Oʻqituvchilar oʻrtasida hokim olimpiadasining ilk bosqichi boʻlib oʻtdi

Amudaryo tumanida yoshlarga taʼlim-tarbiya berish, kelajak egalari boʻlgan yosh avlodni har tomonlama yetuk va barkamol qilib voyaga yetkazish, yurt ravnaqiga yaraydigan bilimli, salohiyatli kadrlarni tayyorlashga alohida eʼtibor qaratilmoqda.

Maʼlumki, tuman hokimi Sobir Xoʻjametov tashabbusi bilan har oyda bitta fan yuzasidan tumandagi barcha umumtaʼlim maktablari oʻquvchi yoshlari oʻrtasida hokim olimpiadasini oʻtkazish yoʻlga qoʻyilgan edi.

Endilikda oʻqituvchilarning oʻz bilimlarini sinovdan oʻtkazishlari uchun imkon yaratish, ularning oʻz ustida ishlashlari, bilim va tajrialarini yanada oshirishlariga turtki berish maqsadida tuman hokimi Sobir Xoʻjametov tashabbusi bilan tumandagi barcha umumtaʼlim maktablari oʻqituvchilari oʻrtasida hokim olimpiadasi oʻtkazilishi yoʻlga qoʻyilmoqda.

Joriy yilning 30-mart sanasida oʻqituvchilar oʻrtasida hokim olimpiadasining ilk bosqichi 55-sonli maktabda matematika, fizika fanlari boʻyicha boʻlib oʻtdi.

Dastlab maktab hovlisida olimpiadaning ochilish marosimi boʻlib oʻtdi. Unda tuman Maktabgacha va maktab taʼlimi boʻlimi boshligʻi Yalgʻash Shomuratov ushbu olimpiadaning oʻtkazilishidan asosiy maqsad va vazifalar, uni oʻtkazish tartib-qoidalari xususida soʻz yuritdi.

Olimpiadani oʻtkazish boʻyicha tashkiliy ishlar tuman Maktabgacha va maktab taʼlimi boʻlimining Maktablar faoliyatini muvofiqlashtirish shoʻʼbasi rahbari Ibragim Rajabov, metodistlari Habibulla Davletyarov va Rayhon Yakubovalar tomonidan amalga oshirildi.

Tuman hokimligi, Maktabgacha va maktab taʼlimi boʻlimi, Yoshlar ishlari agentligi tuman boʻlimi hamkorligi oʻtkazilayotgan mazkur olimpiadani har oyda bir fandan oʻtkazilishi boʻyicha aniq rejalar ishlab chiqilgan.

Olimpiada sinovlari test topshiriqlari asosida boʻlib, test kitobchalari Oliy taʼlim, fan va innovatsiyalar vazirligi huzuridagi Bilim va malakalarni baholash Agentligidan buyurtma asosida olinadi. Shuningdek, test topshiriqlari javoblari belgilangan titul varaqlari ham mazkur agentlikka tekshirish va natijalarni aniqlash uchun yuboriladi.

Hokim olimpiadasida tumandagi 85 ta umumtaʼlim maktablaridan ixtiyoriy ravishda 90 nafar matematika va fizika fanlari oʻqituvchilari ishtirok etdilar.

Olimpiadaning shaffof oʻtishini taʼminlash maqsadida oʻqituvchilar koʻz oʻngida Bilim va malakalarni baholash Agentligi tomonidan kelgan test topshiriqlari kitobchalari ochiladi hamda tarqatiladi. Oʻqituvchilarning test topshiriqlarini bajarishlari hamda titul varaqlariga javoblarini belgilashlari uchun bir soat vaqt beriladi. Belgilangan vaqt tugagandan soʻng titul varaqlari yigʻib olinadi, test topshiriqlari kitobchalari oʻqituvchilarning oʻzlariga beriladi.

Bilim va malakalarni baholash Agentligi tomonidan test natijalari olingach, gʻoliblar aniqlanadi hamda tuman hokimligi tomonidan taqdirlanadi.

Taʼkidlash joizki, tuman tarixida ilk marotaba taʼlim sohasida hokim tashabbusi bilan amalga oshirilayotgan bu olimpiada taʼlim sifati va samaradorligini yanada oshirishga, oʻqituvchilarning bilim salohiyatlarini rivojlantirishlariga, oʻz ustida ishlashlariga, bir-birlari bilan oʻzaro tajriba almashishlariga xizmat qiladi.

Charos Arslonova, tuman hokimligining Axborot xizmati rahbari.