11-sonli maktabda “Hamma kasblar kerak, barcha kasblar muhim” mavzusida psixologlar uchun oʻquv-seminari oʻtkazildi

Amudaryo tumani Maktabgacha va maktab taʼlimi boʻlimiga qarashli 11-sonli maktabda oʻtkazilgan tuman psixologlarining navbatdagi oʻquv-seminaridan koʻzlangan asosiy maqsad – oʻquvchilarni kasb-hunarga yoʻnaltirish ishlarini yanada takomillashtirish, maktab psixologlarining bir-biri bilan tajriba, yangi gʻoya va fikrlar almashishlari uchun sharoit yaratishdir.

Seminarda tuman Maktabgacha va maktab taʼlimi boʻlimi mudiri Yalgʻosh Shomuratov hamda boʻlimning bolalarni ijtimoiy-psixologik qoʻllab-quvvatlash va inklyuziv taʼlim boʻyicha psixolog-metodisti, 11-sonli maktab direktori va umumtaʼlim maktablarining psixologlari ishtirok etdi.

Tumandagi ilgʻor maktab psixologlari tomonidan tashkillashtirilgan oʻquv-seminariga tashrif buyurgan mehmonlar “Oltin soat”, “Pozitiv soʻzlar”, “Kim mergan” kabi interaktiv mashgʻulotlar hamda gullar bilan kutib olindi.

11-sonli maktab psixologlari hamda maktabning texnologiya fani oʻqituvchilari tomonidan tashkillashtirilgan koʻrgazmalari zalida oʻquvchilarning qoʻl mehnatlari bilan ishlangan milliy hunarmandchilik mahsulotlari – kashtalar, qoʻlda tayyorlangan kiyimlar, quroqlar va qoʻgʻirchoqlar hamda zamonaviy uslubda tikilgan dasturxonlar, oʻquvchi yigitlar tomonidan karton qogʻozlaridan ishlangan issiqxona va maktab maketi, mexanik robotlar namoyish qilindi.

Maktabga kirishdan boshlab to oʻquv-seminari oʻtkaziladigan zalgacha yoʻlakcha devorlari oʻquvchilarni kasb-hunar oʻrganishga chorlovchi chaqiriqlar bilan bezatilgani ishtirokchilarda katta taassurotlar qoldirdi.

Oʻquv-seminarini tuman Maktabgacha va maktab taʼlimi boʻlimi mudiri Yalgʻosh Shomuratov ochib berdi. “Har bir oʻquvchiga bilimdan tashqari bitta hunar egallashi uchun yordam berish biz va Siz aziz ustozlarning asosiy vazifamizdir” – deya taʼkidladi u oʻz soʻzida. Qayd etilganidek, bolalarni maktabdanoq kasb-hunarga yoʻnaltirish, ularning kelajakdagi muvaffaqiyatli karerasi uchun muhim asos yaratadi. Shu sababli oʻquvchilarning kasbiy qiziqishlarini aniqlash va ularning qobiliyatlariga mos kasblarni tanlashda yordam berish muhim ahamiyatga ega. Bu jarayon taʼlim muassasalari, sinf rahbarlari va maktab psixologlari oʻrtasidagi hamkorlikni kuchaytirib, oʻquvchining oʻziga boʻlgan ishonchini yanada oshiradi.

11-sonli maktab psixologi Dilnoza Shomurotova ishtirokchilarga “Kasblar parashyuti” mashgʻulotini oʻtkazdi. Ushbu mashgʻulotdan koʻzlangan maqsad – kim qaysi kasbni egallashidan qatʼiy nazar, jamiyat uchun barcha kasblar muhim ekanligini taʼkidlashdan iboratdir.

Mashgʻulotdan soʻng 11-sonli maktab oʻquvchilari tomonidan “Gilamdoʻz” ertagi asosida tayyorlangan sahna koʻrinishi namoyish qilindi. Oʻquvchilarning hunarga boʻlgan qiziqishini kuchaytirish maqsadida tashkil qilingan ushbu sahna koʻrinishi zamirida “Har bir yigit-qiz uchun 40 hunar ham oz” degan hayotiy hikmat mujassam.

Soʻngra 29- va 67-sonli maktablar psixologlari tomonidan kasb-hunarga oid “Sharq bozori” nomli, 11-sonli maktab psixologlari tomonidan “Poyezd va quvnoq sharchalar” nomli, 33-sonli maktab psixologi tomonidan esa “Qoʻl soati” metodikasi asosida mashgʻulotlar oʻtkazildi.

Chindan ham, maktab psixologlari uchun oʻtkaziladigan bu kabi seminarlar oʻquvchilarning kasbiy yoʻnalishlarini aniqlash va ularning shaxsiy rivojlanishlariga koʻmaklashishda muhim ahamiyat kasb etadi. Bunday tadbirlar psixologlarga oʻzaro tajriba almashish va yangi usullarni joriy etish imkonini beradi, bu esa oʻquvchilarning kasb-hunarga boʻlgan qiziqishlarini yanada kuchaytirib, ularning kelajakdagi tanlovlariga ijobiy taʼsir koʻrsatadi.