11-СОНЛИ МАКТАБДА “ЭЗГУЛИК, БИЛИМ ВА МАЪРИФАТНИ ҚУРОЛ ҚИЛИБ, ЖАҲОЛАТ ВА ЁВУЗЛИК ЙЎЛИНИ ТЎСАЙЛИК!” ШИОРИ ОСТИДА ОТА-ОНАЛАР ИШТИРОКИДА ТАДБИР ЎТКАЗИЛДИ

Билим, юксак маънавият ва маърифат ҳар қандай ёвузликнинг, жаҳолатнинг йўлини тўсувчи қудратли қуролдир. Шу боис, ҳаётини эзгу мақсадлар рўёби учун бағишлаган, кучли билим ва салоҳиятга эга бўлган инсонлар ёвузликка, жаҳолатга тик қарашдан, бу иллатларга қарши курашишдан асло қўрқмайдилар ва ортга чекинмайдилар. Шу боис ўсиб келаётган ёш авлодни эзгуликка йўлдош ва камарбаста, юксак маънавиятли, билимдон, ақлан ва жисмонан етук инсонлар қилиб тарбиялаш мсақсадида Амударё туманидаги 11-сонли умумтаълим мактабида бўлиб ўтган тадбирда илмнинг, юксак маънавиятнинг бебаҳо аҳамияти алоҳида эътироф этилди.

“Эзгулик, билим ва маърифатни қурол қилиб, жаҳолат ва ёвузлик йўлини тўсайлик!” шиори остида 150 нафардан зиёд ота-оналар иштирокида ўтказилган маънавий-маърифий тадбирда Қипчоқ шаҳарча фуқаролар йиғини раиси Нураддин Холбоев, "Миллий гвардия ходими Исломбек Емберганов, ҳудуд бўйича профилактика инспектори Улуғбек Юлдашев, “Ҳожи Эшон бобо” жомъе масжиди имом-хатиби Ражаббой Ҳабибуллаевлар иштирок этдилар.

Тадбир иштирокчилари мактаб мусиқа тўгараги аъзолари томонидан катталар ва ёшларни эзгулик сари руҳлантирувчи адабий-мусиқий дастур ва кўргазмали чиқишлар билан кутиб олинди.

Шундан сўнг меҳмонлар мактаб фойесида ташкил этилган ўқувчиларнинг қўл меҳнати билан яратган ажойиб буюмлари, ранг-тасвир санъати намуналари, ўқишда, спортда эришган ютуқлари ҳақида ҳикоя қилувчи кўргазма билан танишдилар.

Тадбирни мактаб директори Улуғбек Мамутов очди ва бугунги глобаллашув жараёнида оила ва мактаб-маҳалла ҳамкорлигининг аҳамияти, ёш авлод таълим-тарбиясида кечиктириб бўлмайдиган муҳим масалалар, хусусан, ёш авлодни миллий ўзликни англаш, анъана ва қадриятларга чуқур ҳурмат руҳида тарбиялаш, уларнинг қизиқиш ва интилишларини қўллаб-қувватлаш борасида оиланинг тутган ўрни муҳимлигини таъкидлади.

Тадбир давомида мактаб директорининг маънавий-маърифий ишлар бўйича ўринбосари Қундузой Холмуродова мактаб педагогика жамоасининг “Эзгулик, билим ва маърифатни қурол қилиб, жаҳолат ва ёвузлик йўлини тўсайлик!” шиорини ўзида мужассам этган ота-оналарга Мурожаатини ўқиб эшиттирди.

Шундан сўнг мактаб психологи Дилноза Шомуродова мазкур Мурожаатнинг мазмун-моҳияти, унда илгари сурилган даъваткор ғоялар юзасидан ота-оналар билан психологик тренинг ўтказди. Тадбирда иштирок этаётган барча ота-оналар тренингда фаол иштирок этди. Психологик тренинг қизғин баҳс-мунозаралар, қизиқарли савол-жавобларга бой бўлди.

Тадбирнинг адабий-бадиий қисмида мактабнинг “Турон” ҳаваскорлик театр жамоаси аъзолари томонидан саҳналаштирилган “Зумрад ва Қиммат” эртаги ҳамда “Алпомиш” достонидан парча намойиш этилди. Шунингдек, мусиқа тўгараги аъзолари жўр бўлиб куйлаган дилрабо ашулалар, айниқса, маромига етказиб ижро этилган машҳур “Сартарош” қўшиғи тадбир иштирокчилари томонидан давомли қарсаклар билан олқишланди.

Эзгулик, тинчлик, миллатлараро тотувлик, бағрикенглик ва она Ватанни мадҳ этувчи шеърлар, куй ва қўшиқлар, рақс тўгараги аъзолари томонидан ижро этилган ўзбек ва жаҳон халқлари рақслари тадбир иштирокчиларига завқ-шавқ бағишлади.

Робия Йўлдошева.