Солиқ органлари ходимларининг самарали фаолияти маҳаллаларга иқтисодий ва ижтимоий наф келтирмоқда
Солиқ тизими ҳар бир давлатнинг иқтисодий барқарорлиги ва ривожланишида асосий омиллардан бири ҳисобланади. Давлат бюджетининг асосий манбаси сифатида солиқ тушумлари ижтимоий дастурларни молиялаштириш, инфратузилмани ривожлантириш ва фуқаролар фаровонлигини таъминлашда ҳал қилувчи роль ўйнайди.
Мамлакатимизда солиқ тизимини модернизация қилишга қаратилган ислоҳотлар ҳудудларда тадбиркорликни қўллаб-қувватлаш ва маҳаллий иқтисодиётни ривожлантиришда муҳим аҳамият касб этмоқда. Айниқса, Давлат раҳбарининг ташаббуси билан жорий этилган “Маҳалла еттилиги” ва солиқ органлари ўртасидаги яқин ҳамкорлик солиқ йиғимларининг самарадорлигини оширишга ёрдам беряпти.
Амударё туманида ҳам солиқ базасини кенгайтириш, тадбиркорлик фаолияти учун қулай муҳит яратиш, аҳоли бандлигини таъминлаш ва “Маҳалла еттилик”лари билан фаол ҳамкорликни йўлга қўйиш борасида амалга оширилаётган кенг кўламли ишлар маҳаллий иқтисодиётни мустаҳкамлашга салмоқли ҳисса қўшмоқда. 2024 йил давомида бу борада амалга оширилган саъй-ҳаракатлар туманнинг иқтисодий ва ижтимоий кўрсаткичларининг сезиларли даражада яхшиланишига замин яратди.
Йил бошида солиқ тушумлари прогнози 49 миллиард 299 миллион сўмни ташкил этган бўлса, йил якунига келиб 49,6 миллиард сўмлик солиқ тушумлари таъминланди. Яъни, прогноз кўрсаткичлари 0,3 млрд. сўм ортиғи билан – 100,4 фоизга бажарилди.
Бу – солиқ тизимининг модернизацияси, маҳалла тизими ва солиқ органлари ўртасидаги самарали ҳамкорликнинг натижасидир.
Бундан ташқари, 2024 йил давомида солиқ йиғимлари ва бюджетга тушумлар 2023 йилга нисбатан 111 фоизни ташкил қилиб, 4,9 миллиард сўмга ошди. Бу эса тумандаги иқтисодий фаолиятнинг жадаллашгани ва янги имкониятлар яратилганининг исботидир.
Амударё туманида солиқ қарзларини қисқартириш бўйича ҳам ижобий натижаларга эришилди. Туман бўйича 2024 йил бошига нисбатан бюджет олдидаги солиқ қарзи 215,5 миллион сўмга, фаолият юритаётган корхоналарнинг бюджет олдидаги солиқ қарзи эса 481,7 миллион сўмга камайди. Бу кичик ва ўрта бизнесни ривожлантириш ҳамда уларнинг молиявий барқарорлигини таъминлаш йўлида амалга оширилаётган ислоҳотларнинг мевасидир.
Шунингдек, 870та тадбиркорлик субъектларида товар айланмаси 1,8 миллиард сўмга оширилиши ҳисобига бюджетга қўшимча 524 миллион сўм айланмадан олинадиган солиқ ҳисобланди. Йил давомида 510та тадбиркорлик субъектларида 627 нафар норасмий ишчилар расмий секторга ўтказилди. Натижада иш ҳақи фонди 497,2 миллион сўмга ошиб, бюджетга 75,4 миллион сўм даромад солиғи ҳисобланди.
Аҳолини кичик бизнесга жалб қилиш ва бандлигини таъминлаш бўйича амалга оширилган тадбирлар давомида ноқонуний фаолият юритаётган 714 нафар фуқароларнинг фаолияти қонунийлаштирилиб, вақтинчалик молиявий қийинчиликларга дуч келган 296та якка тадбиркорларнинг фаолияти тикланди. 68та юридик шахслар, 646та якка тадбиркорлар, 1 минг 660та деҳқон хўжаликлари рўйхатга олиниб, 16 минг 39 нафар фуқаролар ўзини ўзи банд қилган ҳолда фаолият бошлади.
Маҳаллалардаги солиқ инспекторларининг фуқаролар йиғини маъмуриятлари билан фаол ҳамкорлиги натижасида жойларда 4 минг 73та қўшимча объектлар аниқланиши ҳисобига бюджетга қўшимча 1 млрд 697,8 млн. сўм мол-мулк ва ер солиқлари ҳисобланди.
Амалга оширилган шу каби кенг кўламли ишлар натижасида 2024 йил давомида бюджетга қўшимча 2 миллиард 297,2 миллион сўм миқдорида солиқлар ҳисобланди. Ушбу маблағлардан муайян қисми тумандаги овул ва маҳаллалар иқтисодиётини қўллаб-қувватлашга йўналтирилди.
Солиқ органлари ходимларининг маҳаллалардаги самарали фаолияти солиқ базасини кенгайтириш, яширин тадбиркорликнинг олдини олиш, солиқларни ўз вақтида ундириш, шунингдек, аҳолини ишбилармонликка йўналтириш ҳамда маҳалла бюджетини шакллантириш орқали фуқаролар йиғинларининг моддий-техник базасини мустаҳкамлаш, маҳалла инфратузилмасини яхшилашда катта аҳамият касб этмоқда.
Шоҳзод Қурбонбоев
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
