Vazir oʻrinbosari va yoshlar uchrashuvi boʻlib oʻtdi

30-yanvar kuni Qoraqalpogʻiston Respublikasi Ichki ishlar vaziri oʻrinbosari, podpolkovnik Gʻulomjon Eshimbetov Amudaryo tumani 3-sektor hududida yashovchi yoshlar bilan uchrashdi. Uchrashuv doirasida yoshlarni vatanparvarlik ruhida tarbiyalash maqsadida sport musobaqalar va koʻngilochar tadbirlar oʻrkazildi. Shuningdek, yoshlar muamolarini oʻrganish va ularni hal etishga amaliy yordam berish maqsadida vazir oʻrinbosarining sayyor qabuli tashkil etildi.

Uchrashuv doirasidagi tadbirlarda tuman hokimining yoshlar siyosati, ijtimoiy rivojlantirish va maʼnaviy-maʼrifiy ishlar boʻyicha oʻrinbosari Nodir Kamolov, Yoshlar ishlari agentligi tuman boʻlimi boshligʻi Sardor Ismoilov, 3-sektor hududidagi yoshlar yetakchilari, korxona-tashkilotlari masʼullari ishtirok etdilar.

Uchrashuvda vazir oʻrinbosari Gʻulomjon Eshimbetov soʻzga chiqib, davlatimiz rahbari tomonidan yoshlar siyosati borasida ustuvor islohotlar olib borilyotganini alohida taʼkidlab, ayniqsa, qoraqalpogʻistonlik yoshlarni har tomonlama qoʻllab-quvvatlashga alohida eʼtibor qaratayotgani xususida soʻz yuritdi.

Shu oʻrinda qayd etish joizki, muhtaram prezidentimizning 2022-yil 31-avgust sanasida imzolangan “Qoraqalpogʻiston Respublikasida tadbirkorlik, innovatsion texnologiyalar va infratuzilmalarni jadal surʼatlarda rivojlantirish orqali aholi farovonligini oshirishning qoʻshimcha chora-tadbirlari toʻgʻrisida”gi farmoni bilan qoraqalpogʻistonlik yoshlar uchun oliy taʼlim muassasalariga kirishga davlat granti va toʻlov-kontrakt asosida qoʻshimcha kvota ajratilishi natijasida 3 mingdan ortiq yoshlarimiz oliy taʼlim muassasalarida talaba boʻlish baxtiga muyassar boʻldilar.

Shuningdek, davlatimiz rahbari tomonidan joriy yil davomida toʻrt million nafar yoshlar bilan alohida ishlash, ularni vatanparvarlik, jamiyat hayotiga dahldorlik va qonunni hurmat qilish kabi yuksak tuygʻular asosida tarbiyalash, kasb-hunarga oʻrgatish, ish bilan taʼminlash yuzasidan ilgari surgan vazifalarni amalga oshirish maqsadida tizimli ishlar yoʻlga qoʻyilmoqda.

Xususan, mahallalarda yoshlar masalalarini muvofiqlashtirish maqsadida Amudaryo tumani 3-sektor hududida yashovchi 7 ta toifadagi 500 nafarga yaqin yoshlar IIVning Maʼnaviy-maʼrifiy ishlar va kadrlar tayyorlash xizmatiga biriktirilib, masʼul rahbarlar boshchiligida biriktirilgan yoshlar oʻrtasida maʼnaviy, maʼrifiy, sport, intellektual tadbirlar oʻtkazildi.

Tuman IIBda “Vatanparvarlik burchagi” tashkil etildi. Maʼnaviy-maʼrifiy, koʻngilochar tadbirlar doirasidagi ajoyib chiqishlar barcha yoshlarda katta tassurotlar qoldirdi.

Qoraqalpogʻiston Respublikasi Ichki ishlar vazirligi qoshidagi akademik litsey oʻquvchilarining koʻrgazmali chiqishlari tadbirda ishtirok etayotgan yoshlar qalbidagi vatanparvarlik hissini yanada kuchaytirdi.

Tadbir mobaynidagi “Aral juldizlari” jamoasi qiziqchilarining hazil tariqasidagi sahna koʻrinishlari tadbir ishtirokchilariga yuqori kayfiyat bagʻishladi. Shuningdek, vatanparvarlik ruhidagi ajoyib kuy-qoʻshiqlar barchaga bayromana kayfiyat baxsh etdi.

Tuman IIBning hovlisidagi sport maydonchasida sportning har xil turlari boʻyicha “Ichki ishlar vazirligi kubogi” musobaqalari tashkil etildi. Yoshlar sportning stol tennisi, turnikda tortilish, tir, armrestling, tosh koʻtarish, darts, kamondan otish turlari boʻyicha oʻz kuch va mahoratlarini sinab koʻrdilar. Musobaqalar ajoyib, bahs-munozalarga boy tarzda oʻtkazildi. Barcha sport turlari boʻyicha 1-, 2-, 3-oʻrin sohiblari aniqlanib, gʻoliblarga va faol ishtirokchilarga sport anjomlari hamda qimmatbaho sovgʻalar topshirilib, munosib taqdirlandi.

Vazir oʻrinbosari 3-sektor hududida yashovchi yoshlarning muammolalarini oʻrganish va ijobiy hal qilish yuzasidan oʻtkazgan sayyor qabulida yoshlar bilan ochiq muloqot qildi. Qabul jarayonida yoshlar bandligini taʼminlashda, oʻqigan mutaxassisligi boʻyicha ishga joylashishda amaliy yordam soʻrab murojaat qildilar. Murojaatlarni ijobiy hal etishda tumandagi tegishli masʼullar bilan chora-tadbirlar belgilab olindi.

 Charos Arslonova, tuman hokimining Axborot xizmati rahbari.