1-sonli maktabda “Bu mening oʻzligim, gʻurur, nomusim, Konstitutsiyam – oliy Qomusim!” shiori ostida bayram tadbiri oʻtkazildi

Mamlakatimiz xalqi sevib nishonlaydigan bayramlar koʻp. Har bir bayramning oʻz tarixiy ahamiyati, xalqimiz hayotida tutgan beqiyos katta oʻrni bor. 8-dekabr – Oʻzbekiston Respublikasi Konstitutsiyasi qabul qilingan sana esa oʻzbekistonliklar uchun mukammal qomusiy baxt, erk va adolatning haqiqiy tantanasi, eng aziz va qadrli bayram sifatida yakdillik bilan nishonlanadi. Davlat va jamoat tashkilotlarida, taʼlim-tarbiya muassasalarida sana munosabati bilan “Konstitutsiya bilimdonlari”, “Qomusimiz - baxtimiz”, “Konstitutsiyamizni oʻrganamiz”, “Baxt-iqbol va kelajagimiz kafolati” mavzularida koʻrik-tanlovlar, davra suhbatlari, zakovat bellashuvlari oʻtkaziladi.

Konstitutsiyamiz qabul qilingan kun arafasida, joriy yilning 6-dekabr sanasida Mangʻit shahridagi 1-sonli umumtaʼlim maktabida ham maʼnaviy-maʼrifiy, adabiy-musiqiy bayram tadbiri boʻlib oʻtdi. Did bilan bezatilgan maktab faollar zalida Konstitutsiyamizni madh etuvchi shiorlar, devoriy gazetalar, siyosiy adabiyotlar, maktab oʻquvchilarining Konstitutsiya haqidagi bilimlarini oʻzida mujassam etgan maʼruzalar, insholar, ijodiy ishlar koʻrgazmasi  tashkil etildi.

Tadbir avvalida ona Vatan, istiqlol, tinchlik va doʻstlikni tarannum etuvchi joʻshqin kuy sadolari ostida sahnaga maʼnaviy-maʼrifiy va adabiy-badiiy kecha ishtirokchilari kirib kelishdi. Ishtirokchilar ona Vatanni madh etuvchi sheʼrlar aytishdi. Shundan soʻng, Oʻzbekiston madhiyasi yangrab, barcha, shu jumladan tadbirda ishtirok etayotgan oʻqituvchilar, oʻquvchi-yoshlar, ularning ota-onalari ham magʻrur turib Oʻzbekiston madhiyasiga joʻr boʻlib kuyladilar.

Boshlovchilar Konstitutsiyamiz qabul qilinganining 31 yilligi hamda Yangi tahrirdagi Konstitutsiyaga kiritilgan oʻzgarishlar, mamlakatimizda roʻy berayotgan demokratik jarayonlar hamda yangilangan Konstitutsiyamizning xalqimizni kelajak sari ruhlantirib turguvchi tengsiz qudrati, qonun ustuvorligi, bagʻrikenglik, huquqiy tenglik va adolat tamoyillari haqida biri-biridan taʼsirli sheʼrlar oʻqidilar.

Shuningdek, oʻquvchi-yoshlar oʻrtasida yangilangan Konstitutsiyamizning 155ta moddasi va undagi 434ta normaning ahamiyati, xalqimiz hayotida tutgan oʻrni yuzasidan viktorina savollariga tez, aniq va puxta javob berish boʻyicha bellashuv ham oʻtkazildi. “Yangilangan Konstitutsiyamiz haqida nimalarni bilasiz?” degan savolga  oʻquvchi-yoshlar dadil va tezkorlik bilan javob berdilar. Xususan, Konstitutsiyaning 1-moddasi 15-, 5-, va 31-moddalari haqida oʻquvchilar mukammal fikr yuritishib, oʻzlarining Konstitutsiya bilimdonlari ekanliklarini amalda namoyon etdilar.

Tadbir davomida oʻquvchi-yoshlar xalq erki, ozodlik, baxt, tinchlik, tenglik, doʻstlik va millatlararo totuvlikni madh etuvchi sheʼrlar, ashulalar ijro etishdi. Joʻshqin kuy-qoʻshiqlarga monand raqslari bilan  tadbir mehmonlariga koʻtarinki kayfiyat ulashdilar.

Tadbir yakunida “Bu – mening oʻzligim, gʻurur, nomusim, Konstitutsiyam – oliy Qomusim!” shiori ostida “Hech kimga bermaymiz seni, Oʻzbekiston!” qoʻshigʻini joʻr boʻlib kuyladilar.

Boʻlib oʻtgan bayramona tadbir barchaga zavq-shavq bagʻishladi.

Muhabbat Qodirova,

1-sonli maktabning tarix fani oʻqituvchisi.