“Халқ давлат идораларига эмас, балки давлат органлари халқимизга хизмат қилиши керак” тамойили – амалда

Инсон манфаатларини таъминлаш учун, аввало, одамлар билан, халқ билан мулоқот қилиш, уларнинг ҳаётий муаммо ва эҳтиёжларини яхши билиш алоҳида аҳамият касб этади. Сўнгги йилларда мамлакатимизда аҳоли муаммоларини жойига бориб ўрганишда ҳудудларда раҳбарлар иштирокида ташкил этилаётган сайёр қабуллар муҳим аҳамият касб этмоқда.

Амударё тумани Дарёбўйи маҳалласидаги 21-сонли мусиқа мактаби биносида туман ҳокими Собир Хўжаметовнинг аҳоли мурожаатларини ўрганиш юзасидан ўтказган сайёр қабули ҳам шу мақсадга қаратилгани билан аҳамиятлидир. Сайёр қабул жараёнида ҳоким ўринбосарлари, бўлимлар бошлиқлари, корхона-ташкилотлар раҳбарлари ҳудуддаги Қипчоқ овул ва шаҳарча, Дарёбўйи, Бештом, Уйшин ва Қумёп маҳаллалари ҳамда Чойкўл ва Қангли овуларида яшовчи аҳоли вакиллари иштирок этдилар.

“Халқ давлат идораларига эмас, балки давлат органлари халқимизга хизмат қилиши керак” деган тамойил асосида ташкил этилган сайёр қабулда аҳоли вакилларидан турли масалалар юзасидан жами 20дан ортиқ мурожаатлар келиб тушди.

Хусусан, Чойкўл овули Гулбоғ кўчасида яшовчи Баҳром Алламберганов қизининг олий ўқув юртида ўқишни давом эттириши учун шартнома пулини тўлашда амалий ёрдам сўраб, Эҳтиром кўчасида яшовчи Сарвиноз Қурбанбоева эса икки нафар ногиронлиги бўлган укалари учун “Саховат ва кўмак” жамғармасидан моддий ёрдам олиш масаласида мурожаат қилдилар.

Шунингдек, Уйшин маҳалласида яшовчи Малика Бозорбоева уй-жойини таъмирлаш учун моддий ёрдам ажратишда, Қангли овулида истиқомат қилувчи Саломат Абдуллаева уж-жой қуриш учун қурилиш материаллари олишда, Дарёбўйи маҳалласида яшовчи Зулхумор Жангабоева турмуш ўртоғи – II гуруҳ ногирони Хайрулла Юлдашевга “Саховат ва кўмак” жамғармасидан дори-дармон олишда амалий ёрдам сўраб мурожаат қилдилар.

Шунингдек, Бештом маҳалласида яшовчи Манзура Аҳмедованинг паррандачилик фаолияти билан шуғулланиш учун кредит маблағи ажратишда, Жақсимурод Умрзақовнинг “Саховат ва кўмак” жамғармасидан моддий ёрдам олишда амалий ёрдам кўрсатиш сўраб қилган мурожаатлари ҳам қабул қилиниб, уларни имкон қадар ижобий ҳал қилиш учун тегишли масъулларга кўрсатмалар берилди.

Таъкидлаш жоизки, сайёр қабуллар ва аҳоли вакиллари билан мулоқотлар одамларни қийнаётган муаммоларини ҳал этиш, халқнинг оғирини енгил қилиш, фуқароларнинг давлатга, эртанги кунга бўлган ишончини мустаҳкамламоқда. Турли даражадаги давлат ҳокимияти ва бошқарув органлари раҳбарларининг аҳоли вакиллари билан мулоқотлари одамларнинг орзу-истаклари, талаб ва эҳтиёжларини ўрганиш, уларга имкон қадар кўмак бериш, мавжуд муаммоларга ўз жойида ечим топиш имконини бермоқда.

Бугун мамлакатимизда инсон манфаатлари олий қадрият даражасига кўтарилди. Барча давлат идоралари фаолиятида аҳолининг мурожаатлари билан ишлаш бўйича сифат жиҳатидан мутлақо янги тизим яратилди. Жойларда ўтаётган сайёр қабуллар халқнинг дардини эшитиш, уларнинг муаммоларини ҳал этишда кутилган натижаларни бермоқда.

Сайёр қабулда фуқаролар томонидан йўлланган мурожаатлардаги масалаларнинг аксарияти жараённинг ўзида ижобий ечимини топган бўлса, муддат ва қўшимча ўрганиш талаб қиладиган мурожаатларни ҳал этиш юзасидан тегишли ташкилотлар раҳбарларига зарур топшириқлар берилди.

Чарос Арслонова, туман ҳокимлигининг Ахборот хизмати раҳбари.