TUMAN IIB XODIMLARI TINChLIK-OSOYIShTALIKNI ASRASh MAVZUSIDA TADBIRLAR OʻTKAZDI

Globallashuv jarayoni shiddat bilan kechayotgan hozirgi davr yurtimizning har bir fuqarosini ogohlikka, hushyorlikka undaydi. Boisi axborot texnologiyalari yuksak taraqqiy etayotgani undan foydalanuvchilarga axborot olish imkonini tobora kengaytirmoqda. Ijtimoiy tarmoqlardan nopoq maqsadlar yoʻlida foydalanishga harakat qilayotgandiniy ekstremistik, terroristik oqimlar uchun bu ayni muddao boʻlmoqda. Ular hali dunyoqarashi toʻla shakllanib ulgurmagan oʻsmir-yoshlarni oʻz domiga tortishda ham koʻpincha  axborot texnologiyalaridan foydalanishmoqda.

Shu oʻrinda farzandining yurish-turishini yaxshi nazorat qilmaydigan, ularning qiziqishlariga qarab ilm olishga, kasb-hunarga yoʻnaltirishga jalb qilmaydigan ota-onalar ham borligini inkor qila olmaymiz. Bular yot gʻoyalarni targʻib qilib, oʻz atroflariga qoʻllab-quvvatlovchi yoshlarni toʻplashga intilayotgan kuchlarga qoʻl kelayotir.

Amudaryo tumani Ichki ishlar boʻlimi Tezkor-qidiruv xizmati Terrorizmga qarshi kurashish guruhi  xodimlari tumanimizda tinchlik-osoyishtalik hukmron boʻlishi uchun aholining terrorizm va ekstremizmga nisbatan murosasiz munosabatini shakllantirish, aholining, ayniqsa, yoshlarning huquqiy ongi va huquqiy madaniyatini yuksaltirish uchun turli taʼsirchan chora-tadbirlarni amalga oshirmoqdalar.

Joriy yilning 22-dekabrida guruh xodimlari tumanimizdagi 21-sonli Bolalar musiqa va sanʼat maktabi oʻqituvchilari, oʻquvchilari bilan uchrashuv oʻtkazdilar. Uchrashuvda guruh xodimlari terroristik, ekstremistik tashkilotlarning jirkanch maqsadlari, tinchlik-osoyishtalikning bebaho neʼmat ekanligi xususida batafsil maʼlumotlar berdilar, yoshlar bunday tashkilotlar taʼsiriga tushib qolishdan ogohlantirildi. Shu kuni mazkur guruh xodimlari Qipchoq ovul fuqarolar yigʻinida faoliyat olib borayotgan 1-sonli kasb-hunar maktabida ham boʻlishib, oʻquvchilarga Oʻzbekiston Respublikasi hududida ekstremistik faoliyatning, terroristik  faoliyatning har qanday koʻrinishi taʼqiqlanishi, ularning gʻoyalarini qoʻllab-quvvatlash, targʻib etish jinoiy  javobgarlikka olib kelishi mumkinligini batafsil tushuntirdilar.

Amudaryo televideniyesi tahririyatining “Yuksak maʼnaviyatli  va axloqli yoshlar – kelajak poydevori” nomli grant loyihasi doirasida tahririyat xodimlari tuman Ichki ishlar boʻlimi tezkor qidiruv xizmati terrorizmga qarshi kurashish guruhi xodimlari hamkorligida oʻtkazilgan  nazorat tadbirlarida oʻquvchilarni mavzu yuzasidan qiziqtirgan savollarga batafsil javoblar berildi.

Aytish joizki, ushbu guruh tomonidan joriy yilning oʻtgan 11 oyi davomida uzoq muddat xorijda boʻlib qaytgan fuqarolar bilan filtr soʻrovlari oʻtkazildi. “Xavf guruhi” toifasiga kiruvchi shaxslarning hatti-xarakatlari nazoratga olinib, ular bilan munosib xulq-atvorda boʻlish yuzasidan targʻibot olib borildi.

Joriy yilning oʻtgan davrida taʼlim muassasalarida, korxona-tashkilotlarda, fuqarolar yigʻinlarida 54ta targʻibot tadbirlari oʻtkazildi. Tadbirlar davomida aholi, yoshlar terrorizm va ekstremizmdan ogoh etilib, yurtimizning tinchlik-osoyishtaligini asrashga daʼvat etildi, huquqiy ongini yuksaltirishga hissa qoʻshildi.

Tinchlik – bebaho neʼmat. Uni asrash barchamizning burchimiz.

Oygul RAJABOVA.