SOBIQ SINFDOShLAR 50-YILDAN SOʻNG UChRAShDILAR

Inson hayotida shunday bir oniy lahzalar borki, bu lahzalar oʻzining goʻzalligi, oʻchmas, shirin taassurotlarga boyligi bilan barcha uchun birday qadrli. Bu – begʻubor va betakror bolalik! Joʻshqin, oʻyinqaroq, shumliklari ham oʻziga yarashgan takrorlanmas damlarni inson shuning uchun ham umr boʻyi qoʻmsab, sogʻinib yashaydi. Garchi u olis yillarni ortga qaytarib boʻlmasa-da, bolalikdagi qadrdon doʻstlar davrasida oʻzini bolalarday his etib, shodlanadi, hayot tashvishlarini bir zum boʻlsa-da unutib, begʻubor, samimiy suhbatlar qurishdan zavqlanadi.

Amudaryo tumanidagi 8-sonli umumtaʼlim maktabini 1974-yilda bitirgan sobiq sinfdoshlarning 50-yildan keyingi diydorlashuv kechasida boʻlganimizda inson oʻz umrida hech narsaga alishmaydigan bolalik xotiralarining oradan shuncha yillar oʻtsa-da, naqadar aziz va qadrliligini his etdik. Yoshlari 70ni qoralab qolgan, har biri bir etak nevara-chevaraning bobo va buvijonlari boʻlgan, yuzlarida nuroniylik aks etib turgan otaxon va onaxonlar oʻrtasidagi samimiyat choʻgʻidan koʻngillarimiz nurlandi.

Sobiq sinfdosh doʻstlar diydorlashuv marosimi avvalida oʻzlari taʼlim-tarbiya olgan muqaddas dargoh – 8-sonli maktabga tashrif buyurdilar. Sinfxonalardagi jimjitlik ogʻushida sobiq sinfdoshlar bu maskanda bundan 50-yil avval oʻquvchi-yoshlarga ilm sirlarini oʻrgatgan, farzandlariday aziz boʻlib qolgan shogirdlarini mustaqil hayotga yoʻllab, ularga baland parvozlar tilab qolgan ustozlari, Alloh rahmat qilsin, Pariza Doʻsimbetova, Abdulla Oʻrozmetov, Bozorboy Jumamurodov, Erimmat Matchonov, Shukurjon Xudoyberganova, Davlat Jumamurodovlar bilan bogʻliq aziz xotiralarini yodga oldilar.

Xidir Bobojonov, Davlat Rajabov, Rahim Qosimov, Qurbonboy Jumamurodov, Nurulla Abdullayev, Yangiboy Japaqov, Oʻrozboy Qurbonboyev kabi ustozlarni ehtirom bilan esladilar. Qurol Toʻrayev, Yoʻldosh Xoʻjanov, Sulton Yusupov, Abdulla va Ibrohim Eshniyozovlar, Ortiqboy Bobojonov, Bekmat Otajonov, Maydagul Mambetjonova, Odil Rajabov, Jumaboy Qurbonboyev singari ustozlarining jonkuyarliklari tufayli hayotda oʻz oʻrinlarini topganlarini alohida eʼtirof etishib, marhum ustozlari ruhlariga Qurʼon oyatlaridan tilovatlar qildilar.

Shundan soʻng, oʻzlari taʼlim olgan sinfxonalardagi partalarga oʻtirishib, turli sabablarga koʻra hayotdan erta ketgan sobiq sinfdoshlari xotirasi oldida bir daqiqa sukut saqlashib, ular bilan bogʻliq bolalik va oʻsmirlik xotiralarini yodga olishdi. Bir-birlarini gʻoyibona sogʻingan doʻstlar orasidagi kamchilikni toʻldirgulik soʻz topilmadi.

Boʻsh partalar orasida nigohlar giryon,

Oʻrozmatni, Rahimboyni izlab toldilar,

Matkarim-u Oʻrinboy va Ozodlar bir yon,

Qayda, deb Bozorgul, Jumagul-u Qubalar?

Doʻstlarning qatori buzilmasin endi, deb, sinfdoshlar jam boʻlib qildi duolar.

Shundan soʻng, sinfdosh doʻstlar marhum doʻstlari qabrlarini ziyorat qilishib, dunyodan bevaqt oʻtib ketgan doʻstlari ruhlarini shod qilish maqsadida “Yusuf Eshon bobo” jomʼe masjidi imom-xatibi Abdurahmon Matsapayev ishtirokida xotira marosimi tashkil etdilar va xayr-ehson tadbirlarini amalga oshirib, haqlariga duoi-fotiha qildilar.

Sobiq sinfdosh doʻstlarning 50-yildan keyingi diydorlashuv marosimi Mangʻit shahrining eng soʻlim va bahavo goʻshasi – istirohat bogʻidagi “Oltin saroy” tantanalar va marosimlar majmuasida davom etdi.

Fayzli dasturxon atrofidagi samimiy va dilkash gurunglar musiqiy lahzalarga ulanib, biri-biridan yoqimli kuy va qoʻshiqlar koʻngillarga orom bagʻishladi. Oradan shuncha yillar oʻtib ham ohori toʻkilmagan samimiyat, qadrdonlik tuygʻulari hokim boʻlgan sobiq sinfdoshlar davrasida shu kuni mehr gulladi, maktab boʻsagʻasidan poloponlarday uchib, hayotning turfa xil chamanlaridan baxt-iqbollarini izlagan, ne-ne jumboqlar oldida ming bora hayratlangan, sinovlarda qiynalgan lahzalarda biri-birini suyab, mushkullarini oson qilishga intilib yashagan va nihoyat nuroniy yoshga yetganlarida ham hamon biri-biridan koʻngil uzmagan qadrdon doʻstlarga, toʻgʻrisi, qalbimizda havas va hurmat uygʻondi.

Ana shu havas va ehtirom tuygʻusini nazmiy tilaklarga jo etdik:

Doʻstlikning qadrini boshida tutib,

Hayot tashvishlarin bir chetga qoʻyib.

Bolalikka qaytib, yoshlikka qaytib,

Koʻngillar yayradi, yayradi toʻyib.

Bor boʻlsin dillarda mehr-u oqibat,

Baxtiyor dillarni quchgan muhabbat!

Robiya Yoʻldosheva.