"Daryo toshqin, suvlar toʻlqin..." Ijod esa qaynoq. Yohud Toʻlqinda ijodkorlar va oʻquvchilar uchrashuvi qanday oʻtdi?
Sheʼriyat – koʻngil torlarini chertguvchi sehrli tilsim. Sheʼr – marjon goʻyo, unga tuygʻular shoda. Umrida sheʼr oʻqimagan, tinglamagan, yoshlikdagi ilk muhabbatdan taʼsirlanib qatorlar bitmagan kimsa boʻlmasa kerak dunyoda. Sababi, inson yaralar ekan, u bilgan va tanigan ilk sheʼr ona allasi boʻlib qalbiga joylanadi.
Ona yurtimizda barcha sohalar singari badiiy ijodga va kitobxonlikka ham alohida eʼtibor qaratilmoqda. Muntazam ravishda hududlardagi ziyo maskanlarida yaʼni taʼlim dargohlarida oʻtkazilib kelinayotgan kitobxonlik kechalari, mushoiralar va isteʼdodli shoir va yozuvchilar bilan birga oʻtkazilayotgan turli xil tadbirlar soʻzimiz isbotidir. Albatta bunday tadbirlar oʻquvchilarning nafaqat maʼnaviy olamini boyitadi, balki, ularning orasidan ham qalami oʻtkir ijodkorlar adabiyotga, kitoblar olamiga kirib kelishiga turtki boʻladi. Yangi yangi isteʼdodlarni kashf etadi.
Yaqinda amunews.uz veb sayti tahririyati mahallalarda, oilalarda ijtimoiy-maʼnaviy muhit barqarorligini taʼminlashga hissa qoʻshish maqsadida "Jahun ilhomlari" NNT bilan hamkorlikda tumanimizning Toʻlqin ovulida joylashgan 33-sonli maktabda ijodkorlar, shoir va yozuvchilarning hudud aholisi bilan uchrashuvini tashkil qildi.
Tadbir amunews.uz sayti tahririyatining "Sogʻlom muhit – sogʻlom hayot" nomli grant loyihasi doirasida oʻtkazildi. Uchrashuvda amunews.uz veb sayti muxbiri, loyiha koordinatori Mahmud Shomurodov, Oʻzbekiston yozuvchilar uyushmasi aʼzosi, tumanimizning koʻzga koʻringan shoirasi Zulfiya Olloyorova, shoir Shomurod Xoʻjanov, 33-sonli maktab oʻquvchilari va hudud aholisi ishtirok etdi.
Uchrashuvda ijodkorlar oʻzlarining Vatan, yoshlik, muhabbat va yana qator mavzulardagi ijod namunalarini tadbir mehmonlariga oʻqib berdilar.
Shuningdek, ishtirokchilar "Jayhun ilhomlari" NNT kutubxonasidan oʻrin olgan, yangi nashrdagi kitoblar koʻrgazmasi bilan tanishdilar. Uchrashuv haqiqiy sheʼrxonlik kechasiga aylanib ketdi. Tadbir oʻquvchilarning ijod, adabiyot haqidagi savol-javoblari, bahs munozaralari bilan davom etdi.
Uchrashuv oʻquvchilarda va tadbir ishtirokchilarida oʻchmas taassurot qoldirdi.
Aziza MADRAHIMOVA
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
