Mehnat yarmarkasida ishtirok etgan 21 nafar fuqaro doimiy ish joyiga ega boʻldi

Mehnat yarmarkalari aholi, ayniqsa mehnat bozoriga endi kirib kelayotgan yoshlarni ish bilan taʼminlashda muhim ahamiyatga ega. Bu kabi tadbirlar ish izlayotgan shaxslarga va ish beruvchilarga bir-birlari bilan toʻgʻridan-toʻgʻri muloqot qilish imkonini beradi. Shu sababli ham mamlakatimizda aholini ish bilan taʼminlash, yangi ish oʻrinlari yaratish boʻyicha davlat siyosati doirasida mehnat yarmarkalari alohida ahamiyat kasb etadi. Bu borada Amudaryo muhandislik texnikumida oʻtkazilgan “Karera kuni” hamda “Mehnat yarmarkasi” ham nafaqat iqtisodiy, balki ijtimoiy jihatdan ahamiyatli tadbir boʻldi.

Tadbirda tuman hokimi oʻrinbosari Fahriddin Yusupov, tuman prokurori yordamchisi Sanjar Abdullayev, Kambagʻallikni qisqartirish va bandlikka koʻmaklashish boʻlimi boshligʻi Rashid Salayev, mazkur boʻlim boshligʻining oʻrinbosari Bahodir Boltaboyev, Maktabgacha va maktab taʼlimi boʻlimi boshligʻi Yalgʻash Shomuratov, Savdo-sanoat palatasi tuman boʻlimi boshligʻi Maqsud Rajabov va tumandagi muassasa, korxona hamda tashkilotlar masʼullari, faol tadbirkorlar, ishbilarmonlar ishtirok etdi.

Tadbirning asosiy maqsadi tuman hududida yashovchi ish izlovchi fuqarolar, ayniqsa yoshlarni, umumtaʼlim maktablari, kasb-hunar taʼlimi maskanlari, oliy oʻquv yurtlari bitiruvchilarini mavjud boʻsh ish oʻrinlari bilan yaqindan tanishtirishdir.

Mehnat yarmarkasida taklif etilgan boʻsh ish oʻrinlari ish izlovchilarga keng tanlov imkoniyatlarini taqdim etdi. Jumladan, yarmarkada tumandagi turli korxona va tashkilotlar oʻzlarida mavjud boʻlgan 339ta boʻsh ish oʻrinlari bilan ishtirok etdi. Bundan tashqari, salohiyatli tadbirkorlar – “Rasulov Oybek taomlari” oilaviy korxonasi 50 ta, “JKB Energy Amudaryo group” MChJ 100ta, “Jumamurod usta” MChJ 10 ta, “Ravshanbek Yulduzxon” xususiy korxonasi 10 ta boʻsh ish oʻrinlari bilan qatnashdi.

Mehnat yarmarkasida aholining turli toifa qatlamlari, jumladan yoshlar, ayollar, bitiruvchilar, nogironligi boʻlgan shaxslar, jazoni ijro etish muassasasidan ozod qilingan, harbiy xizmatdan kelgan, mehnat migratsiyasidan qaytgan yurtdoshlarimiz, shuningdek aliment toʻlovchi fuqarolar, jami 145 nafar ish izlovchilar ishtirok etdi.

Ishtirokchilarning 21 nafari, shu jumladan 1 nafar nogironligi boʻlgan fuqaro doimiy ishga joylashtirilgan boʻlsa, 12 nafariga kasbga oʻqitish, qayta oʻqish kurslariga yoʻllanma berildi. 60 nafar fuqaro haq toʻlanadigan jamoat ishlariga joylashtirilib, mehnat qonunchiligiga oid masalalar boʻyicha 39 nafar fuqaroga huquqiy maslahatlar berildi.

Bundan tashqari, Oʻzbekiston Respublikasi Vazirlar Mahkamasining 2022-yil 11-may kungi 252-sonli qaroriga asosan tuman hokim yordamchilari tomonidan 13 nafar ishsiz xotin-qizlarga bandligini taʼminlash maqsadida subsidiya asosida tikuv mashinalari topshirildi.

Aytish kerakki, aholi bandligi iqtisodiy va ijtimoiy rivojlanishning muhim omili hisoblanadi. Ish bilan taʼminlangan aholi iqtisodiyotning barqarorligiga va oʻsishiga hissa qoʻshadi. Shu sababli mamlakatimizda aholi bandligini taʼminlash va ishsizlikni kamaytirish boʻyicha davlat siyosati doirasida koʻplab islohotlar amalga oshirilmoqda. Bu islohotlar orqali yangi ish oʻrinlari yaratish, aholining daromadlarini oshirish va kambagʻallikni qisqartirish maqsad qilingan.

Mehnat yarmarkasi, ayniqsa kasb-hunar maktablari va oliy oʻquv yurtlari bitiruvchilari uchun ajoyib imkoniyat boʻldi. Bunday tadbirlar tumanning iqtisodiy rivojlanishiga va aholining ish bilan taʼminlanishiga katta hissa qoʻshadi, bu esa oʻz navbatida kambagʻallikni qisqartirish hamda xalq farovonligini yanada oshirishga yordam beradi.

Bahodir Boltaboyev, tuman Kambagʻallikni qisqartirish va bandlikka koʻmaklashish boʻlimi boshligʻining oʻrinbosari