Тафаккур ва касбий тажриба уйғунлиги: туман Тиббиёт бирлашмаси ходимлари ўртасида шахмат мусобақалари ўтказилди

Шахмат – ақл ва стратегик тафаккурни ривожлантирувчи энг гўзал спорт турларидан бири ҳисобланади. Бу ўйин нафақат болалар ва ёшлар, балки катталар, турли касб эгалари учун ҳам фойдалидир. Айниқса, шифокорлар учун шахмат эътибор, хотира ва таҳлилий фикрлаш қобилиятларини шакллантирувчи муҳим восита саналади. Шу сабабли, яқинда Амударё тумани Тиббиёт бирлашмаси бош шифокори кубоги учун тиббиёт ходимлари ўртасида шахмат бўйича мусобақалар ташкил этилди.

Тадбирда Жўқорғи Кенгес раисининг шахмат спорти бўйича маслаҳатчиси Муфтулла Қутибаев, Қорақалпоғистон Республикаси шахмат федерацияси ижрочи директори Зиядулла Абипов, FIDE арбитри Рустам Давлатов ва тиббиёт ходимлари иштирок этишди. Мусобақани туман спорт мактаби шахмат мураббийи Зафар Қурбонов бошқариб борди.

Тадбир давомида Рустам Давлатов ва Муфтулла Қутибаевлар сўзга чиқиб, мамлакатимизда шахмат спортига қаратилаётган эътибор, спортчилар учун яратилаётган замонавий шароитлар ҳамда юртимиз шахматчиларининг халқаро майдондаги ютуқлари ҳақида сўз юритди. Айниқса, амударёлик ёш шахматчи Шоҳжаҳон Маматсолиевнинг муваффақиятлари алоҳида эътироф этилди. У жорий йил январь ойида мактаб ўқувчилари ўртасида ўтказилган Ўзбекистон чемпионатида 15 ёш тоифасида блиц йўналишида ғолибликни қўлга киритиб, спорт усталигига номзод кўрсаткичини бажарган эди. Бундан ташқари, туман Тиббиёт бирлашмаси шифокори Жаҳонгир Эримбетов 2024 йилда шахмат бўйича тиббиёт ходимлари ўртасида ўтказилган мусобақада мамлакат миқёсида 2-ўринни эгаллаган эди.

Бугунги кунда шахмат спортини оммалаштириш бўйича маҳаллалар ва таълим муассасаларида, шунингдек, турли ташкилотларда ҳам кенг қамровли ишлар олиб борилмоқда. Шахмат инсоннинг ақлий ва психологик ҳолатини мустаҳкамловчи самарали машғулот ҳисобланади. Айниқса, шифокорлар доимий равишда катта ҳажмдаги тиббий маълумотларни ёдда сақлаши, мураккаб вазиятларни таҳлил қилиши ва аниқ ташхис қўйиши талаб этилади. Шахмат эса хотирани мустаҳкамлаб, таҳлилий фикрлашни ривожлантиради.

Шахмат ўйинида ҳар бир юриш олдиндан пухта режалаштирилиши зарур бўлгани каби, тиббий муолажа ва жарроҳлик амалиётларида ҳам диққат-эътибор ва мувофиқлаштириш муҳим аҳамиятга эга. Шифокорлар муваффақиятга эришиш учун беморлар ва ҳамкасблар билан самарали мулоқот ўрнатиши, муаммоларни сабр билан ҳал қилиши лозим. Тиббиёт соҳасидаги мутахассисларнинг шахмат билан шуғулланиши уларнинг шахсий ривожи ва касбий самарадорлигига ҳам ижобий таъсир кўрсатади.

Шахмат тиббиёт ходимлари учун ҳордиқ чиқариш воситаси, шу билан бирга, касбий маҳорат ва ақлий салоҳиятни оширишга хизмат қилувчи самарали спорт тури ҳамдир.

21 февраль куни туман Тиббиёт бирлашмаси бош шифокори Фахриддин Абдуллаев иштирокида мусобақада юқори натижаларни қайд этган ходимларни тақдирлаш маросими бўлиб ўтди. Тадбирда соҳа масъуллари, бўлим шифокорлари ва бошқа ишчи ходимлар қатнашди. Бош шифокор Фахриддин Абдуллаев мусобақа юқори савияда ўтказилганлиги учун ташкилотчилар ва барча иштирокчиларга миннатдорчилик билдириб, шахматнинг тиббиёт ходимлари фаолиятидаги аҳамиятини таъкидлади.

Шундан сўнг, туман Тиббиёт бирлашмаси спорт тарғиботчиси Ибодулла Нуримбетов мусобақанинг якуний натижаларини эълон қилди. Фахрли ўринларни эгаллаган иштирокчилар Қорақалпоғистон Республикаси шахмат федерацияси ва туман Тиббиёт бирлашмаси томонидан кубок, медаль ва эсдалик совғалари билан тақдирланди.

Шоҳзод Қурбонбоев.