Nima deyapti?! –4-sonli maktabda davra suhbati boʻldi, deyapti...

“Kambagʻal boʻlib tugʻilish ayb emas, ammo kambagʻal boʻlib dunyodan oʻtish ayb” degan edi donolardan biri. Bu masalada faqat moddiyatni tushunish joiz emas. Chunki dunyoda moddiyatdanda ustunroq turadigan tushunchalar bisyor. Shulardan biri – kuchli maʼnaviyat, aql-u zakovatdir! Tasavvur qilingki, siz kuchli IQ koʻrsatgichiga ega va shunga plyus ravishda maʼnaviyati boy shaxssiz, biroq, hashamatni yoqtirmaysiz. Qaysiki davrada sizni oddiy kiyimingiz, joʻngina poyabzalingiz uchun odamlar unchalik xushlamadi. Chunki u yerdagi hammani egnida qaysidir brend firmaning kiyimi va qimmatbaho soat. Lekin ular sizni oʻsha brendning egasi ekaningizni bilishmaydi. Bilishganida esa sizga nisbatan soxta takalluflar boshlanadi. Ha, fojiamiz esa bizning mana shunday – koʻrgan narsamizga, guvohi boʻlgan vaziyatimizga bir tomonlama yondashuvimizda... Chinakam aql va farosat egasida esa vaziyatni toʻgʻri baholash, moddiyat va maʼnaviyatni balansda ushlab turish degan koʻnikmalar boʻladi.

Maʼnaviyat, ilm-u maʼrifat esa insonga ham ichki, ham tashqi jihatdan zeb bera oladigan, soʻzingizni oʻtkir, dastingizni uzun qila oladigan keng tushuncha. Shu sabab ham bugun davlatimiz rahbari maʼnaviyat, ilm olish, kitobxonlik degan soʻzlarga alohida urgʻu berib, bu yoʻnalishda qator islohotlar amalga oshirmoqda.

Yaqindagina “Taraqqiyot koʻzgusi” gazetasi tahririyatining ijodiy jamoasi Amudaryo tumanining 2-sektori hududidagi 4-sonli maktabga tashrif buyurdi. Tashrif gazeta tahririyatining “Bilimli va maʼnaviyatli yoshlar bilan – uchinchi Renessans sari” nomli grant loyihasi doirasida tashkil etildi.

“Maʼnaviyat kuni” munosabati bilan boʻlib oʻtgan davra suhbatida maktab pedagoglari, yuqori sinf oʻquvchilari, tumanimizning qalami oʻtkir shoiri Odil Shomurodov, “Taraqqiyot koʻzgusi” gazetasi muxbirlari Mahmud Shomurodov, Shohzod Qurbonboyev hamda ijodkor Aziza Madrahimovalar ishtirok etdilar.

Davra suhbatini maktabning oʻquv ishlari boʻyicha direktor oʻrinbosari Jayhun Avezov kirish soʻzi bilan ochib berdi. U oʻz soʻzida bugungi globallashuv davrida IT va axborot texnologiyalarining yoshlar hayotida tutgan oʻrni, ulardan toʻgʻri foydalanish, maʼnaviyatli insonning fazilatlari haqida gapirib oʻtdi. Shundan keyin loyiha koordinatori Aziza Madrahimova soʻzga chiqib, grant loyihasi maqsad va vazifalari, kutilayotgan natijalar va eng asosiysi maʼnaviyat degan tushunchaga keng urgʻu berdi. Kelgan mehmonlarni davra qatnashchilariga tanishtirib oʻtdi.

Davra suhbati davomida shoir Odil Shomurodov oʻzining yoshlik shijoati, insoniy tuygʻular tarannum etilgan sheʼrlaridan namunalar oʻqidi.

Tinglovchilar ijod namunalarini qarsaklar bilan olqishladi.

Gazeta muxbiri Shohzod Qurbonboyev esa maʼnaviy immunitet nima ekanligi, uni qanday boyitish mumkinligi va jadid bobolarimizning xalqni maʼrifatli qilish yoʻlida chekkan zahmatlari toʻgʻrisida taʼsirli fikrlarini bildirdi va davra ishtirokchilarining fikrlari bilan qiziqdi. Zamonaviy fikrlash hamda zamonaviy odam qanday boʻlishi haqidagi savolga maktabning 11-sinf oʻquvchisi Mahfuza Oʻrinboyeva oʻz hayoti misolida javob berdi.

Ha, maʼnaviyatga ilmni uygʻunlashtira olgan yoshlargina Uchinchi Renessansni barpo eta oladi, har qanday davrani boshqara oladi. Biz muntazam oʻtkazib borayotgan maʼnaviyat va kitobxonlik targʻiboti tadbirlari ham shunisi bilan ahamiyatli. Zero, tadbirda qatnashganlarni loaqal toʻrttasining boshida “lampochka” yonsa, maʼnaviy dunyoqarashi ijobiy tomonga oʻzgarsa shevamiz bilan aytganda “kalishing toʻzganiga” achinmaysan kishi.

Aziza Madrahimova