Nogironligi boʻlgan bolalar ishtirokida “Maftunkor ranglar jilosi” nomli tadbir oʻtkazildi

Bolalik – begʻuborlikdir. Bu davrda butun borliq koʻzlarimizga faqat yorqin ranglarda koʻrinadi. Bolalarning shoʻx-shodon kulgusi qalblarga quvonch bagʻishlaydi. Ularni sevish, bolajonlik fazilati xalqimizning qon-qoniga singib ketgan qadriyat, aslida. Murgʻak qalblarga shodlik baxsh etish har birimizni quvontiradi, shubhasiz. Gohida biz kattalar ham bolalardan begʻuborlikni, bir-birimizga qaynoq mehr ulashishni oʻrganamiz, goʻyo. Goʻzallik dunyoni qutqaradi, deydi allomalar. Mana shu kuch bolarning qalbida, koʻzlarida yashirin boʻlsa kerak.

1-iyun – Xalqaro bolalarni himoya qilish kuni. Bu sana serquyosh Oʻzbekistonimizda zoʻr tantanalar bilan nishonlanadi. Hech bir bola mehr va eʼtibordan chetda qolmaydi. Bayram munosabati bilan mamlakatimizdagi koʻplab tashkilotlatlar tomonidan tashkil qilingan tadbirlarga bolalarning quvonchi oʻzgacha fayz bagʻishlaydi.

Oʻzbekiston nogironlar jamiyati Amudaryo tumani boʻlimi tamonidan “Arena” nomli umumiy ovqatlanish va aholiga xizmat koʻrsatish shoxobchasida Xalqaro bolalarni himoya qilish kuni munosabati bilan nogironligi boʻlgan, alohida taʼlim olayotgan bolalar ishtirokida “Maftunkor ranglar jilosi” nomli tadbir ham unitilmas lahzalarga boy boʻldi.

Mazkur tadbirda Qoraqalpogʻiston Respublikasi Nogironlar jamiyati raisi Parshagul Dauletyarova, Amudaryo tumani hokimining oʻrinbosari, oila va xotin-qizlar boʻlimi boshligʻi Goʻzal Saburova, “Nuroniy” jamgʻarmasi tuman boʻlimi raisi Ashirbay Kushayev, tuman Maʼnaviyat va maʼrifat markazi boʻlimi boshligʻi Ikrom Matkarimov, “Inson” ijtimoiy xizmatlar markazi tuman boʻlimi boshligʻi Gʻulomjon Dusenbayev, tuman Maktabgacha va maktab taʼlimi boʻlimi mutaxassisi Nurbek Seytbayev, tadbirkor Dildora Hayitbayeva hamda Nogironlar jamiyati Amudaryo tuman boʻlimi raisi Nilufar Xolboyevalar ishtirok etdi.

Tadbirda soʻz olganlar bolarni bayram bilan tabriklab, mamlakatimizda bolalarga, xususan, nogironligi boʻlgan shaxslarga yaratilayotgan shart-sharoitlar, berilayotgan imkoniyatlar haqida, ularning davlat tamonidan kafolatlangan huquqlari, ijtimoiy muhofazasi toʻgʻrisida toʻxtalib oʻtishdi.

Darhaqiqat, Bosh Qomusimizning 50- va 57-moddalari hamda tegishli qonunchilik hujjatlarida nogironligi bor shaxslar uchun alohida normalar qayd etilgan. Jumladan, Konstitutsiyamizning 50-moddasida taʼlim tashkilotlarida alohida taʼlim ehtiyojlariga ega boʻlgan bolalar uchun inklyuziv taʼlim va tarbiya bilan taʼminlanishi belgilab qoʻyilgan. Shuningdek, bola huquqlari xalqaro qonunchilik hujjatlari va tashkilotlar tamonidan ham himoya qilinadi.

Bolalar qalbi kabi begubor oq qogʻozlarga surat solarkan, tasvirlarda doʻstlik, ona vatan manzaralari, qadrdon maktab binolari bilan birga ularning ruhiyati, ichki kechinmalari ham bolalarcha samimiy ifodalangan. Tadbir ishtirokchilari goʻzal tasvirlarni kuzatish bilan birga bolalarga rasm chizishlari uchun yaqindan yordam berib, qoʻllab-quvvatab turishdi. Tadbir bolalarga tengdoshlari bilan koʻrishib, yangi doʻstlar orttirish imkonini ham berdi.

Jarayon davomida shoʻx qoʻshiqlar yangrab, bolalarning sevimli multfilm qahramonlari musiqaga mos har hil harakatlar qilib, barchaga xush kayfiyat bagʻishladi. Tadbir yakunida tashkilotchilar va homiylar tamonidan bolalarga dasturxon yozilib, estalik uchun bayram sovgʻalari topshirildi.

Shuni qayd etish kerakki, bolalarni himoya qilish kunini oʻtkazish toʻgʻrisidagi qaror 1925-yilda Jenevada bolalar faravonligiga bagʻishlab oʻtkazilgan konferentsiyada qabul qilingan. 1959-yilda maxsus Deklaratsiya qabul qilinib, unda bolalarning yashash, zoʻravonlikdan himoya qilinish huquqlari va ularning kelajagi haqida davlatning gʻamxoʻrlik qilish majburiyati belgilangan. 1979-yilda xalqaro bolalar yili deb eʼlon qilingan. 1989-yilda esa bolalarning huquqiy himoyasini, Yer yuzidagi barcha bolalarning teng va bir xil huquqlarini taʼminlaydigan bola huquqlari toʻgʻrisidagi Konventsiya qabul qilindi.

Bolalar – naslimiz davomchilari, ertangi kun egalaridir. Har birimiz farzandlarimizning baxtli boʻlishini, toʻkis sharoitda voyaga yetishini va kelajakda farovon hayot kechirishini istaymiz. Fursatdan foydalanib, aziz bolajonlarni bayram bilan samimiy muborakbod etamiz hamda ularning sogʻ-salomat, bilimdon, baxtli va barkamol boʻlib ulgʻayishlariga tilakdoshmiz!

Shohzod Qurbonboyev