Умумтаълим мактабларида “Биринчи қўнғироқ” садолари янграб, янги ўқув йили бошланди
4 сентябрь куни куни мамлакатимизнинг барча ҳудудларидаги умумтаълим мактабларида “Биринчи қўнғироқ” садолари янграб, янги ўқув йили бошланди.
Амударё тумани Мактабгача ва мактаб таълими бўлимига қарашли 86та умумтаълим мактабларида ҳам янги 2024-2025 ўқув йилининг биринчи куни тантанали тарзда нишонланди. Илк марта мактаб остонасига қадам босган 3600 нафар 1-синф ўқувчиларига 12 турдаги ўқув қуроллари, мактаб сумкаси, дарсликлар мажмуасидан иборат Президент совғалари топширилди. Болалар учун бу тантана нафақат мактаб аталмиш маърифат масканига қадам қўйиш, балки ҳаётидаги янги даврга йўл очувчи ҳаяжонли, орзиқиб кутилган ва унитилмас сана сифатида хотираларида мухрланди.
Ҳар бир умумтаълим мактабида ўтказилган тадбирда тасдиқланган жадвалга мувофиқ туман ҳокими, секторлар раҳбарлари, депутатлар, муассаса ва ташкилотлар раҳбарлари, Мактабгача ва мактаб таълими бўлими масъуллари, кенг жамоатчилик вакиллари, маҳалла фаоллари ва ота-оналар қатнашди.
Тадбирлар аввалида Ўзбекистон ва Қорақалпоғистон Республикаларининг давлат мадҳиялари янграб, ўқувчилар – навқирон авлод вакиллари қўлларини кўксига қўйиб, юрт мадҳини жўр бўлиб куйлашди.
33-сонли умумтаълим мактабида бўлиб ўтган шундай тадбирда туман ҳокими Собир Хўжаметов иштирок этиб, йиғилганларни Мустақиллик байрами ва янги ўқув йилининг бошланиши билан табриклади.
Туман ҳокими ўз нутқида барчани янги ўқув йили билан қизғин муборакбод этиб, илмга чанқоқ ўқувчилар ва жонкуяр ўқитувчи-мураббийларга омад ҳамда муваффақиятлар тилади. Айниқса, мактабга илк бор қадам қўйган 1-синф ўқувчиларини, уларнинг ота-оналарини фарзандларининг ҳаётида янги давр бошланаётгани билан табриклаб, маърифат масканида етук инсонлар бўлиб камол топишларига тилакдошлик билдирди.
Таъкидланганидек, бугун мамлакатимизда “Янги Ўзбекистон – мактаб остонасидан бошланади”, деган эзгу ғоя асосида амалга оширилган кенг кўламли маъмурий ислоҳотлар таълим соҳаси ривожига хизмат қиляпти. Кейинги йилларда мамлакатимизда юзлаб замонавий мактаблар барпо этилиб, Президент ва ижод мактаблари ёшларимизнинг билимларини кенг дунёга намойиш этиш имконини яратди. Ихтисослаштирилган мактаблар тармоғида эса ўқувчилар ўзлари қизиққан фанлардан чуқурлаштирилган тарзда ҳам назарий, ҳам амалий билимларни ўрганишмоқда.
Маълумот ўрнида, якунланган ўқув йилида Амударё туманидаги умумтаълим мактабларининг 11-синфини 2963 нафар ўқувчи битирди. Шундан 2597 нафари олий таълим муассасаларига қабул қилиш имтихонларида иштирок этишди. Ўқувчилардан 757 нафари имтиҳонлардан муваффақаиятли ўтишди, хусусан, 164 нафар грант, 593 нафари тўлов шартнома асосида олий таълим муассасаларига қабул қилинди. Эътироф этиш жоизки, 40-сонли умумтаълим мактабининг 11-«Д» ва 36-сонли умумтаълим мактабининг 11-«Г» вариатив синфи ўқувчилари 100 фоиз олий таълим муассасаларига қабул қилинди.
Мактабнинг байромана безатилган ҳовлисида тантана давом этди. Мусиқа садоси остида ўқувчилар билимга чорловчи шеър ва қўшиқлар ижро этишди. Биринчи синфга қадам қўйган ўқувчилар тантанали тарзда Президент совғаларини туман ҳокими Собир Хўжаметов қўлидан қабул қилиб олишди. Улар мактабда аъло баҳоларга ўқишга, билимларни қунт билан эгаллашга ваъда беришди.
Бундай тантаналар туманимизнинг бошқа мактабларида ҳам кўтаринки савияда ташкил этилди. “Биринчи қўнғироқ” чалинганидан сўнг ўқувчилар барча қулайликларга эга, замонавий жиҳозланган, шинам синфхоналар сари ҳаяжон ва иштиёқ билан йўл олди.
Тумандаги 22-сонли мактабда ҳам “Бир бўлсак – ягона халқмиз, бирлашсак –Ватанмиз” шиори остида “Мустақиллик дарси” ўтилди. Ушбу дарсларда истиқлол йилларида эришилган ютуқлар, ёшларимиз қўлга киритаётган марралар ҳамда миллий тарихимизнинг ёрқин лавҳалари ҳақида ўқувчиларга сўзлаб берилди. Зотан “Мустақиллик дарси”дан кўзланган мақсад янги ўқув йилини ўқувчилар тафакурини миллий ва умуминсоний қадриятлар, Ватанга муҳаббат ва садоқат, инсонпарварлик туйғулари билан уйғун ҳолда бошлашдан иборат.
“Биринчи қўнғироқ” ва “Мустақиллик дарси” тадбирлари ўқувчилар, ота-оналар, педагоглар учун шукуҳли тарзда ўтди.
Райҳон Якубова, туман Мактабгача ва мактаб таълими бўлимининг Мактаблар фаолиятини мувофиқлаштириш шўъбаси методисти
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
