Tomorqa va dehqon xoʻjaliklarida yangi zahiralarni ishga solish mavzusida koʻrgazmali seminar oʻtkazildi

Oilalar iqtisodini va aholi turmush farovonligini yuksaltirish masalasi bugungi kunda nafaqat har bir oila sohibining zimmasidagi, balki davlat ahamiyati darajasidagi eng dolzarb vazifaga aylandi. Bu borada mamlakatimizda zarur qonuniy asoslar yaratilgan. Xususan, aholiga dehqonchilik qilish, oilasi ehtiyojlari uchun zarur mahsulotlarni yetishtirish va shu orqali oʻzini oʻzi band qilish tamoyili asosida uzoq muddatga yerlarni ijaraga berish, tomorqa xoʻjaligida chorva mollari, qoʻy, echki boqish hamda asalarichilik va parrandachilik bilan shugʻullanishlari uchun keng imkoniyatlar yaratib berilmoqda.

Oʻzbekiston Respublikasi Prezidentining 2024-yil 5-martdagi “Aholi xonadonlarida sanoat usulida mahsulot ishlab chiqarishni qoʻllab-quvvatlash hamda tomorqa va dehqon xoʻjaliklarida yangi zahiralarni ishga solishga doir chora-tadbirlar toʻgʻrisida” gi Qarori aholi farovonligini taʼminlash borasidagi saʼy-harakatlarni yanada yaxshi va ijobiy tomonga yoʻnaltirishda muhim turtki boʻldi.

Ushbu Qaror ijrosini taʼminlash maqsadida Amudaryo tuman Fermer, dehqon xoʻjaliklari va tomorqa yer egalari Kengashi tomonidan fuqarolar yigʻinlari masʼullari bilan hamkorlikda samarali ishlar amalga oshirilmoqda. Unga koʻra, joriy yil uchun aniq reja ishlab chiqilib, tumandagi 30 ta ovul va mahallalarning har biridan 10tadan, tuman boʻyicha jami 300ta xonadonni parrandachilikka ixtisoslashtirish choralari koʻrildi hamda ushbu xonadonlarga mahalliy inkubatorlarda yetishtirilgan parranda joʻjalari yetkazib berildi.

Shunisi eʼtiborga molikki, Amudaryo tuman Fermer, dehqon xoʻjaliklari va tomorqa yer egalari Kengashi xodimlari tomonidan ayni paytda fuqarolar yigʻinlari masʼullari bilan hamkorlikda ishlab chiqilgan manzilli rejaga asosan Prezident Qarorida belgilangan ustuvor vazifalardan kelib chiqib, kelgusi yillarda tuman boʻyicha 26 ming 557 ta xonadonni parrandachilikka ixtisoslashtirish va shu orqali ularning bandligini, farovonligini taʼminlash maqsadida roʻyxat shakllantirilmoqda.

Joriy yilning 5-iyun sanasida tumanning Doʻrman ovulida boʻlib oʻtgan “Aholi xonadonlarida sanoat usulida mahsulot ishlab chiqarishni qoʻllab- quvvatlash hamda tomorqa va dehqon xoʻjaliklarida yangi zahiralarni ishga solishga doir chora-tadbirlari toʻgʻrisida”gi Prezident Qarori ijrosiga bagʻishlangan seminar Kengashida ham ishtirokchilar tomonidan aholi farovonligini oshirish, ularning ish bilan bandligini taʼminlashda tomorqa xoʻjaligi imkoniyatlari juda muhim ahamiyatga egaligi qayd etildi.

Seminarda ishtirok etgan Oʻzbekiston Fermer, dehqon xoʻjaliklari va tomorqa yer egalari Kengashi boʻlim boshligʻi Zayniddin Fayzullayev hamda Kengash xodimi Ilhom Soliyevlar xonadonlarni parrandachilikka ixtisoslashtirish orqali tomorqa xoʻjaligini rivojlantirish istiqbollari xususida soʻz yuritdilar. Ayniqsa, tomorqalarda takroriy ekinlar ekish, xususan, makkajoʻxori, suli, arpa, shuningdek, boshqa dukkakli va ildiz mevali ekinlar ekish parrandachilikda juda asqotishini taʼkidladilar.

Seminar-kengashda Amudaryo tuman Fermer, dehqon xoʻjaliklari va tomorqa yer egalari Kengashi xodimlari, fuqarolar yigʻinlari raislari, hokim yordamchilari “Tomorqa xizmati” MChJ rahbarlari hamda Doʻrman ovuli hududidagi tomorqa yer egalari oʻzaro fikr va tajriba almashdilar hamda masʼullarga oʻzlarini qiziqtirgan savollar bilan murojaat qildilar.

Xususan, takroriy ekinlarning turlari, ularni parvarishlash, parrandalar uchun oziqlik darajalari, shuningdek, takroriy ekin sifatida tanlanadigan sabzavotlarning tezpishar va serhosil navlari yuzasidan berilgan savollarga soha masʼullari batafsil maʼlumotlar taqdim etdilar.

Seminar yakunida ishtirokchilar Doʻrman ovulidagi namunali tomorqa yer egalarining tajribalari bilan yaqindan tanishdilar.

Robiya Yoʻldosheva.