IShChI GURUH AʼZOLARI HUDUDLARDA BOʻLIB, FAOL VA IShBILARMON XOTIN-QIZLAR BILAN UChRAShDI

Maʼlumki, mamlakatimizda xotin-qizlarning bandligi va tadbirkorlik faoliyatiga koʻmaklashish maqsadida koʻplab islohotlar amalga oshirilmoqda. Jumladan, 2020-yilda qabul qilingan “Tadbirkorlik faoliyati va oʻzini oʻzi band qilishni davlat tomonidan tartibga solishni soddalashtirish chora-tadbirlari toʻgʻrisida”gi Prezident qaroriga muvofiq, oʻzini oʻzi band qilgan shaxslar uchun faoliyat turlari roʻyxatiga oʻzgartirishlar kiritildi. Bu oʻzgarishlar xotin-qizlarga ham oʻz bizneslarini boshlash va rivojlantirish uchun qoʻshimcha imkoniyatlar yaratib berdi.

Masalan, xotin-qizlar oʻzini oʻzi band qilgan shaxslar sifatida roʻyxatdan oʻtib, uy sharoitida xonaki tovuqlarni yetishtirish, chorva mollarini boqish, asalarichilik, milliy non va patirlarni, salatlar va tuzlamalarni tayyorlash va sotish, gullar va dekorativ daraxtlar yetishtirish va sotish, atlas va adras toʻqish, mayda munchoq tikish, doʻppidoʻzlik mahsulotlarini uy sharoitida tayyorlash, quroqchilik usulida koʻylak, koʻrpa va yopinchiqlar tikish va boshqa koʻplab faoliyatlar bilan shugʻullanishlari mumkin.

Amudaryo tumanida ham oʻzini oʻzi band qilgan holda oilasiga daromad keltirayotgan xotin-qizlar safi kun sayin ortib bormoqda. Shunday oilalar bilan yaqindan tanishish va ularning ish tajribalarini ommalashtirish, muammolarini oʻrganib, hal qilish maqsadida 22-aprel kuni Qoraqalpogʻiston Respublikasi Vazirlar Kengashi Raisining oʻrinbosari, Oila va xotin-qizlar qoʻmitasi raisi Maryam Ahmedova boshchiligidagi ishchi guruh Amudaryo tumanida boʻlib, oʻrganishlar oʻtkazdi. Oʻrganishlar davomida masʼullar oʻzini oʻzi band qilgan, tomorqasidan samarali foydalanayotgan, tadbirkorlik bilan shugʻullanayotgan oilalar bilan yaqindan tanishib, ularning muammo va takliflarini tinglashdi.

Mamlakatimizda xotin-qizlarning ijtimoiy himoyasini kuchaytirish va ularning iqtisodiy mustaqilligini taʼminlash maqsadida qator davlat dasturlari ishlab chiqilib, muvaffaqiyatli amalga oshirilmoqda. Birgina “Hunarmand” uyushmasi orqali hunarmandchilik faoliyati bilan shugʻullanayotgan xotin-qizlarga koʻmaklashish, ularning mahsulotlarini ichki va tashqi bozorlarda sotishga yordam berish kabi chora-tadbirlar amalga oshirilmoqda. Shuningdek, oʻzini oʻzi band qilgan xotin-qizlarni roʻyxatdan oʻtkazish jarayoni ham soddalashtirilgan va avtomatlashtirilgan, bu esa ularga davlat xizmatlaridan oson va tez foydalanish imkonini bermoqda.

Bu kabi islohotlar xotin-qizlarning iqtisodiy faolligi oshishiga va oilalarning daromad manbalari yaratilishiga xizmat qilmoqda.

Maʼlumki, tuman boʻyicha 4-bosqich “Ayollar daftari”ga jami 5 398 nafar xotin-qizlar kiritilgan boʻlib,  shundan ijtimoiy himoyaga muhtoj ishsiz xotin-qizlar 1 941 nafarni, tadbirkorlik qilish istagini bildirgan ehtiyojmand xotin-qizlar 685 nafarni tashkil qiladi.

Xotin-qizlarning bandlik darajasi ortib, iqtisodiy ahvoli yaxshilanishi esa ularning “Ayollar daftari” va boshqa ijtimoiy himoya dasturlari orqali emas, oʻz mehnati bilan daromad topib, roʻzgʻor tebratishlariga zamin yaratadi.

Jamiyatda ayollarning ijtimoiy va iqtisodiy rolini yanada oshirishga qaratilgan bu kabi tizimli ishlar ularga teng imkoniyatlar yaratib berishga xizmat qilishi bilan nihoyatda ahamiyatlidir. Shu bilan birga, bu islohotlar mamlakatning iqtisodiy taraqqiyotiga ham ijobiy taʼsir koʻrsatadi. Chunki xotin-qizlarning ishbilarmonligi va tadbirkorligi iqtisodiyotning turli sohalarida yangi ish oʻrinlari yaratishga va mahsulotlar hamda xizmatlarning koʻpayishiga olib keladi.