Yangi oʻquv yiliga sanoqli kunlar qoldi: Amudaryo tumani MMTBga qarashli taʼlim muassasalari yangi 2024-2025 oʻquv yiliga tayyormi?

Amudaryo tuman MMTB tasarrufida 86ta umumiy oʻrta taʼlim maktabi, jami 134ta, shu jumladan 52ta davlat, 78ta oilaviy, 4ta davlat-xususiy sherikchilik asosidagi maktabgacha taʼlim tashkilotlari hamda va “Barkamol avlod” bolalar maktabi mavjud.

Ayni paytda maktablar quvvati 32 ming 635-oʻrinli boʻlib, oʻquvchi soni esa 38 ming 813 nafarni tashkil etadi.

3 yoshdan 7 yoshgacha boʻlgan 12 ming 250 nafar bolalar MTTlarga qamrab olingan boʻlib, shundan davlat maktabgacha taʼlim tashkilotlarida 9615 nafar, davlat xususiy sheriklik asosidagi MTTlarda 300 nafar, oilaviy MTTlarda esa 2335 nafar kichkintoylar tarbiyalanmoqda.

Taʼlim tizimiga qaratilayotgan eʼtibor, qolaversa, zamon talablaridan kelib chiqib, sohada faoliyat olib borayotgan 4061 nafar pedagog xodimlarning kasbiy malakasini oshirishga, ularning oʻz ustlarida ishlashlariga alohida ahamiyat berilmoqda.

Bugungi kunda tuman MMTB tasarrufidagi umumtaʼlim maktablarida faoliyat olib borayotgan pedagog xodimlarning 293 nafari oliy toifali, 1937 nafari 1- va 2-toifali malakaga ega bilimdon oʻqituvchilar hisoblanadi. Ulardan 1720 nafari mutaxassislik toifasiga ega boʻlib, 111nafar oʻrta maxsus maʼlumotli oʻqituvchilar bilan oʻzaro tajriba almashish va “oʻrgan-oʻrgat” tamoyili asosida ish yuritishlari uchun zarur sharoitlar yaratilgan.

Tuman MMTB tasarrufidagi “Barkamol avlod” bolalar maktabi va umumtaʼlim maktablaridagi oʻquvchi-yoshlarning isteʼdod va qobiliyatlarini rivojlantirishga qaratilgan 67 ta toʻgaraklarda ularning oʻz iqtidorlarini namoyon etishlari uchun barcha imkoniyatlar mavjud.

Bundan tashqari, 2024-yil davomida tumandagi 52ta davlat maktabgacha taʼlim tashkilotlariga raqamlashtirish jarayonini amalga oshirish boʻyicha davlat byudjetidan jami 52 dona planshet va 52 dona wi fi router, mahalliy byudjet mablagʻlari hisobidan esa 42 dona printer qurilmalari olib berildi. Shuningdek, 28-sonli maktabga 1ta kompyuter, tuman BABMga 6ta kompyuter va 1ta elektron doska qurilmalari, davlatimiz rahbarining tegishli qaroriga muvofiq Respublika byudjeti mablagʻlari hisobidan 16ta maktabga zamonaviy kompyuter sinf jamlanmalari yetkazib berildi.

Muhtaram Prezidentimizning koʻrsatmalari va umumtaʼlim muassasalarini zamon talablari darajasida qurish, taʼmirlash va qayta rekonstruktsiya qilishga qaratilgan 404-sonli Qarori asosida bir qator maktablarda rekonstruktsiya ishlarini amalga oshirish belgilangan. Xususan, Beruniy nomli mahalla hududida joylashgan 31-sonli umumtaʼlim maktabi uchun 330-oʻrinli qoʻshimcha bino qurish ishlari boshlanib, bugungi kunda mazkur binoning tom qismida beton plitalarini yotqizish ishlari nihoyasiga yetkazilmoqda.

Shuningdek, Xizr eli mahallasi hududida joylashgan 46-sonli umumtaʼlim maktabiga 300-oʻringa moʻljallangan qoʻshimcha bino qurilishi, Jumur ovul mahallasi hududida joylashgan 48-sonli umumtaʼlim maktabiga 240-oʻringa moʻljallangan qoʻshimcha bino va 12x24 oʻlchamli sport zali, Qangli ovulida joylashgan 49-sonli maktabgacha taʼlim tashkiloti uchun yangidan 90-oʻringa moʻljallangan bino hamda Qoramon mahallasida davlat investitsiya dasturi asosida 150-oʻringa moʻljallangan davlat maktabgacha taʼlim tashkiloti binosi qurilishi ishlari davom etmoqda.

“Tashabbusli byudjet” loyihasining 2024-yil 1-mavsumida 3 ta maktab ishtirok etib, loyiha natijalariga koʻra, 1- va 41-sonli maktablarning har biri 1 mlrd 360 mln. soʻmdan, 76-sonli maktab jamoasi esa 860 mln. soʻmlik mablagʻni yutib olishga muvaffaq boʻlishdi. 1-sonli va 41-sonli maktablar jamoasi tomonidan ushbu mablagʻni joriy taʼmirlash ishlariga, 76-sonli maktab jamoasi tomonidan esa dars jarayoni uchun zarur zamonaviy uskunalar, jumladan, proyektor, elektron doska, laboratoriya jihozlari va hokazolarga yoʻnaltirish rejalashtirilgan.

Oʻzbekiston Respublikasi Maktabgacha va maktab taʼlimi vazirligi tomonidan yangi oʻquv yili oldidan joriy yil 5-10-avgust kunlari hududiy Pedagogik markazida master-trener va trener-koordinatorlar tomonidan Amudaryo tumanidan tanlab olingan 5 nafar direktor, 3 nafar matematika fani oʻqituvchilari va 6 nafar tabiiy fan oʻqituvchilariga Singapurning “Marshal Savendish Edusation” tashkiloti bilan hamkorlikda oʻquv jarayoniga xorijiy ilgʻor tajribalarni tatbiq etish boʻyicha seminar tashkil etildi. Ushbu seminar kaskad usulida joriy yil 19-24-avgust kunlari 31-, 40- va 82-sonli maktablarda, har bir maktabdan 1 nafar ilgʻor oʻqituvchilar uchun, 26-31-avgust kunlarida esa barcha maktablarda tashkil etilishi rejalashtirilgan. Shuningdek, joriy yil 18-19-avgust kunlari Moʻynoq tumanidagi “Oq kema” oʻquvchi-yoshlar lagerida anʼanaviy uchinchi “Ustozlar forumi” oʻtkazilishi belgilangan. Amudaryo tumanidan 14 nafar ilgʻor oʻqituvchilar ushbu forumda ishtirok etishi kutilmoqda.

Ayni kunlarda tuman MMTB tasarrufidagi barcha oʻquv muassasalarida “Bilimlar kuni” maktablarga ilk qadam qoʻyadigan bolajonlarga atalgan 12 nomdagi Prezident sovgʻalari taqdim etilmoqda. 2024-2025 oʻquv yilida 3550 nafar bolalar 1-sinfga qabul qilinishi rejalashtirilgan. Yangi oʻquv yili boshlanishi arafasida Prezident sovgʻalarini quvonch bilan qabul qilayotgan bolajonlarning quvonchlari cheksiz. Tevarak-atroflari obodonlashtirilgan, dov-daraxtlariga chiroyli shakl berilib, turfa gullar ifor sochgan taʼlim maskanlari ilmga chanqoq, kelajagimiz egalari – Yangi Oʻzbekiston bunyodkorlarini yana oʻz bagʻriga olishga tayyor.

Robiya Yoʻldosheva.