Ўзбекистон Республикаси Давлат байроғи қабул қилинган кун муносабати билан байрам тадбири бўлиб ўтди

Давлат рамзлари ҳар бир мамлакатнинг мустақиллигини ифодаловчи муқаддас белгидир. Республикамиз давлат рамзлари халқимизнинг шон-шарафи, тарихий хотираси ва интилишларини ўзида мужассам этиб, тинч ва осойишта, озод ва эркин ҳаётимиз, ёруғ келажагимизга бўлган ишончимизнинг ифодасидир. Давлат рамзлари қабул қилинган кун мамлакатимизда байрам сифатида кенг нишонланади.

18 ноябрь – Ўзбекистон Республикаси давлат байроғи қабул қилинган кун муносабати билан Амударё тумани Маданият бўлими биносида байрам тадбири бўлиб ўтди. Тадбирда туман ҳокимининг ёшлар сиёсати, ижтимоий ривожлантириш ва маънавий-маърифий ишлар бўйича ўринбосари Нодирбек Камолов сўзга чиқиб, байроғимиз мустақиллик, озодлик, тинчлик ва барқарорлик тимсоли эканлигини таъкидлади ҳамда барчани байрам билан самимий табриклади.

Нодирбек Камолов ўз сўзида байроғимиз халқимизнинг асрий орзу-истаклари, ғайрати ва шижоатини, халқимизга хос меҳмондўстликни мужассам этишини, миллий байроғимизнинг давлат идора ва муассасалари, ўқув юртлари, Ўзбекистон аъзо бўлган халқаро ташкилотлар, чет эллардаги элчихона ва доимий ваколатхоналаримиз пештоқида ҳилпираб туриши, турли байрам ва тантаналарда, мамлакатимиз вакиллари қатнашаётган халқаро миқёсдаги сиёсий, маданий-маърифий тадбирларда, нуфузли спорт мусобақаларида Ватанимизнинг шаъни, халқимизнинг ғурурини ёрқин акс эттириши барчамизга ифтихор бахш этади, дея таъкидлади.

Дарҳақиқат, халқаро спорт беллашувларида ғалаба қозонган спортчиларимиз шарафига юртимиз байроғи баланд кўтарилган лаҳзада ҳар биримиз чексиз ҳаяжонга тушамиз, ҳеч кимдан кам эмаслигимизни ҳис қиламиз.

Байрам тадбири туман Маданият бўлими томонидан тайёрланган концерт дастури билан давом этди. Туманимизнинг истеъдодли хонандалари Ватан, тинчлик, мустақиллик, истиқлолни мадҳ этувчи куй-қўшиқлар ижро этдилар ҳамда тадбирга юқори байрамона руҳ бахш этдилар.

Қайд этиш жоизки, Давлат байроғи Ўзбекистон Республикасининг 1991 йил 18 ноябрдаги “Ўзбекистон Республикасининг Давлат байроғи тўғрисида”ги Қонуни билан тасдиқланган. Давлат байроғи Ўзбекистон Республикаси давлат суверенитетининг рамзидир. Ўзбекистон Республикасининг Давлат байроғи халқаро муносабатларда Ўзбекистон Республикасининг тимсоли бўлади.

Байроғимиз ўзида бутун Ўзбекистон сарҳадида қадимда мавжуд бўлган давлатлар билан тарихан боғлиқликни ҳамда юртимиз ҳудудида яшовчи миллат ва элатларнинг анъаналарини мужассамлаштирган.

Байроқдаги мовий ранг – унинг остида барча миллатлар турли хил хавф-хатарлардан холи, эмин-эркин ҳолда аҳил-иноқ яшаб келаётган мусаффо осмонимиз ҳамда оби ҳаёт рамзидир. Бу ранг – давлатимиз фуқароларининг ўзаро ҳамжиҳатликда, бир-бирини ҳурмат қилиб, диний бағрикенглик тамойиллари асосида тинч-тотув яшаётганининг тимсоли. Яшил ранг эса табиатнинг янгиланиши ҳамда юртимизнинг жаннатмонанд эканлиги рамзидир. Бу ранг кўпгина халқларда навқиронлик, умид ва шодумонлик тимсоли ҳисобланади. Қизил чизиқлар давлатимиз фаровонлиги, жамият тараққиёти йўлида ўзаро ҳамжиҳатлик билан ҳормай-толмай меҳнат қилаётган юрт фарзандларининг вужудида оқаётган ҳаётий қудрат тимсолидир.

Давлат рамзлари ҳамиша муқаддас ва улуғ саналади. Чунки у халқнинг ўтмиши, бугуни ва келажагини ўзида мужассам этган Ватаннинг ёрқин тимсолидир.

Давлат байроғи қабул қилинганлигининг 33 йиллиги муносабати билан ташкил этилган байрам тадбири юқори байрамона руҳда ҳамда таассуротларга бой тарзда ўтди.

Чарос Арслонова, туман ҳокимлигининг Ахборот хизмати раҳбари.