Tumanimizda ming nafarga yaqin yoshlarga yer berildi

Mamlakatimizda yoshlarning mustaqil hayotga qadam qoʻyishlari, oʻz iqtidori va salohiyatini toʻliq namoyon etishlari uchun sharoitlarni kengaytirish, ularning bandligiga koʻmaklashish, doimiy ish bilan hamda munosib daromad olishini taʼminlash borasida tub islohotlar amalga oshirilmoqda.

2024-yilning 23-fevral kuni oʻtkazilgan videoselektor yigʻilishida davlatimiz rahbari tomonidan yoshlar bandligini taʼminlash maqsadida ishsiz yoshlarga qishloq xoʻjaligi mahsulotlarini yetishtirish uchun yer ajratish boʻyicha topshiriqlar berilgani bu borada yana bir muhim qadam boʻldi.  Mazkur vazifalar ijrosini taʼminlash yuzasidan Amudaryo tumanida ham samarali ishlar amalga oshirilmoqda.

Tuman hokimi Sobir Xoʻjametov, hokimning yoshlar siyosati, ijtimoiy rivojlantirish va maʼnaviy-maʼrifiy ishlar boʻyicha oʻrinbosari Nodir Kamolov hamda yoshlar masalalari boʻyicha tegishli masʼullar, qishloq xoʻjaligi sohasi mutasaddilari barcha ovul va mahallalardagi yoshlar hamda fermerlar bilan uchrashib, hududlardagi ishsiz yoshlarning bandligini taʼminlash uchun ularga yer berishdan koʻzlangan maqsad va vazifalar xususida tushunchalar berdi.

Dastlab tuman hokimi boshchiligidagi ishchi guruh Qangli hamda Qipchoq ovullaridagi yoshlar bilan uchrashdi. Uchrashuvda ovul fuqarolar yigʻin masʼullari, hokim yordamchilari, xotin-qizlar faollari, yoshlar yetakchilari, jamoatchilik vakillari hamda yoshlar ishtirok etdilar.

Tuman hokimi Sobir Xoʻjametov soʻnggi yillarda mamlakatimizda aholi, shu jumladan, yoshlarning ijtimoiy himoyaga muhtoj, turmush sharoiti ogʻir, ishsiz va kasb-hunarga ega boʻlmagan, huquqiy va maʼnaviy-psixologik qoʻllab-quvvatlashga zarurati boʻlgan qatlamiga davlat tomonidan manzilli koʻmaklashish boʻyicha mutlaqo yangicha tizim joriy qilinganligini alohida taʼkidladi.

Suhbat chogʻida fermerlar har biri 5 nafardan ishsiz yoshlarni otaliqqa olish, yer berib, ularga ish oʻrgatish, yerdan yaxshi daromad olish boʻyicha oʻz tavsiyalari hamda tajribalarini boʻlishish takliflarini berdi.

Shundan soʻng tuman hokimi boshchiligidagi ishchi guruh Choykoʻl, Toʻlqin, Oq oltin ovullaridagi aholi faollari, fermerlar hamda yoshlar bilan uchrashdilar.

Tuman hokimi oʻz soʻzida davlatimiz tomonidan yoshlar siyosatiga eng ustuvor yoʻnalishlaridan biri sifatida alohida eʼtibor qaratilayotgani, yoshlarning jamiyatdagi oʻz oʻrnini topishlarida, oʻz iqtidori va qobiliyatlarini namoyon etishlarida, turli yot gʻoyalari taʼsiriga tushib qolishlarining oldini olishda barcha birdek masʼul ekanligini taʼkidladi.

Eʼtirof etish joizki, davlatimizning kuchli ijtimoiy siyosatida yoshlarga sifatli taʼlim berish, kasb-hunarga oʻrgatish, intilishlarini qoʻllab-quvvatlash borasida tizimli ishlar amalga oshirib kelinmoqda.

Xususan, har bir ovul va mahallada “Yoshlar bandligi dasturi” amalga oshirilmoqda, “Besh tashabbus olimpiadasi”, “Madaniyat karvoni” tadbirlari va turli festivallar oʻtkazib kelinmoqda.

Prezident farmoni bilan “Oʻzbekiston – 2030” strategiyasini “Yoshlar va biznesni qoʻllab-quvvatlash yili”da amalga oshirishga oid davlat dasturi qabul qilindi. Dasturda yoshlar muammolarini hal qilish va salohiyatini yuzaga chiqarish, ularni talab yuqori boʻlgan kasb-hunarga oʻqitish orqali bandligini taʼminlash boʻyicha koʻplab vazifalar ilgari surildi.

Tuman hokimi boshchiligidagi ishchi guruh Jumurovul mahallasi, Jumurtov shaharchasi, Bobur nomli hamda Kuyuk koʻpir ovullarida boʻlib, ovul va mahallalar masʼullari, fermerlar va yoshlar bilan uchrashdilar.

Uchrashuv mobaynida tuman hokimi Sobir Xoʻjametov muhtaram Prezidentimiz tomonidan joriy yilning 23-fevral sanasida oʻtkazilgan videoselektr yigʻilishida belgilab bergan yoshlar siyosatiga oid ustuvor vazifalar xususida soʻz yuritdi.

Taʼkidlanishicha, yoshlarni ishga joylashtirish, zamonaviy kasb-hunarlar va tadbirkorlikka jalb etish maqsadida yoshlarning biznes bilan shugʻullanishiga qoʻshimcha imkoniyatlar yaratilib, oilaviy tadbirkorlik dasturi doirasida ajratilayotgan kreditlarning kamida 40 foizi shu maqsadlarga yoʻnaltiriladi.

“Yosh tadbirkor” tanlovlari oʻtkazilib, gʻolib boʻlgan biznes loyiha va gʻoyalar egalari xorijiy davlatlarga malaka oshirishga yuboriladi. Hozirgi kunda yoshlarbop istiqbolli soha bu raqamli texnologiyalar. Shu bois Davlat dasturida “Har bir mahalladan ikki nafar dasturchi” loyihasi belgilangan. Shuningdek, bu yil axborot texnologiyalari sohasida 70 ming yoshni band qilish rejalashtirilgan.

Aholi bandligini taʼminlashda qishloq xoʻjaligida imkoniyatlar keng. Oldingi yillarda shu maqsadda 200 ming gektar paxta va gʻalla maydonlari qisqartirilib, dehqonchilik uchun aholiga boʻlib berilgan edi. Bu yil yana 60 ming 500 gektar yer yoshlarga ajratib berilishi hamda qishloq xoʻjaligi mahsulotlari yetishtirishga yoʻnaltirilishi belgilangan.

Tuman hokimi yoshlar bilan yaqindan muloqot qilar ekan, ularga yaratilayotgan imkoniyatlardan samarali foydalanish, ajratilayotgan yer maydonlariga yaxshi daromad keltiradigan mahsulotlar ekish, ularni parvarishlash boʻyicha fermerlardan tajriba oʻrganish, fidoyilik bilan mehnat qilish zarurligi, oʻz ustida ishlash lozimligi xususida tavsiya hamda takliflar berdi.

Charos Arslonova, tuman hokimligining Axborot xizmati rahbari.