ChOYKOʻL OVULIDA GRANT LOYIHASI DOIRASIDA “OGOHLIK – DAVR TALABI” MAVZUSIDA DAVRA SUHBATI OʻTKAZILDI

Ayni paytda butun dunyo miqyosida global muammoga aylangan diniy ekstremizm va terrorizmga qarshi kurashish, yoshlarimizni yot gʻoyalardan asrash, ularning mafkuraviy bilimlarini oshirish har qachongidan ham dolzarb tus olgan. Bu borada Amudaryo tumanida faoliyat yuritayotgan amunews.uz veb-sayti tahririyati xodimlari ham Oliy Majlis huzuridagi jamoat fondi tomonidan moliyalashtirilgan “Sogʻlom muhit – sogʻlom hayot” nomli grant loyihasi doirasida targʻibot-tashviqot tadbirlarini oʻtkazib kelmoqda.

28-noyabr kuni grant loyihasining ish rejasiga koʻra “Ogohlik – davr talabi” mavzusidagi navbatdagi tadbir Choykoʻl ovulida boʻlib oʻtdi. Tadbirda tahririyat xodimlari, fuqarolar yigʻini raisi Begzod Aytekov, xotin-qizlar faoli Saylixon Murodboyeva, Ichki ishlar boʻlimi profilaktika inspektori Azimjon Matyusupov, ovul imomi Jangaboy Oʻrozboyev hamda koʻchaboshchilar, hududdagi maktablar amaliyotchi-psixologlari ishtirok etishdi.

Davra suhbati tarzida oʻtkazilgan ushbu tadbirni Choykoʻl ovul fuqarolar yigʻini raisi Begzod Aytekov ochib berdi va loyiha ijrochilarini tanishtirib oʻtdi. Tahririyat xodimlari amunews.uz veb-saytining “Sogʻlom muhit – sogʻlom hayot” grant loyihasining maqsadiga koʻra ijtimoiy tarmoqlarda maqolalar eʼlon qilinayotgani, faol va intiluvchan yoshlarni tengdoshlariga oʻrnak qilib koʻrsatilayotgani, mahallalarda, oilalarda ijtimoiy-maʼnaviy muhit barqarorligiga salbiy taʼsir koʻrsatuvchi holatlarning, aholi, ayniqsa yoshlar orasida oʻz joniga qasd qilish, giyohvandlik, erta turmush qurish kabi illatlarning oldini olish borasida tushuntirish, targʻibot ishlari olib borilayotganini bayon etishdi.

Davra suhbati davomida ovul hududida yoshlarning turli diniy-ekstremistik va terrorchilik oqimlar taʼsiriga tushib qolishning oldini olish boʻyicha hamkorlikda amalga oshirilayotgan ishlar xususida soʻz yuritildi.

Ovul imomi Jangaboy Oʻrozboyev milliy manfaatlarga zid boʻlgan diniy mazmundagi mahsulotlarni respublika hududiga olib kirish va tarqatishga urinish holatlari yurtimizda ham kuzatilayotgani, bu kabi ekstremistik ruhdagi mahsulotlarning internet va boshqa yoʻllar orqali tarqatilishi aholi tomonidan dinning notoʻgʻri talqin etilishiga, kam maʼlumotga ega oʻquvchilarning maʼnaviy ongi buzilishiga zamin yaratayotganini kuyunchaklik bilan soʻzladi. Shuningdek, buzgʻunchi kimsalar yaqin oʻtmishda diniy-ekstremizm va aqidaparastlikni tarqatish, aholi orasida yoyishda turli adabiyot va nashrlardan foydalangan boʻlsa, zamonaviy texnologiya vositalari rivojlangan hozirgi davrda internet tarmogʻini yot gʻoyalar tarqatishning qulay manbaiga aylantirishayotganini taʼkidladi.

Tuman Ichki ishlar boʻlimining Choykoʻl ovulidagi profilaktika inspektori Azimjon Matyusupov ham yoshlar oʻrtasidagi jinoiy huquqbuzarliklar va diniy ekstremizmning salbiy taʼsiri toʻgʻrisida atroflicha maʼlumotlar berib oʻtdi. Ushbu targʻibot yigʻilishida yurtimizning ayrim hududlarida sodir boʻlayotgan turli huquqbuzarliklar haqida dalillarga tayangan misollarni keltirish bilan birga, diniy ekstremizm va fundamentalizm gʻoyalarini targʻib qilayotgan, islom dinini niqob qilib olgan jinoyatchilarning noqonuniy harakatlari toʻgʻrisida ham oʻz fikr-mulohazalarini bildirib oʻtdi.

Tadbirda ishtirok etgan fuqarolar yigʻini xotin-qizlar faoli Saylixon Murodboyeva, 59-sonli maktabning amaliyotchi-psixologi Muazzam Matyoqubova, va 22-sonli maktabning amaliyotchi-psixologi Fazilat Shukurlayevalar ham yot gʻoyalarga qarshi maʼnaviy immunitetni hosil qilish, internet va OAV orqali keng tushuntirish, sof diniy taʼlimotlarni yoshlarga yetkazish, ularni xalqparvarlik, vatanparvarlik, milliy va diniy qadriyatlarga sadoqat ruhida tarbiyalash muhim ahamiyatga ega ekanligini eʼtirof etishdi. Shuningdek, bu borada samarali natijalarga erishish, yoshlarni yurt kelajagiga munosib qilib tarbiyalashda hamjihatlikda ish olib borish muhim ahamiyat kasb etishini taʼkidlashdi. Shu bilan birga “Sogʻlom muhit – sogʻlom hayot” grant loyihasi doirasida oʻtkazilgan ushbu “Ogohlik – davr talabi” mavzusidagi tadbirning nihoyatda ahamiyatliligi, bu kabi tadbirlarni yoshlar oʻrtasida ham muntazam ravishda oʻtkazib borishni yoʻlga qoʻyish kerakligi alohida aytib oʻtildi.

Yurtimizda hukm surayotgan tinchlik, farovonlik va millatlararo oʻzaro totuvlikning qadriga yetish har birimizning burchimizdir. Diniy-ekstremizm va terrorizmga qarshi kurashishda har bir inson masʼuliyatni his etishi, Vatanimizning kelajagi uchun javobgar ekanini va, albatta, yot taʼsirlardan ogoh boʻlishni unutmasligi kerak.

Ozoda Xudoyberganova