Халқ депутатлари туман Кенгашининг биринчи сессияси бўлиб ўтди

2024 йил 8 ноябрь куни Амударё тумани ҳокимлигининг мажлислар залида еттинчи чақириқ Халқ депутатлари туман Кенгашининг биринчи сессияси бўлиб ўтди.

Сессияда туман ҳокими Собир Хўжаметов, секторлар раҳбарлари, Қорақалпоғистон Республикаси Жўқорғи Кенгесига тумандан сайланган депутатлар, туман ҳокимининг ўринбосарлари, муассаса, корхона ва ташкилотлар раҳбарлари, ОАВ вакиллари ва туман фаоллари таклиф этилди.

Сессияни туман сайлов комиссияси раиси Ялғош Шомуродов очди ва Халқ депутатлари Амударё туман Кенгашига 2024 йил 27 октябрда бўлиб ўтган сайлов натижалари тўғрисида ахборот берди.

Ахборотда қайд қилинганидек, сайловларга тайёргарлик кўриш ва уни ўтказиш билан боғлиқ барча тадбирлар Ўзбекистон Республикаси Сайлов кодексига қатъий амал қилинган ҳолда очиқ ва ошкора тарзда амалга оширилган. Халқ депутатлари туман Кенгашига сайлов ўтказувчи 64 та сайлов участкаларида ўтказилган овоз бериш якунларига кўра 125 нафар номзоддан округлар бўйича сайловчиларнинг энг кўп овозини олган 25 нафари депутат қилиб сайланган ва рўйхатга олинган. Уларнинг 11 нафари аёллар, 12 нафари эса биринчи марта депутатликка сайланган номзодлардир.

Депутатлар орасида муҳандис-механиклар 3 нафарни, ўқитувчилар 10 нафарни, шифокорлар 3 нафарни, агрономлар 5 нафарни ва бошқа соҳа мутахассислари 4 нафарни ташкил қилади.

Соҳалар бўйича эса қишлоқ хўжалиги ходимлари 2 нафар, саноат ходимлари 2 нафар, сиёсий партиялар ва жамоат ташкилотлари вакиллари 3 нафар, халқ таълими соҳаси ходимлари 8 нафар, соғлиқни сақлаш соҳаси ходимлари 2 нафар, ҳокимлик ходимлари 2 нафар ва фуқаролар йиғинлари ходимлари 6 нафарни ташкил қилади.

Сайланганларнинг барчаси олий маълумотли мутахассислардир. Депутатлар орасида 30 ёшгача бўлганлар 1 нафарни, 30-40 ёшгача бўлганлар 4 нафарни, 40-50 ёшгача бўлганлар 5 нафарни, 50-60 ёшгача бўлганлар 11 нафарни ва 60 ёшдан ошганлар 4 нафарни ташкил қилади.

Шундан кейин “Халқ депутатлари туман Кенгашига сайланган депутатларнинг партия гуруҳларини рўйхатга олиш тўғрисида”ги масала муҳокама қилинди. Кенгаш қарори билан Ўзбекистон Либерал-демократик партиясидан сайланган 7 нафар, “Адолат” социал-демократик партиясидан сайланган 6 нафар, “Миллий тикланиш” демократик партиясидан сайланган 3 нафар, Халқ демократик партиясидан сайланган 6 нафар ва Экологик партиядан сайланган 3 нафар депутатдан иборат партия гуруҳлари рўйхатга олинди.

Депутатлар шунингдек, Халқ депутатлари Амударё тумани Кенгашининг Регламенти ва доимий комиссиялар тўғрисидаги Низомни ҳам тасдиқладилар.

Сессияда кейин “Амударё тумани ҳокимини тайинлаш тўғрисида”ги Қорақалпоғистон Республикаси Жўқорғи Кенгесининг фармойишини тасдиқлаш ҳақида”ги масала кўриб чиқилди.

Депутатлар эътиборига Қорақалпоғистон Республикаси Жўқорғи Кенгеси Раисининг 2024 йил 6 ноябрда қабул қилинган “Хўжаметов Собир Жаббарбергановични Амударё тумани ҳокими этиб тайинлаш тўғрисида”ги фармойиши тақдим қилинди. Сўнгра номзод бўйича депутатларнинг фикр-мулоҳазалари тингланди. Сўзга чиққанлар Собир Хўжаметовнинг кўп йиллар давомида Амударё тумани ва Қорақалпоғистон Республикаси миқёсида турли ташкилотларда, вазирлик ва идораларда самарали фаолият юритган катта тажрибага эга раҳбар эканлигини қайд қилиб, унинг келгусидаги фаолиятига муваффақиятлар тилади.

“Хўжаметов Собир Жаббарбергановични Амударё тумани ҳокими этиб тайинлаш тўғрисида”ги Қорақалпоғистон Республикаси Жўқорғи Кенгеси Раисининг фармойиши депутатлар томонидан бир овоздан тасдиқланди.

Шундан кейин Амударё тумани ҳокими Собир Хўжаметов туманни келгуси 5 йил давомида иқтисодий-ижтимоий ривожлантириш бўйича дастурини тақдим қилди.

Тақдимотда таъкидланганидек, 2024–2029 йилларда туманни ҳар томонлама ривожлантириш учун қабул қилинган дастурнинг асосий мақсади аҳоли фаровонлигини ошириш ва барқарор иқтисодий ривожланишни таъминлашдир. Туман ҳокими ўз маърузасида асосий эътиборни иқтисодиёт, саноат, қишлоқ хўжалиги, тадбиркорлик, таълим ва тиббиёт соҳаларини ривожлантириш масалаларига қаратди.

Дастурда туманнинг иқтисодий ўсишини янада яхшилаш мақсадида саноат, қишлоқ хўжалиги ва хизматлар соҳаларини ривожлантириш бўйича аниқ чора-тадбирлар белгиланган. Масалан, саноат ҳажми 2024 йил якуни бўйича 1,6 трлн. сўмни ташкил қилиши кутилаётган бўлса, 2029 йилга келиб бу кўрсаткични 2,9 трлн сўмга етказиш режалаштирилмоқда. Шунингдек, қишлоқ хўжалигини янада ривожлантириш мақсадида ердан самарали фойдаланиш, ҳосилдорликни ошириш, сув тежовчи технологияларни жорий қилиш, интенсив боғ ва токзорлар барпо қилиш кўзда тутилмоқда.

2025-2029 йиллар давомида туманда умумий қиймати 130 млн долларга тенг бўлган 345та янги инвестицион лойиҳаларни ишга тушириш ва 2 684та янги иш ўринлари ташкил этиш, 250 млн доллар миқдорида тўғридан-тўғри хорижий инвестиция ва кредитларни ўзлаштириш, шу билан бирга товарлар ва хизматлар экспорти ҳажмини 83,9 млн долларга етказиш, бунда, экспортчи корхоналар сонини 20тага етказиб, экспорт географиясини 10та давлатга, экспорт қилинадиган янги маҳсулотлар турларини эса 20тага етказиш режа қилинмоқда.

Ижтимоий йўналишда эса ишсизликни 4,4 фоизга тушириш, таълим тизимини такомиллаштириш ва мактабгача таълим билан қамраб олиш даражасини 82,2 фоизга етказиш, тиббиёт соҳасини янада ривожлантириш бўйича аниқ чора-тадбирлар белгиланган. 2025-2029 йилларда туман ҳудудида қўшимча 2та янги умумтаълим мактаби қуриш, 5та умумтаълим мактабларини мукаммал таъмирлаш ҳамда 2та мактабда реконструкция ишларини амалга ошириш орқали қўшимча 1 880 нафар янги ўқувчи ўрни яратилиши кўзда тутилган.

Шунингдек, аҳолига қулайликлар яратиш мақсадида инфратузилмани яхшилаш, аҳолини тоза ичимлик суви билан таъминлаш, йўл ва кўприкларни таъмирлаш, яшил майдонлар яратиш ва бошқа йўналишларда ҳам тегишли чора-тадбирлар амалга оширилиши кўзда тутилган.

Дастур келгуси 5 йил давомида туманнинг иқтисодий ривожланишини таъминлашга, аҳолининг турмуш даражасини янада оширишга қаратилган аниқ ва манзилли чора-тадбирларни ўз ичига олган.

Тақдимотдан кейин сессияни туман ҳокими – халқ депутатлари Амударё туман Кенгаши раиси Собир Хўжаметов олиб борди.

Сессия кун тартибидаги сўнгги масала муҳокамасидан кейин Қорақалпоғистон Республикаси Жўқорғи Кенгеси, халқ депутатлари туман ва шаҳар Кенгашларининг Қўшма мажлиси Маслаҳат кенгашига 21-Чойкўл сайлов округидан туман Кенгаши депутати Яхшимурат Ахмедовнинг номзоди тавсия этилди.

Кун тартибига киритилган барча масалалар бўйича Кенгаш қарорлари қабул қилиниб, шунинг билан сессия ўз ишини якунлади.

amunews.uz веб-сайти таҳририяти