq va sogʻlom hayot kechirishiga erishishdir.

Kelgusi yilda bu boradagi tadbirlar yana davom ettiriladi va respublikamizning 7 yoshdan 70 yoshgacha boʻlgan va undan ham katta aholisining jismoniy tayyorgarlik darajasini baholash maqsadida ular orasida sport sinovlari oʻtkazilishi rejalashtirilmoqda.

Bunda eng avvalo maktablar oʻquvchilari sinovga qamrab olinadi. Shuningdek, korxona, tashkilot va muassasalarda ishlaydigan xodimlar, keyinchalik uy mehnati bilan shugʻullanuvchilar, pensionerlarning ham sport sinovlari orqali jismoniy tayyorgarlik darajasi aniqlanadi. Bundan koʻzlangan maqsad esa aholini, ayniqsa yoshlarni sport bilan muntazam shugʻullanishga jalb etish orqali sogʻlom va baxtiyor yashashiga erishishdir.

Oygul RAJABOVA.