Matematika fani boʻyicha “Hokim olimpiadasi” oʻtkazildi

Mamlakatimizda istiqbolli yoshlarni qoʻllab-quvvatlash, ularning iqtidorini roʻyobga chiqarish, ilmiy-tadqiqot va innovatsion faoliyatini samarali yoʻlga qoʻyish uchun qoʻshimcha shart-sharoitlar yaratish borasida izchil chora-tadbirlar amalga oshirib kelinmoqda.

Shu bilan birga, ulgʻayib kelayotgan yosh avlodning ilm egallashga boʻlgan ishtiyoqi va intellektual salohiyatini oshirish, shuningdek xalqaro maydonda mamlakatimizning nufuzini yanada yuksaltirish uchun iqtidorli yoshlarni aniqlash va yuqori malakali kadrlar tayyorlashning uzluksiz tizimini takomillashtirish yuzasidam tizimli ishlar tashkil etilmoqda.

10-fevral sanasida tumanimizdagi 36-sonli umumtaʼlim maktabida matematika fanidan “Hokim olimpiadasi” oʻtkazildi. Tuman yoshlar ishlari agentligi hamda Maktabgacha va maktab taʼlimi boʻlimi bilan hamkorlikda oʻtkazilgan olimpiada umumiy oʻrta taʼlim maktablarida kichik yoshli iqtidorli yoshlarni qoʻllab-quvvatlash, ularning intellektual salohiyatini namoyish etishiga koʻmaklashish, oʻquvchilarning xalqaro olimpiyadalarga puxta tayyorgarlik koʻrishlariga shart-sharoitlar yaratish kabi ustuvor maqsadlarga yoʻnaltirildi.

Taʼlim muassasalari oʻquvchilari orasidan matematika, fizika, kimyo, biologiya, informatika, rus tili, ona tili va adabiyot, ingliz tili, tarix, geografiya fanlari boʻyicha bilimli, qiziquvchan, intiluvchan va ijodkor yoshlarni aniqlash, ulardagi qobiliyatlarni roʻyobga chiqarishga koʻmaklashish, qoʻllab-quvvatlash va ragʻbatlantirish maqsadida 2024-yil mobaynida har oyda bitta fandan, bir bosqichda “Hokim olimpiadasi” oʻtkazilishi belgilangan.

Matematika fanidan oʻtkazilgan dastlabki olimpiadada tumanimizdagi 85 ta umumtaʼlim maktablarning 7-8-sinflarida tahsil oluvchi 200 nafar iqtidorli oʻquvchilar ishtirok etdilar.

 “Hokim olimpiadasi”ning ochilish marosimida tuman Yoshlar ishlari agentligi rahbari Sardor Ismailov, Maktabgacha va maktab taʼlimi boʻlimi maktablar faoliyatini muvofiqlashtirish shoʻʼba rahbari Ibragim Radjapov, boʻlim metodistlari Habibulla Davletyarov va Rayhon Yakubova hamda olimpiada auditoriya rahbarlari, kuzatuvchilar, hakamlar ishtirok etdilar.

Ochilish marosimida tuman Yoshlar ishlari agentligi rahbari Sardor Ismailov, Maktabgacha va maktab taʼlimi boʻlimi maktablar faoliyatini muvofiqlashtirish shoʻʼba rahbari Ibragim Radjapov, 36-sonli umumtaʼlim maktabining matematika fani katta oʻqituvchi Azimboy Saparboyevlar soʻzga chiqishib, “Hokim olimpiadasi” oʻtkazilishidan maqsad va vazifalar haqida, olimpiada oʻtkazilish tartibi haqida toʻxtalib oʻtdilar hamda olimpiada ishtirokchilariga omad tiladilar.

Shundan soʻng auditoriya rahbarlari va kuzatuvchilar ishtirokchilarini belgilangan xonalarda MMTB tashkiliy qoʻmita tomonidan taqdim qilingan topshiriqlarni ishtirokchi oʻquvchilar soniga nushalab oldilar hamda jarayon boshlandi. Ishtirokchi oʻquvchilarga 7-8-sinf uchun Matematika fanidan 30 savolli topshiriqlar va javoblar varaqasi tarqatildi. Olimpiada topshiriqlarini bajarish uchun ishtirokchilarga nizom talabi boʻyicha 2 soat vaqt berildi. Belgilangan vaqtdan keyin auditoriya rahbari tomonidan ishtirokchilarning javob varaqalari shifrlangan holda hakamlarga taqdim qilinib, ular tomonidan tekshirildi hamda natijalar chiqarildi. Natijalarga koʻra 8-sinflar orasida 76-, 42-, 22- sonli umumtaʼlim maktablari oʻquvchilari, 7-sinflar orasida 31-, 64-, 22-sonli umumtaʼlim maktablari oʻquvchilari sovrinli oʻrinlarni egallab, gʻolib boʻlishdi. Sovrinli oʻrinlarni egallagan oʻquvchilar qimmatbaho sovgʻalar bilan taqdirlandilar.

Qayd etish joizki, tashkil etilayotgan bu kabi ishlar davlatimiz rahbarining yoshlarni amalga oshirilayotgan islohotlarning faol ishtirokchisiga aylantirish, ilm-fanni oʻzlashtirishga boʻlgan ragʻbatini oshirish, izlanuvchanlik va yaratuvchanlik faoliyatiga keng jalb qilish, jahon miqyosida Vatanimiz dovrugʻini keng taratgan ajdodlarga munosib avlodni tarbiyalash maqsadida qabul etilgan “Iqtidorli yoshlarni aniqlash va yuqori malakali kadrlar tayyorlashning uzluksiz tizimini tashkil etish chora-tadbirlari toʻgʻrisida”gi qarori ijrosini taʼminlashga xizmat qilmoqda.

Charos Arslonova, tuman hokimligining Axborot xizmati rahbari.