19-sonli maktabda Xotira va qadrlash kuniga bagʻishlab sport musobaqalari oʻtkazildi

9-may ­– Xotira va qadrlash kuni munosabati bilan mamlakatimizdagi taʼlim maskanlarida, muassasa va tashkilotlarda, mehnat jamoalarida xotira kechalari, turli sport tadbirlari oʻtkazish anʼanaga aylangan. Bundan koʻzlangan asosiy maqsad yoshlarning boʻsh vaqtlarini mazmunli oʻtkazishlariga koʻmaklashish, ularni turli yot gʻoya va illatlardan asrash, maʼnaviy immunitetini mustahkamlash, oʻtmishdagi suronli yillarni eslatib, tinchlikning qadriga yetishga chorlashdir.

Amudaryo tumani Maktabgacha va maktab taʼlimi boʻlimiga qarashli 19-sonli maktabda ham shu kabi tadbir oʻtkazildi. Maktabning oliy toifali jismoniy tarbiya oʻqituvchilari Muborak Masharipova hamda Shukurjon Jumamurodovalar tomonidan tashkil qilingan musobaqalar maktab oʻquvchilari uchun chinakam sport bayramiga aylandi.

Maktab oʻquvchilari oʻrtasida sportning badminton, stol tennisi, basketbol va yengil atletika kabi turlari boʻyicha oʻtkazilgan musobaqalar ishtirokchilar hamda tomoshabinlar orasida sportga qiziquvchi yoshlar safini yanada oshirdi.

Aytish joizki, maktab oʻquvchilari orasida turli sport musobaqalari ishtirokchilari, gʻolib va sovrindorlari safi kun sayin ortib bormoqda. Jumladan, maktabning basketbolchi qizlari 2022-yilda “Umid nihollari” sport musobaqalarining sektor va tuman bosqichlarida 1-oʻrinni, Qoraqalpogʻiston Respublikasi bosqichida esa 3-oʻrinni qoʻlga kiritgan edi. Yengil atletikachi qizlar ham sektor, tuman bosqlarida gʻolib boʻlib, Qoraqalpogʻiston Respublikasi bosqichida 2-oʻrinni egallashgan edi. 2022, 2023-yilda ham maktab oʻquvchilari qator musobaqalarda gʻolib va sovrindorlar qatoridan joy egalladi.

Joriy yilda oʻtkazilgan “Umid Nihollari” sport musobaqalarining tuman bosqichida esa maktab oʻquvchilari stritbol boʻyicha 2- va 3-oʻrinlarni egallashdi. Bandminton boʻyicha ham 1-, 2- va 3-oʻrinlarni qoʻlga kiritdigan yoshlar safidan 19-sonli maktab oʻquvchilari ham joy egallashdi.

Bundan tashqari, joriy yilda oʻtkazilgan “Besh tashabbus olimpiadasi” musobaqalarida maktabning yengil atletikachi qizlari avval sektor, keyinchalik tuman bosqichida 1-oʻrinni egallab, Qoraqalpogʻiston Respublikasi bosqichiga yoʻllanmani qoʻlga kiritishdi va ayni kunlarida iyun oyida oʻtkaziladigan musobaqalarga tayyorgarlik koʻrishmoqda.

Aytish joizki, jismoniy tarbiya va sport yoshlarning jismoniy va maʼnaviy kamolotida muhim rol oʻynaydi. U yoshlar jismi va ruhini nafaqat jismonan, balki ijtimoiy va psixologik jihatdan ham mustahkamlaydi, ularning oʻziga boʻlgan ishonchini oshiradi va jamiyat hayotida faol ishtirok etishga tayyorlaydi.

Ayniqsa, jamoaviy sport turlari yoshlarda jamoa bilan ishlash qobiliyatini, liderlik xususiyatlarini va jamoadoshlari oldida masʼuliyat tuygʻusini shakllantiradi. Shuningdek, sport orqali yoshlar oʻzlarining stressga chidamliligini va muammolarni hal qilish qobiliyatini oshirishadi.

Jismoniy tarbiya va sportning yana bir muhim jihati yoshlarni sogʻlom turmush tarziga yoʻnaltirishdir. Sport bilan muntazam shugʻullanish, yoshlarni turli kasalliklardan himoya qilish va ularning umumiy salomatligini yaxshilashga yordam beradi. Bu esa oʻz navbatida yoshlarning oʻqish, bilim va koʻnikmalarni egallash samaradorligini oshiradi.

19-sonli maktab oʻquvchilari ishtirokida oʻtkazilgan sport musobaqalari ham ishtirokchi oʻquvchi yoshlarning jismoniy, maʼnaviy va ijtimoiy rivojlanishida katta ahamiyatga ega tadbir boʻldi.

Maktabning oliy toifali jismoniy tarbiya oʻqituvchilari Muborak Masharipova hamda Shukurjon Jumamurodovalar kelgusida ham turli bayramlar va sanalar munosabati bilan oʻquvchilar oʻrtasida turli sport musobaqalarini oʻtkazib, ularning iqtidorlarini yanada rivojlantirish, shu orqali Kuyuk koʻpir ovuli, Amudaryo tumani va Qoraqalpogʻistonning sharafini mamlakat miqyosidagi va xalqaro musobaqalarda himoya qiladigan sportchilar yetishib chiqishiga zamin yaratishni oʻz oldlariga maqsad qilib qoʻyishgan.