VII чақириқ Халқ депутатлари Амударё туман Кенгашининг 2-сессияси тўғрисида ахборот

Жорий йилнинг 6 декабрь куни Амударё тумани ҳокимлигининг мажлислар залида VII чақириқ Халқ депутатлари туман Кенгашининг навбатдаги 2-сессияси бўлиб ўтди.

Сессияда депутатлар, секторлар раҳбарлари, ҳоким ўринбосарлари, тегишли ташкилотлар раҳбарлари ҳамда оммавий ахборот воситалари вакиллари иштирок этди. Сессияни “3-Дўстлик” сайлов округидан депутат Мадамин Казаков очиб берди. Сессия котиблигига “1-Навоий” сайлов округидан депутат Гулшод Юсупова сайланди.

Сессия кун тартибидаги дастлабки масала Халқ депутатлари Амударё тумани Кенгаши Раисини сайлаш тўғрисида бўлиб, Ўзбекистон Республикасининг “Маҳаллий давлат ҳокимияти тўғрисида”ги Қонуни ҳамда сиёсий партия гуруҳларининг Қўшма йиғилиши таклифи асосида Халқ депутатлари Амударё туман Кенгаши Раиси лавозимига 20-Тўлқин сайлов округидан депутат Хожаметов Сабир Жаббарберганович номзоди таклиф қилинди ҳамда депутатлар томонидан маъқулланди.

Шундан сўнг сессияни Халқ депутатлари Амударё туман Кенгаши Раиси Сабир Хожаметов бошқариб борди.

Сессия кун тартибидаги навбатдаги – “Халқ депутатлари Амударё туман Кенгаши Раиси ўринбосарини ва котибияти мудирини тайинлаш тўғрисида”ги масала муҳокамасида туман Кенгаши Раиси ўринбосари лавозимига “3-Дўстлик” сайлов округидан депутат Казаков Мадамин Ражапович номзоди ҳамда туман Кенгаши котибияти мудири лавозимига “16-Куюк кўпир” сайлов округидан депутат Ўразбаев Мансур Ахмаджанович номзоди таклиф қилинди ва депутатлар томонидан маъқулланди.

Сессия кун тартибидаги навбатдаги – “Маҳаллий бюджетнинг 2024 йил давомида электрон савдо майдончасида ер участкаларига бўлган ҳуқуқларни сотишдан тушган маблағлар ҳисобидан ажратиладиган маблағлар тўғрисида”ги масала юзасидан туман ҳокимининг биринчи ўринбосари Фаҳриддин Юсупов ҳисобот берди. Ҳисобот депутатлар томонидан маъқулланди ҳамда тегишли қарор қабул қилинди.

Депутатлар “Кенгаш доимий комиссияларини тузиш ва шахсий таркибини тасдиқлаш тўғрисида”ги масалани ҳам муҳокама қилдилар. Ушбу масала юзасидан “6-Бўстон” сайлов округидан депутат Махсуд Садуллаев ахборот берди. Қайд этилганидек, қонунчиликда Халқ депутатлари Амударё туман Кенгашининг Регламентига асосан Кенгаш сессияси муҳокамасига киритиладиган масалаларни дастлабки тарзда кўриб чиқиш ва тайёрлаш ҳамда ваколатлари доирасида назорат ўрнатиш мақсадида Кенгаш ўз ваколати муддатига доимий комиссиялар тузиши белгиланган. Кенгаш қарори билан Халқ депутатлари Амударё туман Кенгашининг 5 та доимий комиссиялари тузилиб, депутатлар мутахассисликларидан келиб чиққан ҳолда тегишли комиссияларга бириктирилди.

Сессия кун тартибига киритилган барча масалалар атрофлича муҳокама этилди, депутатлар ҳар бир масалалар юзасидан ўз фикр-мулоҳазаларини билдирдилар. Фаол муҳокамалар ва савол-жавоблардан кейин ҳар бир масала бўйича халқ депутатлари туман Кенгашининг тегишли қарорлари қабул қилинди. Шу билан сессия ўз ишини якунлади.

Туман ҳокимлигининг Ахборот хизмати.